بارڈر مینجمنٹ سسٹم ءِ پین گچین کننگے، عمران خان

اسلام آباد(اے پی پی) وزیراعظم عمران خان پارینے کہ حکومت آزاد و رکھوک بارڈر آ یخین تخک، بارڈر آتے رکھ کننگ تون اوار اوار واپاری سرجز خاص کر پاکستان و اوغانستان نا نیام اٹ واپار نا مون آ دننگ کن عملی گام گیج کننگے۔ اوداخیال آتا درشانی ءِ دوشنبے نادے آ ساڑی آبارڈر مینجمنٹ سسٹمءِ پین فعال و گچین کننگ نا بابت بڑزکو کہولی دیوان نا کماشی ءِ کرسا کرے۔ دیوان اٹی بنجائی وزیر ہوابازی غلام سرور خان، بنجائی وزیر حوالکاری و شینکاری شبلی فراز، وزیر داخلہ بریگیڈیئر ریٹائرڈ اعجاز احمد شاہ، بنجائی وزیر بندرگاہیں و جہاز رانی سید علی حیدر زیدی و خصوصی کمکار معید یوسف تون اوار عسکری و سول کمامدارآک بشخ ہلکر۔ دیوان ءِ معلومدار کننگاکہ 10 جتا بنجائی وزارت و صوبائی حکومت آک بارڈر مینجمنٹ تون وابستہ ءُ ولے بنجائی کہول آ بارڈر نا باندات آتے ہُننگ کن ہچ ءُ مرکزی ادارہ اس ساڑی اف۔ دیوان ءِ حوال تننگاکہ پاکستان اٹی ڈغاری(زمینی)، ہوائی و بحری کسر تیان پترینگوک آ بندغ آتا سرجم آتے اسہ جاگہ غا یکتا کننگ نا سخت گرج ءِ۔ دیوان ءِ چندی بارڈر کراسنگ آ نصب نظام و بارڈر فنسنگ آ مروک آ کاریم نا پیش رفت آن ہم معلومدار کننگا۔ دیوان ءِ پاننگاکہ غیر کانودی کسر تا بند مننگ و اسمگلنگ نا توننگ آن ملکی زرگزران ءِ اسہ سال انا وخت اٹی ارب آ روپئی نا فائدہ مسنے۔ وزیراعظم وزارت داخلہ ٹی ایڈیشنل سیکرٹری نا سرپرستی ٹی بارڈر مینجمنٹ سسٹم کن اسہ خصوصی ڈویژن اس جوڑ کننگ نا پارت کرے۔ وزیراعظم غٹ تعلقدار ادارہ غاتے وخت آ انفارمیشن/ڈیٹا شیئرنگ نا ہم پارت کرے۔ وزیراعظم پارے کہ حکومت آزاد ولے رکھوک بارڈر آ باور کیک۔ اوپارت کرے کہ بارڈر آتے رکھوک کننگ تون اوار اوار واپاری سرجزخاص کر پاکستان و اوغانستان نا نیام اٹ واپار نا مون آ دننگ کن عملی گام گیج کننگے۔