تبدیلی(انشائیہ)

ڈاکٹر سعید تبسم

0

Get real time updates directly on you device, subscribe now.

انسان بدل مریک، ورنا ءِ تو پیر مریک، جوان ءِ نزور مریک، زیبا ءِ حسن اودے یلہ کیک۔ زمانہ بدل مریک۔ وخت اس غم ءِ وخت اس خوشی ءِ۔ وخت اس ناجوڑی ءِ، وخت اس محبت ءِ۔ موسم بدل مریک۔ وخت اس ہتم نا رنگ ءِ ہر پارہ غا گواڑخ، گلاب، سوسن، سنبل نا لوڈوک ءُ، زیبائی ءِ، پھل آتا زباد ءِ۔ ہمو ہی ڈغار آ وخت اس بارن آ بوچ آک ءُ، وخت اس باسنی است ءِ استخوان ءِ ہشک، وخت اس ہمودے یخ اٹی بھاز دوست بریک۔ کس پاہے داٹی ہچ ءُ اثر اس اف۔ جوان جوان ننا ہَڈ آک باسرہ، کہ دے ننے جمر نا پد اٹی چنا تیانبار گوازی کرسا ڈکک، ہمودے کہ باسنی ٹی ہچ ہنپک۔ ہمودے چلہ ٹی دُو تفک۔ دا کل زندگی نا ہنینی، زندگی نا رونق آتا بشخ آک ءُ۔ اینو نا بندغ آتے بدل مننگ نا بھاز شوق ءِ۔ سوشل میڈیا غا ہُرسا کر تو شام انا آئی ڈی فوٹو پین اسے۔ سہب اتول بدل مرسا پین اس مریک۔ دوستی، سنگتی ہم دے دے آ بدل مرسا کیرہ۔ است آک بھاز چنک مسنو۔ وخت انا رمب بھاز تیز مسنے۔ داخہ در موسم بدل مفک، داخہ زو بندغ آک بدل مریرہ۔ اشتافی آ زمانہ بندغ آتے اسٹ بھاز اشتاف جوڑ کرینے۔ ایلو بھاز انگا رمب آتیان نفسیاتی مریض جوڑ کرینے۔ ہرا گڑاک فطرت نا اصول آتیا چلینگرہ۔ اوفتیا فطرت ہم مہربان ءِ۔ پھل آتے ہُر، درخت آتے ہُر، سمندر، دریاب، ساہدار، چک آتا بال، گلاب نا خوشبو، سوسن نا نازرکی، گواڑخ نا بشخندہ، دا کل فطرت نا درشانی ءِ کرسا ءُ۔ ہندا سوب ءِ کہ کنا دامن اٹی تروک آ گلاب ہڑدے کنے آن ارّفک ”دن مف کہ ای بدل مریو؟ دن مف کہ ای پھل انا خیال داری ءِ اِلو؟ دن مف کہ ای پھل انا شوق ءِ اِلو؟ دن مف کہ ای یپن پھل اسے کن رمب کیو؟ کنا دامن اٹی تروک آ گلاب مونجا مرسا تینا پن آتے ڈیر کے؟ انتئے کہ انسان فطرت آن مر ہنسا دنیا داری ٹی لگانے۔ پھل آتا خوشبو دا احساس آن زیات دا پسند کیک کہ پلاسٹک، ناجوڑ مروک آ پھل آک کنا ٹیبل آ مریر۔ اوفتیٹی خوشبو نازرکی مف۔ ننے ٹی احساس و مہر مف۔ ہندا تبدیلی نا نعرہ ءِ خلسا اسہ کاتی مار اس ننا حاکم جوڑ مس۔ گڑا نت انا بہا آسمان ءِ سر مس۔ سی، پن، بورہ، سوزی، سرف، سابون، تیل کل غریب نا وس آن پیش تمار۔ چنا تا پال/، دڑد انا دارو، کل انا بہا غریب نا وس آن پیشن مس۔ نسل در نسل نا خواری تا پد غریب کن ہندا مس کہ داسہ اِرغ ءِ ہم خنپک۔ منہ پین کاتی مار بش مرسا پاریر کہ داسہ ننا مخ ءِ تفبو دادے دڑفن تو تبدیلی آن مست انا زند ولدا نم کن بریک؟ 

ہیت دادے کہ تبدیلی دن زو امر چٹک، اِرا سال اٹی؟

ہفتئی تلار
تاک: 39
10-16 Oct, 2020
پنہ: 05

Get real time updates directly on you device, subscribe now.

Leave A Reply

Your email address will not be published.