یار جان بلوچ۔۔۔۔۔ تعلیم بے کار ہنپک

 

اینو پگہ سوشل میڈیا نا دور ءِ و ای پک پاننگ کیوہ کہ ہرا بندغ نا خواری تا بھرم نا ہیت ءِ ای کننگ خواوہ، خوانوک آتیان کل یا گڑا بھلو کچ اس دا بابت معلومدار مرو ءِ۔ دا پن کیمبرج یونیورسٹی نا کل آن کم سَن آ سائنسدان یار جان عبدالصمد نا ءِ۔ یار جان بلوچ نا پن سوشل میڈیا ٹی ہندن تالان ءِ کہ ہر بلوچ اوڑا گمر کننگ اٹی ءِ کہ او ننا ڈیہہ آن ہنوک ءُ اسہ ہندن ءُ بندغ اسے ہرا تعلیم نا پڑ آ بھلو سرسہبی اس دوئی کرینے۔ یارجان نا بابت ویب آ کیہی نوشت آک ساڑی اریر، و اوفک انگریزی اردو و ایلو بولی تیٹی ءُ، ای خواہسٹہ کہ اونا درستی راستی ءِ تینا بولی ٹی ہم کیو، و اسہ استاد اسے نا حیثیت اٹ تینا طالب علم آتے علم انا روشنائی آن پامدار کننگ کیو۔ گڑا ای دا رد اٹ یار جان نا بابت گڑاس معلومداری تے دوئی کرسا تینا بولی ٹی ہڑسنگ نا کوشست کرینٹ۔ 

یار جان عبدالصمد نا تعلقداری بلوچستان نا علاقہ کیچ آن ءِ۔ داڑے اسہ علاقہ اسے بلیدہ پارہ، او ہمونا باتی اسے۔ دا علاقہ نا بندغ آک تغ تیٹی ہم خنتنو کہ اوفتا علاقہ نا ورنا اس کہ، ہرافک بیرہ زمینداری کریرہ، و اسہ زمیندار اس کہ مشکل اسے ٹی تینا گزران ءِ کریکہ، ہمونا مار کاہک کیمبرج یونیورسٹی برطانیہ نا خلائی ٹیکنالوجی ٹی کاریم کروک آ کل آن چنکا سائنسدان جوڑ مریک۔ نئے بیرہ دا بلکن کل آن چنکا سینئر ریسرچ سائنسدان و فیلو مننگ نا شرف ءِ ہم تینا پن آ کیک۔

جند تے ہمو وخت آتے یات کرسا پاہک کہ کنا تعلقداری اسہ ہندن ءُ علاقہ اسے آن ءِ کہ اوڑے تعلیم نا زیات رواج اف۔ بلکن ہرافک کہ چٹھی اس نوشتہ کیرہ یا خواننگ کیرہ اوفک ہم ہور تیا حساب مسرہ۔ کنا جند انا لمہ باوہ اسکول نا مون ءِ ہم خنتنو۔ ولے اوفتا است اٹ دا جوزہ ئس کہ نن خوانن، دا راست ءِ کہ نن زمیندار اُن، ننا زمینک ہم بھاز ءُ، ولے خشکاوہ مننگ نا سوب آن اوفتیان اوخس فصل مفک کہ اوخس مروئی ءِ تا۔

کنا لمہ جیجا کنا گرج آتے پورو کننگ کن انت آن انت خواری کشانے، ای اوفتے بیان ہم کننگ کپرہ۔ کنا باوہ جان ءِ علامہ اقبال نا چندی شیئرک یات ئسر۔ او ہر وخت کنے و کنا ایلم تے اوفتے بنفیکہ۔ تاکہ نن نزور مفن، و جیرت ننا برجا سلے۔

انتئے کہ ای خواننگ اٹی ایلو کل ایلم تیان زیات کوشست کریٹہ، تو کنا باوہ کنا خاطر آن کل ءِ ہرفے بس کراچی نا علاقہ لیاری ٹی جہی مس۔

اولیکو وار کہ ای کراچی آ بسٹ تو حیران تیان حیران سلیسٹ، دا چَٹ پوسکن و بھاز جتا ءُ دنیا اس ئس۔ ہر نیمہ غا گاڈی، ٹریفک، لیٹ آک ئسر۔ ننکان کہ ای دا لیٹ آتے خناٹہ تو کنے لگاکہ کہ ای روشنائی تا شار اسے ٹی بسنٹ۔

لیاری ٹی اسہ اردو میڈیم اسکول اسے ٹی داخل کریر کنے۔ ولے بھاز زُو ننے اندازہ مس کہ انگریزی ہیل کننگ آن بیدس شون ہلنگ مننگ کپک۔ 

ہراتم کہ دا ہیت ءِ پہہ مسٹ گڑا باوہ ءِ تینا پاریٹ کنے انگریزی میڈیم اسکول اسے ٹی داخل کر۔ گڑا باوہ کنا کنے کلفٹن کراچی نا اسہ بھاز پنی ءُ اسکول اسے ٹی داخل کرے۔ راستکی دا ئس کہ دا اسکول اونا وس آن پیشن ئس، ولے کنا شوق ءِ خنا، ہموڑے شاغا کنے۔

ای اسہ پاوالی ءُ چنا اس ئسٹہ، شاری زند انا وڑ و ڈَول تے زیات پہہ متوٹہ۔ ولے باوہ نا تروک آ اعتماد و زند اٹ گڑاس جوڑ مننگ نا حوصلہ کن تون اوار ئس۔ داخلہ نا وخت آ پرنسپل گودی کنا باوہ نا مون آ کن تون انگریزی ٹی گپ و تران ءِ بنا کرے۔ انٹرویو آن مست باوہ کنا پارے تے کہ نن داخلہ کن دا سوب آن بسنن کہ چنا نا انگریزی جوڑ مرے۔ ای انگریزی ٹی ہیت تو کننگ کتوٹہ۔ ولے پہہ مسٹہ۔ کہ انت پارہ۔ 

اولیکو سوج ہندا کرے کہ پن نا دیر ءِ؟ ای اردو ٹی ورندی تسٹ تے۔ ولدا سوج کرے کہ باوہ نا انت کیک؟ ای پاریٹ کہ زمینداری کیک۔ ہندن چندی پین سوج کرے۔ گڑا سے نا ورندی تے تسٹ، گڑاس تننگ کتوٹ۔ 

کنے لگا کہ اودے کنا اردو ٹی ورندی تننگ دوست بتو۔ ای وس کریٹ پاریٹ تے کہ کنے داخل کبو، ای بھاز خواری کیوہ و انگریزی ہیل کیوہ۔ داکان پد ہم او اخیر اٹ کنے پارے کہ ”جوان دادے کہ نی ہن تینا خلق آ و تینا باوہ تون زمینداری تیٹی کمک کر۔“

دا لوز آتے بنگٹ تو کنا خن تیان خڑینک آک یلہ مسر۔ و باوہ جان کنا خن تیان تینے ڈکاکہ۔ ای پین فریشان مفر۔ او وخت آ ای ہفتمیکو کلاس نا طالب علم اس ئسٹہ۔ کنا است پنا۔ ولے کنا تربیت اٹ ہندا اوار ئس کہ اسُل انت کہ مرے حوصلہ و جیرت آن کاریم ہلوئی ءِ۔ دا ہیت ءِ سرجمی اٹ پہہ مننگ آن گڈ کہ انگریزی ہیل کننگ المی ءِ، ای باوہ ءِ پاریٹ کہ ہندا لیاری ٹی چندی انگریزی میڈیم اسکول آتا پوسٹر آک خلوک ءُ، کنے ہنداڑے داخل کبو۔ 

انگریزی ہیل کننگ کن تینٹ کوشست ءِ بنا کریٹ۔ وخت اس کہ انگریزی اخبار اس خنوسٹ، خواناٹہ تے۔ وخت اس گرائمر نا کتاب اس خنوسٹ، خواناٹہ تے۔ اسکول نا استاد آک ہم انگریزی پہہ کننگ اٹ مدت کریرہ۔ دا ئسکہ تو چنکو اسکول اس، ولے استاد آک تے بھاز خواری کش ئسر۔ ننے است انا ہُب اٹ خوانفیرہ۔

ہراتم کہ میٹرک نا امتحانک بنا کریر، کل کنے ہندا سلاہ تسرہ کہ نقل کر، ولے ای پاریت ای نقل کپرہ۔ اخس کہ نمبر ہلیو، تینا خواری اٹ ہلیوہ۔ کنا لمہ جیجا پاریکہ کہ خواری نا بھرم وخت اس ہم زیان مفک۔ گڑا ای خناٹ کہ او راست پاریکہ۔ انتئے کہ کنا میٹرک نا رزلٹ ’اے ون‘ گریڈ اٹی بس۔

میٹرک 2003ء اٹی کریٹ، ہندا سال انا اخیر اٹی ڈی جی سائنس کالج اٹی داخلہ ہلنگ کن ہچ ءُ خواری اس کروئی تمتو۔ و اسہ ہیت اس کہ ڈاکٹر عبدالقدیر خان ہم ہندا کالج نا طالب علم اس مسنے۔

ایف ایس سی نا وخت آ ای ٹیوشن ہم خوانفیٹہ، انتئے کہ ای تینا تعلیم نا کل باریم ءِ تینا باوہ غا شاغنگ کتوٹہ۔ اسہ سوب اس تے دا ہم ئسکہ کہ کنے خواننگ و خوانفنگ، و پٹ و پول نا بھاز شوق ہم ئس۔ کنے لگاکہ کہ ای خوانفو تو بھاز ہیل کننگ کیوہ۔ و مس ہم ہندن۔

ایف ایس سی نا چرجوئی ہندن برجا ئس۔ امتحان نا نتیجہ بس تو داڑے ہم کنا ’اے ون‘ گریڈ ئسرہ۔

ایف ایس سی آن پد غلام اسحاق خان انسٹی ٹیوٹ آف انجینئرنگ سائنس اینڈ ٹیکنالوجی ٹی داخلہ کن انٹری ٹیسٹ تسٹ، تیاری کنا جوان ئس۔ ہندا سوب آن سد درسَد اسکالر شپ تون اوار داخلہ رسینگا کنے۔

ایلمک کنا خواننگ ءِ اِلار، او چنکو چنکو روزگار کریرہ۔ ہموکان جوان ءُ کٹیا اس تا مسکہ۔ کنے تُو پہ تُو کنا خڑچ ءِ ہم مون تسرہ۔ ہنداسوب آن ای بھاز دلجمی اٹ خواناٹہ۔ ایلو پارہ غان تعلیم نا فیس آک ایہن ہم اسکالر شپ آ ئسرہ۔ 

مطلب کہ ہفتمیکو کلاس اٹی ہراتم کہ نن کراچی آ بسن، ہمو مچ ویل آک ایف ایس سی و یونیورسٹی ٹی داخلہ ہلنگ آن گڈ چٹار۔ و سرسہبی نا سفر بنا کریسس۔

اسہ راستکی اس دا ہم ارے کہ اینو اگہ ای پٹ و پولی ءُ کاریم کیوہ، یا دا پارہ غا رجحان ءِ کنا تو کل غلام اسحاق خان اسٹی ٹیوٹ اٹی پروفیسر فضل احمد خالد (ستارہ امتیاز) نا رغامنگ و حوصلہ افزائیک ءُ کہ ای یونیورسٹی ٹی فیصلہ کریٹ کہ کنے پٹ و پول نا پڑ آ ہنوئی ءِ۔

یونیورسٹی آن 2009ء اٹی فارغ مسٹ، و ہند اسال آ اینگرو پولیمر اینڈ کیمیکل کراچی ٹی ملازمت نا بناءِ کریٹ۔ اسہ سال اس نوکری کریٹ، ہندا نیام اٹ چندی ملکی و پیشن ملکی اسکالر شپ پروگرام و ادارہ غاتتون رابطہ کرسا کریٹ۔ ہندا وخت آتیا کنے جاپان، کوریا، کینیڈا، جرمنی، امریکہ و ابو ظہبی آن اسکالر شپ آک آفر مسر۔

ایم فل و ریسرچ کن کنے کل آن گچین اخیر خلیفہ یونیورسٹی ابوظہبی آن آفر رسینگا۔ ہندن کہ داڑتون امریکہ نا ایم آئی ٹی یونیورسٹی نا کمک ہم ئسکہ۔ ارٹمیکو ہیت کہ ریسرچ اسکالر شپ تے اسہ جوان ءُ تنخواہ اسے نا کچ اٹ ئس۔ ہندا سوب آن ایلو کل انا جاگہ غا ای دادے امنا کریٹ۔

داکان گڈ اسکالر شپ آ یونیورسٹی آف ٹوکیو تون اوار اوار چندی پیشن نا ادارہ غاتتون ریسرچ کریٹ، و تینا پی ایچ ڈی ءِ پورو کریٹ۔

پی ایچ ڈی نا تحقیق گرافین مادہ نا زی آ ئس، کہ اونا کاریم اٹ اتنگ آن چیدی گڑاک جوڑ مسرہ۔ دا ریسرچ چندی پیشن نا اخبار و رسالہ غاتیٹی شینک مس۔ 

ہراتم کہ کنا ریسرچ شینک مس تو کنے امریکہ، ابوظہبی، برطانیہ و ٹوکیو آن چندی آفر آک مسر۔ کنا ریسرچ کیمبرج یونیورسٹی نا اسہ بھاز پنی ءُ سائنسدان اسے بھاز دوست بس، تو کنے ہموڑے نوکری نا آفر کرے۔ ایہن تو تنخواہ و ایلو آسودہی تا حساب آ ابوظہبی نا آفر کل آن گچین ئس، ولے داسہ کنا مزل تنخواہ اَلو۔ بلکن کنے اسہ پوسکن ءُ مزل اسے آ سر مروئی ئس۔ ہندا سوب ءِ کہ کیمبرج یونیورسٹی والا آفر ءِ قبول کریٹ، انتئے کہ کنے پٹ و پول نا پڑ آ کاریم کروئی ئس۔ و مننگ کیک مچ آ دنیا غان کل آن زیات وارخواہی و آسراتیک کیمبرج یونیورسٹی ٹی دوئی مننگ کریرہ۔ و نیوٹن و اسٹیفنگ ہاکنگ نا وڑ انگا سائنسدان آک ہم داڑے کاریم کرینو۔ 

اِرا سال اسکان کیمبرج اٹی ریسرچ سائنسدان نا وڑ اٹ کاریم کننگ آن پد کنے سینئر ریسرچ سائنسدان نا حیثیت اٹ کاریم نا وار رسینگا۔ کنے سما اف ولے پارہ کہ کیمبرج اٹی ریسرچ سائنسدان آتے کن سینئر سائنسدان نا درجہ ءِ دوئی کننگ کن اِرا سال نا وخت بھاز کم مریک۔ و کنے دا ہم لگک کہ اوڑے کاریم کروک آ سینئر سائننسدان آتیٹی کل آن کنا عمر کم ءِ۔

کیمبرج اٹی ہننگ آن پد چندی یورپی کمپنی و اسپیس ایجنسی تتون اوار کاریم کرسا اسپیس ٹیکنالوجی تون گنڈوک ازباب جوڑ کرین۔ دا ازباب آتا کڑد و ہُننگ کن چندی وخت آتیا خلائی جہاز و مصنوعی سیارہ لانچ کینہ۔ ہرافتیٹی پیرایولک فلائٹ، ساؤنڈ راکٹ، و ایلو اسپیس کرافٹ آک اوار ءُ۔ دن نن گرافین ءِ اولیکو وار خلا ٹی دننگ نا وارخواہی ءِ ہم دوئی کرین۔ 

چندی پین پٹ ت پول آک برجا ءُ، ہرافتیٹی سینسر آن بیدس خلا ٹی اگہ جون ٹھپی مرے تو ہمو ٹھپ ءِ امر پر کیرہ۔ داڑا ہم کاریم کننگ اُن۔ داکان بیدس پاکستان نا طالب علم آتے کن برطانیہ نا منہ تنظیم آتتون اسہ پروجیکٹ اس بنا کرسا اُن۔ ہراٹی اوفتے سیٹلائٹ نا آسراتی تننگ نا کوشست کینہ۔ اگہ وار رسینگا کنے تو تینا ملک اکن کاریم کننگ ءِ تین کن گمر اس تکوہ۔

ہفتئی تلار
تاک: 46
28 November- 04 December, 2020
پنہ: 07