اِرا ملکی شاری مننگ آ خصوصی کمکار اینک کننگ مفک، اسلام آباد ہائیکورٹ

اسلام آباد (اے پی پی) اسلام آباد ہائی کورٹ نا چیف جسٹس اطہر من اللہ ریمارکس تسنے کہ وزیراعظم ءِ کمکار تخنگ نا ہم اختیار تفن تو نظام امر چلینگک۔ پنچ شنبے نادے آ اسلام آباد ہائی کورٹ نا چیف جسٹس اطہر من اللہ وزیراعظم نا اِرا ملک انا شاری خصوصی کمکار آتے عہدہ غاتیان اینک کننگ نادرخواست نا سماعت ءِ کرے۔ عدالت درخواستءِ سماعت نا قابل مننگ آ فیصلہ ءِ ڈک کرے۔ جسٹس اطہر من اللہ ریمارکس تس کہ پار آئین اٹ ہراڑے لکھوک ءِ کہ وزیراعظم نا کمکار آک اِرا ملکی شاری مننگ کپسہ۔ وزیراعظم ءِ ہراتم الس گچین کیک تو اوڑا بھلو زمواری اس مریک، او اگہ تینا زمواری تے پورو کننگ کن کس اسے نا کمک ءِ ہلے تو داٹی انت خرابی اسے۔ اگہ اودے داخہ اختیار ہم تفن کہ او کس اسےکمکار تخے تو امر نظام چلینگک۔ درخواست گزار وکیل اکرم چوہدری پارے کہ آئین نا آرٹیکل 93 نارداٹ بیرہ پنچ سلاہکار مقرر کننگ مریک۔ جسٹس اطہرمن اللہ پارے کہ آرٹیکل 93 سلاہکار آتا بابت ءِ، خصوصی کمکار آتا بابت اف، آئین اٹ دا نشان ایتر ہراجاگہ غا لکھوک ءِ کہ کمکار اِرا ملکی شاری مننگ کپک۔ درخواست گزار پارے کہ آئین اٹ داوڑ ہچ نوشتہ اف ولے رولز آف بزنس اٹ دا پابندی ساڑی ءِ۔ رول پانزدہ ٹی داوڑنا پابندی ساڑی ءِ۔ جسٹس اطہر من اللہ پارے کہ رول 15 تو 2010 اٹی حذف کننگانے۔ عدالت درخواست نا قابل سماعت مننگ آ فیصلہ ءِ ڈک کرے۔ درخواست گزار عدالت آن خواست کرے کہ کابینہ نا 19 گچین مفروک باسک آتیان چار خصوصی کمکار اِرا ملکی شاری اریر، ہرافتے برخاست کننگ نا پرمان کننگے۔