تینا زی آ جبر (انشائیہ)۔

ڈاکٹر سعید تبسم

0

Get real time updates directly on you device, subscribe now.

ہر اسہ نوشتکار کن اولیکو ستر و نوشت نا سرحال لکھنگ مشکل ءِ۔ ہراتم کہ نوشتکار گڑاس لکھنگ کن تولک تو اوڑکن مشکل دا مریک کہ انت اس لکھو؟ اگہ او بھلو و کہنہ مشق ءُ نوشتکار اسے تو گڑا سے نا لکھنگ آن پد اونا حالیت دادے کہ دنیا جہان نا سرحال آتیا او ضرور نوشتہ کرینے۔ داسہ بچانے انت اس کہ او پین لکھے؟ اگہ او لکھنگ تون اوار خوانوک اس ہم ارے تو او ہرا سرحال ءِ کہ اوڑا کس نوشتہ کتنے؟ ارٹمیکو ہیت دادے کہ نوشتکار نوشت نا اولیکو ستر اٹی نفسیاتی وڑ اٹ پاسینگک، انتئے کہ جوان و گچین ہیت اسے آن تینا نوشت ءِ بنا کننگ کن اودے ہر خیال ہر ہیت سبک نظر بریک۔ مسٹمیکو خیال آتا زیات مننگ یا ہیت آتا بھازی آن ہم چک و تاڑ نا گواچی مریک کہ نوشت ءِ انت سرحال اس ایتو؟ ہراتم سرحال و اولیکو ستر نوشتہ مریک تو اسہ کہنہ مشق نوشتکار اسے کن ولدا داخس مشکل مفک، گڑا دیر روان مریک۔ تین کن تینٹ کسر پٹسا کیک۔ وہوک آ دیر ءِ کس توننگ کپک۔ بس مشکل اولیکو چشمہ نا پٹنگ نا ءِ۔

سعادت حسن منٹو، روسی ادیب چیخوف اسک ہندن ئسر، ہراتم منٹو ءِ نوشت اس کروئی مسکہ گڑا تولتوکہ، سگریٹ نا زی آ سگریٹ کشسا گوہی کریکہ۔ بے آرام مسکہ۔ ہناکہ ایڑسکان، بسکہ داڑسکان، اونا زئیفہ صفیہ پاریکہ بس داسہ اسہ جاگہ غا تول/ بسم اللہ کر لکھنگ کروس۔ ولدا منٹو کاغد نا زی آ 786 نوشتہ کرسا بنا کریکہ۔ دا نیام اٹ سگریٹ چلینگسا کریکہ، و اسہ تخلیقی افسانہ اس یا گچین ءُ نوشت اس کاغد آ تخلیق مسکہ۔ منٹو ءِ سکون اس ملاکہ۔ کنے آ ایہن ہم سنگت آتا اعتراض ءِ کہ نا نوشت اٹی چڑہ منٹو نا ہیت ءِ، یا تو میر تقی میر ءِ کوٹ کیسہ۔ یا پین بیگانہ ادیب اسے۔ تینا براہوئی زبان نا انتئے اسہ نوشتکار اسے کوٹ کپیسہ۔ (دانا زی آ ای پین وخت اس ضرور لکھوٹ) ہیت مننگ ءِ سرحال و اولیکو ستر انا لکھنگ نا۔ ای تو پاوہ کہ ہرا ادیب و شاعر ءِ تانکہ آمد مفک یا نوشت نا تحریک مفک، تو او تینا زی آ جبر کرسا ہر حال اٹ نوشتہ کپ۔ بیدس ہموفتیان ہرا کہ پیشہ ور ءُ نوشتکار ءُ کہ اوفتا است و قلم خواہے یا خواپ روزگار کروئی تمک۔ اسہ ماہر نفسیات اسے نا ہیت اس کنے بھاز متاثر کرے کہ سگریٹ کشنگ آن زیات اونا اِلنگ نسخان ءِ۔ انتئے کہ ارٹمیکو صورت اٹی انسان ءِ تینے آ جبر کروئی تمک، اگہ ہیت جبر انا ءِ تو ہمو عاشق آن زیات دیر تینے آ جبر کرو ءِ ہرا کہ تینا است انا ٹکر ءِ تینا تغ تا دنیا ءِ تینا آڑسندہ، تینا ارمان، تینا خڑینک آتا دنیا غان تینے پاناد کیک، تینے عمر اسے کن جتا کیک، دنیا نا رسم و رواج دود آتا مون اٹی سلنگ اوڑکن نسخان مسکہ۔ یا دا جبر اوڑکن نسخان ءِ؟ کنے ارمان ءِ ہندا است ہشوک آ عاشق کن کہ کس اتون فریاد ہم کننگ کتو۔

ہفتئی تلار
تاک: 25
09-03 جولائی 2021ء
پنہ: 07

Get real time updates directly on you device, subscribe now.

Leave A Reply

Your email address will not be published.