زندان نا ڈائری 2 (اولیکو دزگیری)

ہموزدے سال 1973ئ، اگست نا تُو انا بیست تاریخ ئس۔ بلوچ اسٹوڈنٹس آرگنائزیشن و پشتون اسٹوڈنٹس فیڈریشن نا باسک آک سہب اتون دہ یانزدہ بجہ سے آ سائنس کالج کوئٹہ نا گیٹ انا مون آ مچ مننگ نا بناءِ کریر۔ سائنس کالج نا ہڑتوم آ گیٹ آتا مون آ پولیس و فیڈرل سیکورٹی فورس نا بھلو نفری اس ڈنڈا، توفک، و آنسو گیس انا شیل آتیان شُپ سلوک ئس۔ دا برانز اٹی ننا سرکڑدہ غاتیٹی گلزار احمد بادینی، ہرا سائنس کالج کوئٹہ یونین نا نائب صدر ہم ئسکہ، کل آن مونی ئس۔ و محمد عمر مینگل ہرا ڈگری کالج کوئٹہ نا طالب علم اس ئس، پیدوار راہشونی کڑد ادا کننگ ئسر۔ ای ہموتم اسپیشل ہائی اسکول کوئٹہ ٹی دہمیکو جماعت اٹی خواناٹہ۔ ننا اسکول یونٹ ہمو دے تیٹی بھاز فعال و متحرک ءُ کڑد اس ادا کریکہ۔ عبدالقیوم شاہوانی ننا یونٹ سیکرٹری ئسکہ۔ اسکول نا ایلو متحرک انگا طالب علم آتیٹی لعل محمد بنگلزئی، سعید احمد قمبرانی، ولی محمد لہڑی، رحمت اللہ جتک، ظہور احمد شاہوانی، کنا ایلم عبدالسلام و قاضی جلال الدین اسک اوار ئسر۔ ہمو دے تیٹی برانزی تحریک اٹی ننا اسکول نا یونٹ کل آن مونی ئس۔ کالج آتیٹی خوانوک بلوچ اسٹوڈنٹس آرگنائزیشن نا سرکڑدہ غاک زندان تیٹی ئسر، یا نراسر۔ تنظیم نا زمواری نن جونیئر آتا کوپہ غاتیا بس۔ ہموزدے نن اسکول آن جلوس نا وڑ سائنس کالج آ بسن۔ ننا اسکول سائنس کالج آن نیم کلو میٹر اسے نا مُری آ ئس۔ ہراتم برانزی طالب علم آتا اسہ بھلو کچ اس سائنس کالج نا مین گیٹ انا لان اٹ مچ مس، تو برانزی نعرہ غاتا چرکاو مس۔ طالب علم آتا مچی لان آن مین گیٹ انا کنڈ آ مون کرے، کالج گیٹ آن داپار طالب علم آک برانز کننگ ئسر۔ و گیٹ آن ایپار پولیس و سیکورٹی فورس آتا نفری سلوک ئس۔ نعرہ غاتا چرجوئی برجا ئس کہ فیڈرل سیکورٹی فورس و پولیس نا بھلا نفری پٹیل روڈ نا رہی انا سائنس کالج نا ارٹمیکو گیٹ آن کالج نا تہٹی پترینگا۔ کالج نا تہٹی پترینگ تون فیڈرل سیکورٹی فورس ناﺅچہ کرے، و پولیس نا ڈنڈا بردار آ نفری ننے آ جلہو کرے۔ نن پدی چَک ہڑسان تو مین گیٹ آن پولیس نا پین بھلو نفری اس پترینگا۔ پولیس و ایف ایس ایف نا ڈرامائی وڑ اٹ ننے پلویڑ کننگ ننا مچی ٹی ہلہلہ ئی اس تالان کرے، لٹ کاری مرسا ہنا، منہ آنسو گیس انا شیل خسنگار، منہ طالب علم اس ہمو جاگہ غا ہلنگار، ننا مچی ٹولی تیٹی بشخنگاسس۔ طالب علم آک دزگیری آن بچنگ کن دانگ اینگ نرارہ، دا اناگت آ جلہو ننے سنبرینگ نا وار تتو۔

دا ہڑدڑ نا وخت آ ای نرسا سائنس کالج نا ایڈمن بلاک نا پد انا فٹ بال گراﺅنڈ نا کنڈانا دیوال اسکان سر مسٹ۔ پولیس نا منہ سپاہی کنے ہلنگ کن کنا رند اٹ ئسرہ۔ ہراتم کہ ای دیوال آ لگنگ کن کوشست کریٹ تو پد آن پولیس آک نت تیٹ ہلسا شیف چکار، و ڈغار اٹ خلکر کنے۔ ہنداخسے ٹی پولیس نا منہ پین سپاہی ہم سر مسر۔ و کنے آ لٹ کاری نا بناءِ کریر و کنے تین تون ہرفیر دریر، و گیٹ آن پیشن سلوک آ گاڈی ٹی سوار کریر۔ گاڈی ٹی منہ سنگت ہرا مہالو آن پولیس نا دوٹی تماسر، ساڑی ئسر۔ و منہ سنگت اسے لٹ ترسا اوفتے گاڈی ٹی سوار کننگاکہ۔ دا دزگیر مروک آتا تعلقداری بلوچ اسٹوڈنٹس آرگنائزیشن و پشتون اسٹوڈنٹس فیڈریشن آن ئس۔ بلوچ اسٹوڈنٹس آرگنائزیشن آن تعلقدار طالب علم آتیٹی ای، حبیب جالب، ولی محمد لہڑی، شاہ محمد، محمد حسن سرپرہ، پشتون اسٹوڈنٹس فیڈریشن نا راہشون تیٹی محمد کریم اچکزئی، و یونس کاسی اسک اوار ئسر۔ نن کل ءِ گاڈی ٹی تولنگ آن پد گاڈی ژونگ ژونگ کرسا راہی مس۔ اسہ اِرا وَل کننگ آن پد پولیس اسٹیشن آ ہنا سلیس۔ ننے گاڈی آن دڑفیر۔ سٹی پولیس اسٹیشن نا حوالات، ہراٹی مہالو آن مارکر فیکٹری نا برانزی مزورکار آک تموک ئسر، دریر۔ اوڑے ننے آن اسہ اِرا طالب علم اسے جتا کرسا ننے ولدا گاڈی ٹی تولفیر، ولدا گاڈی غار غیر اٹ اسٹارٹ مس، ننے اِرٹ اِرٹ مسٹ مسٹ آ چندی تھانہ غاتیٹی دڑفیر، اخیر کنے ڈسٹرکٹ جیل کوئٹہ نا پد انا صدر تھانہ نا حالات اٹی بند کننگا۔ صدر تھانہ نا کنا رہی انا حوالات اٹی آغا عبدالظاہر احمد زئی ہرا مہالو آن بند ئس، کنے بیا بخیر کرے۔ زرہ سے آن پد ننا اسہ راہشون سنگت، گلزار احمد بادینی و اونا اسہ پین تینائی سے ہم صدر تھانہ ٹی ایسر حوالات اٹی بند کریر۔ گلزار احمد بادینی ہرا ہمو جاگہ غا دزگیر متویسس، اودے تینائی سے تون اوار رکشہ ٹی تولوک سریاب آ ہننگ نا وخت آ پلویڑ کننگاسس، و دزگیر کننگاسس۔ و اودے اونا تینائی تون اوار صدر تھانہ ٹی ایسر نن تون اوار بند کریر۔ آغا عبدالظاہر احمد زئی تھانہ نا اسہ سنتری اس نن کن چا بٹنگا، ننا و آغا عبدالظاہر نا حوالات جتا ئس۔ ننا حوالات نا نیام اٹ اسہ دیوال اس ئسکہ۔ حوالات نا جنگلہ غاتیان ہم نن تین پہ تین ہیت کرسا کرینہ۔ دے کی ہلنگ آن مست ننا اِلہ سینیٹر میر عبدالواحد کرد آغا تون ملنگ کن تھانہ غا بس، اودے کنا دزگیری نا سما اَلوکہ۔ آغا اونا چکار ءِ کنا کنڈ آ کرے، او ننا حوالات نا جنگلہ نا کنڈ آ بس، نن تون سلام دعا کرے۔ ننے جیرت و است بڈی اٹ زندان اٹ دے تے گدریفنگ نا پارے، و جیب آن منہ روپئی کشا کنے آ مریفے۔

پگہ غا پولیس نا اسہ وین اس بس، آغا عبدالظاہر احمد زئی ءِ حوالات آن کشا و جیل جوڈیشل کننگا۔ نن منہ دے پین حوالات اٹ بند مسن۔ اسہ دے بندی تا بھلا گاڈی بس، ننے حوالات آن کشار گاڈی ٹی سوار کریر۔ گاڈی ٹی مہالو آن منہ دزگیر سنگت ساڑی ئسر۔ ہرافتیٹی بی ایس او نا ولی محمد لہڑی، محمد حسین سرپرہ، شاہ محمد نوشکے والا، و بلوچ طالب علم آتیان بیدس محمد کریم اچکزئی و یونس کاسی اسک ہم سوار ئسر۔ حبیب جالب ءِ تھانہ غان یلہ کننگاسس۔ ننا گاڈی ٹی تولنگ تون پولیس گاڈی ژونگ ژونگ کرسا اسٹارٹ مس، و ڈسٹرکٹ جیل کوئٹہ نا کنڈ آ مون کرے۔ اسہ اِرا وَل اس کننگ آن پد زرہ سے آن پد گاڈی ڈسٹرکٹ جیل کوئٹہ نا بھلا درگہ نا اسُل مون آ سلیس۔ ننا مون آ جیل انا بھلا دیوال آک بڑز مون آہنی آ پھاٹک تون گون جک سلوک ئسر۔ ننا گاڈی آن دڑنگ تون جیل انا پھاٹک ملنگا، و ننے دا پھاٹک آتا تہٹی مون نا بشخ اٹ تولفنگا۔ داڑے ننا کاغد آتا جانچ ءِ کننگا، ولدا ننا تلاشی ءِ ہلنگا، دا کاریم آن پد ننے جیلر نا مون آ پیش کننگا۔ جیلر تینا خن تے ننے ٹی خلک، ننا سرسری جاچ اس ہلک، ولدا سپاہی تے پارے دافتے ”چکر“ آ دبو۔

ہفتئی تلار

تاک: 28

18-24 July 2020

پنہ: 02