الباقی جل جلالہٗ
مدام باقی سلوک آ
عالم دینک دا اسم مبارک نا بارو اٹ چندی سِفت آتے نوشتہ کرینو
-1 الباقی جل جلالہٗ ہمو ذات ءِ کہ اونا اسباب آتے زوال اسُل بفک۔ و اونا ذات انا باقی سلنگ نا ہچ ءُ اول و اخیر اس اف۔ او ازلی و ابدی ءِ، ازل نا معنہ کل آن یا اسُل اول آن، و ابد نا معنہ آخبت اٹی مدامی کن، اوڑان بیدس ایلو کل مخلوق آک ءُ، کہ مست آن الوسہ، و نئے مدامی مریرہ۔ البتہ ہیت سلیس جنت و دوزخ نا کہ مست آن اریر، تو او ہم الوسہ، ولے مدامی باقی سلرہ۔ ولے او ہم مخلوق ءُ، کہ پد آن اللہ پاک ودی کرینے تا، بس معلوم مس کہ ازل آن ابد اسکان مروک آ بیرہ ”الباقی جل جلالہٗ نا ہستی ءِ۔
اللہ پاک نا دا سِفت کہ او مدام ارے، دانا بارو اٹ قرآن پاک نا بھاز آ آیت آتے ٹی ارے، دن کہ:
”مَا عِندَکُم یَنفَدُ وَمَا عِندَ اللّہِ بَاقٍ“
بدل: انت اس کہ نم تون ارے او چٹرہ، و انت اس کہ اللہ تون ارے اوفک مدام سلرہ۔
ایلو مثال، دن کہ:
”کلُّ مَن عَلیھا فَان وَ یبقَی وَجہُ رَبَّک ذوالجلالِ والاکرامِ“
بدل: انت اس کہ ڈغار آ ارے،او کل ختم مریرہ، بیرہ نا رب انا ذات ہمو عظمت و عزت والا ءِ، باقی سلک۔
مسٹمیکو مثال:
”کُلُّ شَیءھالِک اِلاَّ وَجھہُ“
بدل: اونا ذات آن بیدس ایلو کل فنا مریرہ۔
پین ہم بھاز آ آیات آک اریر، کہ ”الباقی جل جلالہٗ نا مدامی مننگ نا زی آ دلیل ءُ۔
-2 ارٹمیکو سِفت دادے کہ ”الباقی جل جلالہٗ نا ساڑی مننگ ءِ نئے بنا ارے، و نئے ایسر۔ مطلب دادے کہ او اولیکو ءِ، بیدس بنا غان، و گڈیکو ءِ بیدس ایسر آن، او ’وارءالورا‘ ءُ ذات اسے۔ او تینا سِفت آتا سوب آن سمجھ اٹ بریک، بس او ذات سمجھ آن پیشن ءِ۔
از ابن الحسن ابابکی
هفتئی تلار
25 April-01 May 2020