دروغ  (خرین آ ہیت آک)

ڈاکٹر سعید تبسم

0

Get real time updates directly on you device, subscribe now.

اسہ ہندن ءُ راج اس ہراڑے دروغ اٹ ہر کاریم مونی کاہک، ہراڑے ترقی ءِ پیسہ، دروغ اٹ، سیاست دروغ اٹ، دکانداری دروغ اٹ، علاج دروغ اٹ، ایلمی دروغ اٹ، صحافت دروغ اٹ، پین تو پین ءِ عبادت دروغ اٹ، محبت ہم دروغ اٹ مرے تو سوچنگ نا ہیت دادے کہ نن تینا راج ءِ ہرانگ دننگ اُن۔ راستکی بیرہ ننا لوز آتیٹی، کتاب آتیٹی، ہیت آتیٹی بچانے۔ دروغ نا جادو راج انا کاٹم آ سوار ءِ۔ ہراڑے بادشاہ غان پخیر اسکان کل دروغ نا استاد مریر۔ تو او راج تینے ٹی ہرا وڑ انا بندغ ودی کیک؟ نن تینا راج ءِ امر جوڑ کرسا بروک آ نسل انا دوٹی ترسا اُن؟ سیاست مچ آ دنیا ٹی الس نا طرز زندگی، طرز حکومت، ترقی نا پن ءِ۔ ولے ننا راج اٹی سیاست پیسہ جوڑ کننگ، ملک و قوم آن زیات تینے سیر تننگ نا پن جوڑ مسنے۔ مچ آ دنیا ٹی تعلیم و طب انا بشخ آک کل آن شرفدار مقدس تکنگرہ، ولے داڑے حالیت دادے کہ ڈاکٹر نا دوٹی کس تما دُن پا کہ سفید پوش ڈاکو اسے نا دوٹی تما۔ اودے سما ءِ کہ ناجوڑ نا درمان سد روپئی ٹی مریک، ولے او تینا ہَڑ اکن اودے ٹیسٹ و فیس و دوا تا پن اٹ دہ بیست ہزار نا خڑچ اٹی شاغک۔ ولدا خلق خدا نا تب ہم ہندن جوڑ مسنے، ہموڑے خوش مریرہ، ہراڑے جان آتا ہچ اس الیپس۔ 

تعلیم قصاب آتا دوٹی تمانے، ای حیران ہموتم مریوہ کہ میٹرک پاس، بے روزگار بندغ آک ہرافک اسہ دے اس اخبار اسے نا سرخی ءِ خوانسا بھلا بھلا پرائیویٹ اسکول آتا مالک اریر۔ دا تعلیم اف، بلکن کاروبار ءِ۔ حالیت دادے کہ میٹرک پاس ٹیچر آتے اِرا ہزار تنخواہ ترسا بھرتی کیرہ۔ چنا دہ سال خوانک، سائن بورڈ اس خواننگ کپک۔ ولے دافتا فیس و فرمائش آک آسمان تون ہیت کیرہ۔ داسہ حال دا ئس کہ ہفت تُو اسکول آک بند مننگ آن پد ملنگار، ولے دافک تینا مچ آ سال انا فیس ءِ خواہسرہ۔ انتئے؟ دا فیس تو خوانفنگ نا مریک، اگہ نی ہفت تُو چنا تے خوانفتویس تو فیس انت اسے نا؟ سرکاری اسکول آتا بھسکاری پرائیویٹ اسکول آتے کن عیش اس مس۔ ایڑے پنجا ہزار آن اِرا لکھ اسکان تنخواہ ہلوک آ ماسٹر آک بیرہ حاضری خلنگ کن بریرہ۔ ہفتہ ٹی اسہ پیریڈ اس خوانفرہ، دن پا بھلو کاریم اس کریر۔ مستی قدرت نا نظام ءِ ہُر کہ انت مریک؟ مخلوق نا سِل ءِ خلوک آ ڈاکٹر شوگر، بلڈ پریشر یا ذہنی مریض جوڑ مرسا کل آن بے مراد مریک۔ اونا تومر آ مار اونا کمائی ءِ گناہ تیٹی چٹ ایتک۔ اسکول آن نروک آ ماسٹر حرام خور دکاندار نا دوٹی تمک، سد انا گڑا ءِ اودے پنچ سد آ ایتک۔ حرام خور آ دکاندار پین اسہ ڈاکٹر اسے نا دوٹی تمک، منہ کاغد ٹیسٹ انا پن آ اونا دوٹی ایتک، اونا تو انا حرام کمائی ءِ پلک۔

ہفتئی تلار
تاک: 40
17-23 Oct, 2020
پنہ: 02

Get real time updates directly on you device, subscribe now.

Leave A Reply

Your email address will not be published.