فیڈل کاسترو     5     Fidel Castro 

جی اؤ! …… یونیورسٹی سیاست نا لُمہ مریک۔ کاسترو بڑزکو کہولی تعلیم کن ہوانا یونیورسٹی آ ہِنا۔ او کانود نا بشخ اٹی داخلہ ہلک۔ اے وخت اسکان او سیاست آن بے سما ئس۔ ایڑے یونیورسٹی ٹی اوتم آ واکداری، خلیس و سلہہ غاتا حکمرانی ئس۔ چندی ٹولیک جوڑ ئسرہ۔ و گینگ لیڈر آک عہدہ، وڈی، ملازمت و ایلو آسراتی تا خواجہ ئسرہ۔ ہندا زمانہ ٹی اوڑے کیوبائی پیپلز پارٹی (آرتھوڈوکس پارٹی) ہم ساڑی ئس۔ ہرانا کماشی ءِ چمبا نا بغاوت نا نظریہ غاک کریرہ۔ کاسترو اولیکو سال سیاست اٹی پُترینگا۔ دا پاش ئس کہ او آرتھوڈوکس پارٹی نا سیاست تون گنڈنگا۔ انتئے کہ حالیت آک ہندن ئسرہ۔ او ڈکوئی اٹ اخبار اسے نا کشنگ نا بِنا ءِ کرے۔ 1950ء ٹی او 24 سال نا وئی اٹی گریجویشن کرے۔ 

فیڈل نا یونیورسٹی ٹی خواننگ نا کل آن جوان انگا ہیت دا ئس کہ او لیبر کانود اٹی جوان پوزیشن ہلک۔ وخت اس کہ ملکیت و جائیداد نا کانود اٹی کلئی سے ٹی پاس مس۔ دے اس کہ اوڑان گڈ انا مُچ آ زند ءِ اودے ہندا ملکیت و جائیداد نا برخلاف جنگ اکن وقف کروئی ئس۔ 

دا نیام اٹی تو کاسترو ءِ ہر وڑ اٹ اسہ رجعت پسند ءُ بندغ اس جوڑ مروئی ئس۔ اسہ سوب تو دا ئس کہ او اسہ بھلو جاگیردار اسے نا مار ئس۔ ارٹمیکو دا کہ او دینی اسکول اسے ٹی خوانا ہراٹی ہزگار آتا چناک خوانارہ۔ اونا رجعتی مننگ نا مسٹمیکو سوب دا ئس کہ او کیوبا ٹی رہینگاکہ کہ ہراڑے کل علم آتا شینکاری و تالانی نا مڈی تیا ”میڈ ان یو ایس اے“ لکھوک مسکہ۔ و مسٹمیکو دنیا کن سامراجی امریکہ نا تعلیم ”رجعت و میکارتھی“ والا ئسکہ۔ 

گچین کاری تا کسر بند:۔

ہسپانوی گورنمنٹ رسخت مس تو اونا جاگہ غا ہَندی ہزگار آتا تینٹ جوڑ کروک آ جرنیل و پوسکن جوڑ مروک آ سیاست دانک ملک انا دولت و سیاست ہڑتوم آتیا کوزہ کریر توسُر۔ ہراسٹ نا دوٹی فوجی واکداری نا لٹ بس یا امریکہ والاک تسرتے و دستور و جمہور ہڑتوم آتے میل/ و خراس آتیانبار مُستی کریر و تینا منشا ءِ کرسا ہِنار۔ بتستا اسہ مسکوہی آرمی سارجنٹ اس ئسکہ۔ مارچ 1952ء اٹی او ملک انا صدر جوڑ مس اونا دور اٹی کرپشن اسُل لس ئس۔ بتستا اوڑان کل آن زیات فائدہ ہرفوک آتیان ئس۔ او ہزگار آتے کن دتک آنبار ءُ گڑاس ئس۔ اخس کہ ڈالر او لُٹ و پُل کننگ کریکہ کرسا ہِنا۔ وخت اس کہ تینا برخلاف پدریسہ مروک آ سازش آتے ہشاری اٹ ڈکسا کرے۔ ملک انا جہاندم دے ٹکی کرک آ ”گوانتانامو“ نا ہَند آ مُست آن امریکہ نا اسہ فوجی اڈہ اس ئسکہ۔ ہرادے کہ او 1930ء اٹی اسپین نا برخلاف کیوبائی آجوئی نا جنگ اٹی نیام تمنگ آن گُڈ جوڑ کریسس۔ دادے سال انا 2000 ڈالر لیز آ ہلنگاسُس۔ کیوبا، امریکہ کن بورہ، زم، سگار و گوازی گر آتا اسہ گڑھ اس ئسکہ۔ ہزگار انگا سوداگر و پیسہ والا لُچ و بدمعاش آک آف شور بینکنگ آسراتی، رنڈی و کسینو تے کن ہوانا غا بسرہ۔ کیوبا والاک خاص وڑ اٹ افریقہ نا غلام آتا آل اولیاد آک ہرا کہ کمند نا کشار ءِ کریرہ اسہ بھلو نہاد اس تسرہ۔ غریبی بھاز ئس۔ کیتھولک مُلاتے راجی انصاف تون ہچ ءُ غرَز اس الو۔ توفک نا زور اٹ ڈوہک آسمان اسکان سر مسوسُر۔ علم دوئی کننگ، ہزگار اقلیت آن بیدس پین کس اکن الو۔ 

1952ء اٹی بتستا آئینی وڑ اٹ صدر مننگ نا تکاسُس، او گچین کاری تیٹی اومیتداری نا پڑو ءِ کرے۔ اِرا اومیتدار پین ہم پڑ آ ئسرہ۔

داڑے کاسترو یونیورسٹی نا زمانہ ٹی دا نتیجہ غا رسینگاسُس کہ اسہ انقلابی ءُ تحریک اس سوگو کننگ نا گُرج ارے۔ ہندا زمانہ ٹی گچین کاری تا پڑو مسوسُس۔ کاسترو لَس گچین کاری تیٹی بشخ ہلنگ نا فیصلہ کرے۔ او گچین کاری مہم اٹی بھاز خواری و جم جوش اٹی اختہ ئس۔ او اسہ اسہ نن اٹ چار چار تران ہم کریکہ او اسہ لکھ شخصی چھٹی ہم نوشتہ کرے۔ ہڑدے ریڈیو آ بسکہ و تینا مُچ آ گچین کاری مہم اٹی سرکار و بدمعاش آتا ٹولی تے مخلوق نا مون آ پاش کرے ہندا سوب آن او بھاز پنی ہم مس۔ 

او نا کٹنگ پک ئس…… جون اٹ صدر نا گچین کاری اڈ ہلوئی ئسر۔ مارچ انا اولیکو ہفتہ ٹی بھاز آ اخبارک ہر مسہ اومیتدار آتا بارو اٹ مخلوق نا سلاہ و سوج آتے شینک کریر۔ ہراڑان سما تما کہ بتستا اومیتدار آتیٹی گڈیکو نمبر آٹے۔ 10 مارچ آ بتستا فوج انا مدت و کمکی اٹ دستوری حکومت ءِ بٹے و کل واکداری تے تینا دوٹی ہلک توس۔ ظلم و تادی، بددیانتی، بے ایمانی، بد قماشی ٹی بتستا نا حکومت نا بدل کیوبا ٹی ہِچ ودی متویسُس۔ جنرل بتستا اقتدار آ کوزہ کرسا گچین کاری تے ردکرے۔ دا چس ہلوک ءُ ہیت اسے کہ ہرا وخت آ جاگہ اس نیشنل اُلسی پارٹی اس کٹنگ اٹی ءِ، تو اوڑے ایوب خان اس بتستا مرسا مارشل لاء خلیک و گچین کاری تے چٹفک۔

اخس عجب ءِ کہ لاطینی امریکہ ٹی انقلاب نا لُمّہ کن تو گچین کاری تا کسر ءِ بند کننگاسُس۔ دا خلیس آن کہ کاسترو گو ءِ درو۔ ولے سامراج ایلو مُچ آ علاقہ غاتیٹی گچین کاری نا وڑو ڈول آتے برجا تخا کہ دا وڑ اٹ انقلابی پارٹیک با ایتر۔ ولے انقلاب تو بھاز ڈائنامک مریک۔ انقلابی تینا بننگ کن بیرہ اسہ اِرا وار کسر گچین کیک۔ انقلاب 10ہزار وڑ اٹ 10ہزار کسر جوڑ کیک و پَدا کل آن جوان انگا کسر اٹ مُستی برسا تہٹی پترینگک۔ 

ہراڑے کہ گچین کاری تا کسر ءِ بند کرسا سامراج تین کن کاسترو وڑ ءُ مرک اسے کلہو تسوسُس۔ ہموڑے اوکان گُڈ خڑک اٹی گچین کاری تا کسر ءِ ملسا تینا تینا شاویز، ٹیگا و ٹولا پنی آ 10 مرک آتے ہم ایسوسُس۔ (ہموتم لاطینی امریکہ ٹی دہ ملک آتیٹی انقلابی حکومت آک ئسرہ) ہرافتیٹی بھلا کچ گچین کاری تیٹی کٹسا اقتدار اٹی بسوسُس۔ دا اسہ پین جتا وڑ انا ہیت اسے کہ ہرا وخت آ مچ آ دنیا ٹی سوشلزم ءِ روس انا غم لگاسُس۔ ولے لاطینی امریکہ پدریسہ سوشلزم اٹی پترینگ انگ اٹی ئسر………… او ہم کل تا لَس گچین کاری تا وڑ اٹ۔

ہفتئی تلار

تاک: 36

19-25 September 2020

پنہ، 2