عشق ہندن مریک (انشائیہ)

اسکول چھٹی کریسس۔ مسنک تینا اُرا تیا روان ئسر۔ دافتیٹی پنچ سال آن ہلیس بیست سال اسکان نا مسنک اوار ئسر۔ ہندن خننگاکہ، اسہ جلوس اس اسہ وڑ انا پچ و گد بینسا روان ءِ۔ مون مقابل اسہ ورنا اس موٹر سائیکل آ ہندن بسکہ، کس پاہے دانا رند اٹ فوج اس تمانے۔ ای تینے بھاز بچفیٹ واہم کنارہی آن سم آنبار ہنا، پُٹ اسے ٹی بچاٹ۔ اونا خنک گڑاس مسن تیٹی خلوک ئسر، دو تے موٹر سائیکل ناریس آ تخوک ئس۔ سما اف ایلو پارہ غان کس انا خنک اوٹی ئسر یا کس اونا دا ہوا ءِ، چپچلی ءِ خنتو۔ اسہ چنکو وئی انا مار اس اسہ کٹارا ءُ موٹر سائیکل اسے آ ہنداخس ریس کرسا گدرینگا، دانا توار مزغ اٹی لگاکہ۔ ہر اسٹ اوڑا خار اٹ ہُراکہ، ولے اودے کس انا نظر نا چرت اَلو۔ او ہم مسن تا رہی آن گدرینگا۔ ہراتم اُراٹی بسٹ۔ ٹی وی آ ہُراٹ، منہ سیاستدان تینے ہلکسر، چکی تاڑی ئس۔ خبر آک کل مایوسی، نااومیتی نا ئسر۔ ہچ ءُ خیر انا اسہ ہیت اس اَلو۔ کبینی، رشوت، ظلم، بے انصافی، آسمان آ سر مسنو۔ اخلاق نئے الس ءِ نئے حاکم آتے ارے۔ ہر بندغ تینے آدینک اٹی ہُرے، اودے اونا حاکم آتا دروشم نظر بریک۔ دا مننگ کپک کہ بااخلاق، حیادار، ایماندار، مہذب اصول آتا پابند، بندغ آتا حاکم بداخلاق، بے حیا، بے ایمان، جاہل، بے اصول و دز اس مرے۔ ہر بندغ تینا وس انا کچ بے ایمان مسنے۔ ہر بندغ تینا وس انا کچ ظلم اس کیک۔ ہر بندغ ءِ وار دو بس پین ناحق ءِ نت انا کیرغ آن کیک۔ دا گڑاک دنیا ٹی ننے ہندن ءُ قوم اس جوڑ کرینو کہ دا قابل افس کہ کس اوفتیان نفرت کے۔ بلکن قابل رحم جوڑ مسنن۔ اگہ دا آہن تے گاڈی، موٹر سائیکل آتا، درودیوال آتے، تنک انگا گلی تے، مون انگا روڈ آتے، بادوی اس مسکہ، ہوغسا ہوغسا مچ آ دنیا ءِ ننا حال ءِ بنفیرہ۔ ای ہندا خیال اٹی گم ئسٹ، مسن تا اسکول چھٹی مسوسس۔ مسنک فوج آنبار اسہ وڑ انا وردی ٹی روان ئسر۔ ورنا اس اسکوٹر ءِ ریس کرسا ہنا۔ اسکوٹر نا توار ہراڑسکان اونا مزغ ءِ دیر کرو ءِ۔ دافتے ٹی ہمو مسڑ دیر ءِ، ہراڑکن دا ورنا تینا مزغ ءِ دیر کرے؟ اگہ تماکہ تو ٹکر ہم مسکہ۔ ولے مسن تا فطرت ءِ کہ دافتیان نفرت کیرہ۔ ہرا عشق ءِ موٹر سائیکل ناسلینسر اٹی مچ دنیا ءِ بنفک، او تینے پِٹ کرفک۔

ہفتئی تلار
تاک: 41
24-30 Oct, 2020
پنہ: 07