لنگڑ و پنڈوک آ قوم

ہراتم ای غمگین مریوہ، تو جگجیت سنگھ انا غزل آتے بنوہ۔ ہنین ءُ باوقار ءُ توار اسے تے۔ دھن و ساز آتا وڑ و ڈَول کل آن جتا، سوز و ترنم ہنداخس کہ است اٹی بے توار دڑنگے۔ اوڑتون اوار شاعری کل آن اعلیٰ درجہ نا۔ دا غزل آتے بننگ کنا غم تے کم کپک، بلکن پین زیات کیک۔
غالب پاہک:
”درد سے خوگر ہوا انسان تو مٹ جاتا ہے غم“
ہراتم جگجیت پاہک کہ:
”وقت رہتا نہیں کہیں ٹک کر
اس کی عادت تو آدمی سی ہے“
تو غم سوز تون بدل مرسا مچ آ زند مچ آ جہان اٹ تالان خننگک۔ دیر ءِ سما ئس کہ حکومت نا جند بازار ءِ بند کیک۔ مخلوق ءِ لٹ ایتک، اُرا تیٹی بند کیک۔ ہندن ہم مروئی ئس کہ دے اٹی ہزار آ روپئی تے کٹوک آ دکاندار تینا دکان ءِ کلف کرسا اُراٹی بے روزگار تولوک ءِ۔ اسہ کنڈ آن بے روزگاری نا غم ءِ، ایلو پارہ غان چنا تا فرمائش، جنگ و جھیڑہ، مزغ خوری، دیر ءِ سما ئس کہ تین پہ تین نا کسفنگ کن ایٹم بمب اسکان جوڑ کروک آ بندغ اسہ چنکو وائرس اسے نا مون اٹی بے وس سلوک مرو ءِ۔ دنیا نا شوندار آ ملک آتیٹی مرک انا ناچ برجا ءِ۔ ہراڑے ہر شام شراب و شباب، عیاشی و ناچ ئس۔ ارب آ روپئی اسہ اسہ شام انا عیاشی ٹی چٹارہ۔ ایلو پارہ غا غریب آ ملک آتیٹی ارب آ انسانک لنگڑ خاچارہ۔
تینا تینا ملکی فائدہ کن ننا زی آ رشوت خور، نابود، ظالم بندغ آتے حکمران جوڑ کریرہ۔ ہرافک تینا مخلوق نا فائدہ غان ہم زیات اوفتا فائدہ کن کاریم کریرہ۔ ہراتم ننے آ کورونا نا عذاب بس تو حالیت دادے کہ ننا ہسپتال آتیٹی سرنج اس ہم اف۔ دڑد انا اسہ گولی اس ہم اف۔
لنگڑی پارہ کہ چل سال اسکان ہنپک۔ با انا بینگنی ختم مریک، خن انا بینگنی ختم مفک۔ نسل آتیان لنگڑ آ قوم اسُل سیر کپک۔ منہ وخت مست رپورٹ اس مون آ بس کہ بے نظیر انکم سپورٹ پروگرام نا تُو انا پانزدہ سَد روپئی نا پیسہ غاتے گریڈ 17 و 18 نا افسر آتا زئیفہ غاک ہم ہلکرہ۔ کورونا ءِ ہم ننا شار اٹی سیاست، وونٹ ہلنگ، فنڈ مچ کننگ نا وڑ اس جوڑ کرینو۔ اسہ سیر برنج، بورہ، پنچ سیر نت آ مچ آ شار مچ مسنے۔ ہندن انگا اُرا تا نیاڑیک بسنو، ہرافتا لوفر آ مارک داکان زیات اسہ دے انا عیاشی ٹی خڑچ کیرہ۔ ہندن خننگک کہ مچ آ قوم لنگڑ و پنڈوک جوڑ مسنے۔ ہندا اسہ سیر بورہ، برنج ہم بیرہ فوٹو سیشن کن مس ہنا۔ ولدا تینا تینا بندغ آتیٹی بشخ مسر۔ ولے حال دا ئسکہ کہ اِرا دے اسکان نیاڑی نرینہ غاتا مچی امبل نا اُرا نا مون آن سرتوکہ۔ ہزار آ بندغ آک اسہ جاگہ غا مچ تولوک ءُ۔ گڑا بازار نا بند مننگ نا انت مطلب؟

ہفتئی تلار، تاک 14

10-04 April 2020