شمس ندیم (برج سرطان)۔

شمس ندیم نا ودی دے (6 جولائی 1980ء) برج ”سرطان“ (Cancer)، حاکم استار ”قمر“ (Moon)، دورانیہ ”21جون آن 21 جولائی، ہجی حرف آک ”ح، ھ“، مزاجی اثر ”جذباتی، پر اسرار و مقناطیسی“ ہم تَب برج آک ”عقرب، حوت“، بے تعلق برج آک ”حمل، میزان، جدی“، ہندا وڑ انا ایلو برج آک ”ثور، جوزا، اسد، سنبلہ“، تَب آن چَپ برج آک ”قوس، دلو“ کلید وجود ”خاہوت“، برج انا تَب ”دیری“ (آبی)، منطقہ البروج ”4“، پیشن نا ہزوہ ”سینہ“، تہہ انا ہزوہ ”معدہ“، برج انا نشانی ”مش انا میڷ“، ودی دے ئی عدد ”2“، لائف پاتھ عدد ”4“، مرکب عدد ”36“ فطری گچین کاری نا اثر ”جسمانی“ ءِ۔

شمس ندیم (6 جولائی 1980ء) نا برج ”سرطان“ ءِ۔ فلکیات نا چاہندار آک پارہ کہ برج سرطان والا بندغ آک تصوراتی فطرت نا خواجہ مریرہ۔ برج سرطان نا حاکم استار قمر ءِ۔ مریخ ہم داڑا راج کیک۔ ہندا سوب آن دا بندغ آک بھاز جیرتی، قومی معاملہ غاتے ٹی بھاز بے خلیس مریرہ۔ برج سرطان والا بندغ آک ذہین و باذوق مریرہ۔ رفاعی و فلاحی کاریم تے ٹی اُست انا ہُب اٹ بشخ ہلیرہ۔ ایلوفتا کمک ءِ کرسا خوشی محسوس کیرہ۔ ولے ایلوفتا سیبو ءِ ہلنگ دوست اف تا۔ فلکیات نا چاہوک آک دا ہم پارہ کہ برج سرطان والا بندغ آک تینا بروک آ وخت ءِ سوگو جوڑ کننگ کن جہد و کوشست کرسا کیرہ۔ برج ”سرطان“ والا بندغ آک بھاز بھلو اُست تخرہ، ولے وخت وخت اس چڑنگ و بد دننگ نا ہم گواچی مریرہ۔ تینا نظریہ نا رکھ اکن ہچ ءُ زور اسے آ چکار کپسہ۔ براہوئی زبان نا ایلو شاعر ادیب آتے ٹی ڈاکٹر ایم صلاح الدین مینگل نا برج ہم ”سرطان“ ءِ۔

شمس ندیم نا لائف پاتھ عدد”4“ ءِ۔

(6-7-1980– 6+7+1+9+8+0=31 –3+1=4)

دا لائف پاتھ عدد ”تعمیر“ (Builder) نا عدد اسے۔ دا عدد نا کلیدی لوز آک ”حقیقت پسندی و بھاز محنتی“ ءُ۔ تینا کاریم اٹی بھاز منظم مریک، کاریم ءِ شین اٹ کیک۔ پتدار مریک۔ زندگانی نا اولیکو بشخ خواری نا سوب مریک، ولے تینا محنت اٹ تینا زندگانی نا کسر ءِ بدل کیک۔ براہوئی نا ایلو ادیب شاعر آتے ٹی ڈاکٹر غلام سرور پرکانی، سید غریب شاہ انجم، نادر شاہوانی، رحیم زام اس تا ہم لائف پاتھ عدد ”4“ ءِ۔

شمس ندیم نا مرکب عدد ”36“ ءِ

(Shams Nadeem 3+5+1+4+3=16 –5+1+5+5+4=20– 16+20=36)

علم الاعداد نا چاہندار آتا رد اٹ دا عدد ”36“ جوان اِنگا عدد آتیان ءِ۔ دا مرکب عدد ہر ڈٹ ءِ بھاز جوانی اٹ سرسہب کننگ نا وس تخک۔ مفہوم نا رد اٹ مرکب عدد ”27“ آنبار ءِ۔ مرکب عدد ”27“ طاقت، عزت نا نشانی ءِ۔ دا مرکب عدد والا بندغ آک گیشتریکا دانشور مریرہ۔ براہوئی زبان نا ایلو مرکب عدد ”36“ والا شاعر ادیب آتے ٹی پروفیسر غلام دستگیر صابر، ڈاکٹر غلام سرور پرکانی اس تا مرکب عدد ”36“ ءِ۔

شمس ندیم نا ودی دے ئی عدد ”2“ ءِ۔ علم الاعداد نا چاہوک آتا رد اٹ دا عدد (2) دے اکن کاریم اٹ بریک۔ بے باور حالیت آتا نمائندگی ءِ کیک۔ فرض شناس مریک، لس وڑ اٹ برام آن پد زیات زمواری اٹ زند ءِ گدریفنگ نا خواجہ مریک۔ بندغی نا ڈکھ و ویل اٹی بریک۔ ودی دے ئی عدد ”2“ تخوک آ جہانی شخصیت آتے ٹی پنی آ جرنیل ہٹلر (جرمنی)، پنی آ جرنیل مسولینی (اٹلی) ہم اوار ءُ۔

شمس ندیم نا فطری گچین کاری نا اثر ”جسمانی“ ءِ۔ اونا پن نا ”جسمانی“ بشخ انا خانہ ٹی ہرا حرف آک ءُ، اوفک M,D,E,E,M، ذہنی خانہ ٹی H,A,N,A، و جذباتی خانہ ٹی ”S,S“ وخت اس کہ وجدانی خانہ خالی ءِ۔ ”جسمانی“ فطری گچین کاری تخوک آ بندغ آک بھلو سوچ و فکر اسے ٹی مننگ نا جاگہ غا عملی کاریم کننگ آ باور کیرہ۔ اوفتا وس و واک اٹی گیشتریکا مریک۔ اوفک مدام مشغول مریرہ۔ براہوئی زبان نا ایلو ”جسمانی“ فطری گچین کاری تخوک آ ادیب آتے ٹی احمد نعیم، پروفیسر نیلم مومل، رحیم زام اسک بریرہ۔

ہفتئی تلار

تاک:04

28-22 جنوری 2022ء

پنہ: 06