بلوچستان شونداری و شونہالی نا کسر آ راہی مسنے، صادق سنجرانی

اسلام آباد: قائم مقام صدر صادق سنجرانی پارینے کہ بلوچستان شونداری و شونہالی نا کسر آ راہی مسنے، تعلیم نا شون تننگ کن گام گیج کننگ انگ ءِ، چاغی و گوادر اٹی یونیورسٹی جوڑ کننگک، دیر و بجلی نا آخبتی ایسری کن اسہ سال اسے ٹی ویل کسر اس کشنگک، گوادر ءِ نیشنل گرڈ تون گنڈنگ انگ ءِ، داڑکن 18 ارب روپئی خڑچ کننگک، سی پیک نا ڈٹ آتا سوب آن نئے بیرہ صوبہ بلوچستان، بلکہ ملک پاکستان شونداری نا کسر آ راہی روان مریک۔ دا ہیت آتے او پارلیمنٹ ہاؤس نا دورہ کروک بلوچستان نا چندی تعلیمی ادارہ غاتا طالب علم آتتون اوڑدہی نا وخت آ ہیت و گپ کرسا کرے۔ قائم مقام صدر صوبہ بلوچستان نا 7 ضلع نا طالب علم آتا 100 باسکی ڈَل ءِ پارلیمنٹ ہاؤس اٹی بخیر کرے۔ دا ہیت است بڈی نا سوب ءِ کہ بلوچستان نا طالب علم آتیا تالان ڈَل اینو پگہ مطالعاتی دورہ غاٹے، و دا دورہ نا سوب ؤن ورنا چین ءِ اہم انگا قومی باندات آتا رد اٹ معلومداری دوئی مریک۔ قائمقام صدر ڈَل ءِ یوم آزادی نا مبارکبادی تس و پارے کہ بلوچستان نا 7 ضلع نا طالب علم داڑے ساڑی ءُ، ہرافک خوانندہ بلوچستان و پاکستان نا نمائندگہ ءِ کننگ اٹی ءُ۔ ایوان بالاء ٹی بلوچستان آن تعلقدار 23 سینیٹر ءُ، او اپرے کہ گوادر نا شونداری دا ملک اکن بھاز المی ءِ، قائمقام صدر پارے کہ پک پاننگ کیوہ کہ مچ آ ملک آن مخلوق بلوچستان آ بریک و دا صوبہ کل آن مونی کاہک۔ بلوچستان نا شونداری و شونہالی کن قدرتی وسیلہ غاتیان پبی فائدہ ہرفسا تعلیم ءِ شون تننگالمی ءِ۔ بلوچستان اٹی ورنا چین انا آخبت ءِ روشنا کننگ کن بھلو وارخواہی ارے۔گرج دا ہیت انا ءِ کہ ورنا چین تعلیم دوئی کراس دافتیان فائدہ ہرفے۔ قائمقام صدر پارے کہ بلوچستان قدرتی سیلہ غاتیان شُپ ءِ۔ و سی پیک ڈٹ آن بلوچستان نا الس خاص وڑ اٹ خوانندہ ورنا چین پبی فائدہ ہرفنگ کیک۔ تینا آخبت ءِ روشنا کننگ کن ورنا چین ءِ بڑزکو کہولی تعلیم دوئی کروئی تمک۔