کٹیا (افسانہ)

کیمرہ غاتا گروشک اٹی اونا خنک ملنگتوسہ۔ اسٹیج نا زی آ اونا پن انا کوکار ئسکہ۔۔۔ مون نا دیوال آ بھلو اسکرین اس خلوک ئس، اونا بشخندہ کروک آ فوٹو بھلن بھلن خننگاکہ۔۔ تاڑی نا توار اونا خف تے ٹی پننگ ئس۔۔ بھلو ہژمبہ اس ئسکہ۔ اونا کاریم اونا نوشت آتا زی آ اودے اسہ بھلو اعزاز اس تننگ ئسُر۔۔۔ او روشنائی نا سوب آن خن تے تینا بیوس محسوس کریکہ۔۔۔ اونا جوزہ غاتا قیمت ءِ اینو اودے تننگ ئسُر۔۔ اونا سرسہبی نا لائخی نا سفت مننگ ئس۔۔۔ او تینا کُرسی آن بش مس ولے اونا اولیکو گام بڑز مننگ تون چیہانٹ اس مس، اونا نت انا مون آ ہمو چنکا کودک ہرادے خرماک لتاڑسا ہناسُر، تموک ئسکہ، او گام ءِ تینا زرس یک خُشی کرے چیہانٹ پین زیات مس خیال کیس…. کنے لتاڑوس….؟

او کنا خدا داسہ اونا نت تا مون آ ہمو لمہ ئس ہرانا ورنا غا مار انا جون انا زی آ۔۔۔ سگریٹ نا داغ تیا بنوک آ ٹِک آک خیسن و مون ئسُر ہرا کہ اُست ءِ ترخفیرہ، جغر ءِ باٹی ایسرہ…. لمہ گوری کنے لتاڑوس ای داسکان تینا مڷ انا کسرآ ہروک اُٹ اونا داسکان ہچ ءُ درک اس اف…. ہنداڑتون اسہ پین توار اس چست مس، ابّوءِ کنے لتاڑاس….

یا خدا انت مس اوتینا نت ءِ بڑزاکرے اونا مون آدتر چُر اسہ جون اس تموک ئس…. گودی ای داسکان کسرآ تموک اٹ کس کنے خلیس آن دو خلپک پارہ کہ دا پولیس کیس اسے…….. دانگ ہُروا کنا دتر بھاز ترندی اٹ وہنگ ءِ…. کن تون وخت کم ءِ، کنے کس اس ڈاکٹر آ دتو، نا لوز آک ہم درمان متوس، او نت ءِ تینا مچے پانادی تخا خف تے ٹی تے تاڑی نا توار گم مرسا…. داسہ چیہانٹ آتتون اوڑدہ مسوسس۔

او تینا خف تے ٹی دو ءِ تسوسس و گام تے تینا خیال و پام اٹ ہرفیکہ، ہر گام اتون پوسکن ءُ چیہانٹ اس تد ئس۔ اونا خنک خیسن ہڑسینگاسُر…….. اونا نک لڑزسا کریرہ، حیرن و فریشان باہوتر تین کن کسر پٹاکہ، ہر پارہ غا جون اس غاو کننگ اٹی ئسکہ…. سُم تا توار ئس…. دھماکہ غاتیان تیوی ڈغار لڑزنگ ئس…….. عدالت نا تہٹی دروغ نا راج ئس، اونا کسر مرغن مننگ ئس…….. اسٹیج آ اونا انتظار مننگ ئس…. او دا چیہانٹ و کوکار، واتوڑ و پِراد آتیان تین کن کسر پٹنگ ئسک…….. اونا تیدار آن خید آک دہسا کریرہ…….. اونا نک ہنداخس کبین ئسُر کہ اوڑتون بننگ اَلوسہ…. کہ اسہ چیہانٹ اس اونا خف تیا تما…. اسہ مسڑ اس لوشت اونا مون آ تموک ئس اونا دوٹی اونا ڈگری…. اونا بدن نا زی آ لوز آک ٹک بناسُر…….. او دا ڈگری ءِ دوئی کننگ کن لغڑ ئس…. او کنا خدا…. تولوک آ مسڑ نا بدن پاش…. اونا خن تے ٹی بےوسی اس تالان ئسکہ…….. علم و شعور اودے چیہانٹ خلنگ آ بے وس کریسس…….. او وار آ اونا کنڈ آ ہُراکہ…. اوکنا باری آ خدا…. کل توارک اوار مسوسر…….. ہر کنڈآ زمبہیر ئس، ہرا اونا ہروہ ءِ دتر چُر کننگ ئس…. کوک و واتوڑ پین ترند مس، وا چیہانٹ اس خف تے تل کرسا ایپار مسک…. چار سال نا چُنا اس دکان کن ٹکی ٹافی کن ہناکہ…. خرما اسے نا گواچی مس…. خرما اونا جون ءِ موژغاڑسا ہنا کہ اونا چیہانٹ آک آسمان اٹ باءِ سخت کننگ ئسُر…. کس اس بنتو…. کس خنتو…. سہب انا اونا لاش نالہ نا پودگل آتے ٹی لوتڑینگوک ئسکہ…. لمہ نا تے بے وسی کوکار اٹی…. اسہ وار تون او چیہانٹ کرسا تغ آن اُترم کرے…. اونا خنک زیٹ چھت اٹ خلوک ئسُر …. اودے ہندن گمان مننگ ئس کہ کوٹھو نا چھت اونا دڑنگ کن بننگ ءِ…. پھنکہ نا کیر کیر نا توار کوٹھو اٹ تالان ئس…. او خید اٹ چُڑوک ئس…. ہنداڑتون میز آ دو بٹے کہ گولی تے تینا ہرفے و گولی تیان اسہ گولی اس تینا لڑزوک آ دو تیٹ کشا باٹی بٹے…. لپڑزہ مرسا گلاس ءِ بوز آ درے…. او بھیم و خوف اٹ گولی ءِ بن آن ایپار کرے۔ اونا نگاہ شلف آ تخوک آ اونا چندی ایوارڈ آتیا تما…. ہرا اونا دا حالیت آ بشخندہ کننگ ئسُر….

ہفتئی تلار

تاک: 28

18 July 2020

پنہ: 05