مچ آ صوبہ غانبار نصیر آباد نا الس کن ہم اڑزان نُت فراوانی پک

نصیرآ باد: بلوچستان اٹ نُت انا فراوانی کن وزیراعلیٰ بلوچستان میرعبدالقدوس بزنجو نا خاص ءُ پارت اسے آ مچ آ صوبہ تون اوار نصیرآباد نا اُلس نا ہڑزان نت انا فراوانی ءِ پک کنگے۔ حکومت نا کنڈآن ارٹمیکو مرحلہ ٹی 20کلو نا 500 نُت انا لوت سرکاری نہاد آ اُلس اٹ بہا کننگا۔ وزیراعلیٰ بلوچستان نا انسپیکشن ٹیم و چیئرمین سید ظفرعلی بخاری ڈپٹی کمشنر نصیرآباد عائشہ زہری تون اوار نت انا بہا کننگ نا کاریم نا جاچ ءِ ہلک۔ او وخت آ تحصیلدارمجیب الرحمان ساتکزئی،محکمہ فوڈ نا اے ایف سی عباس علی جمالی و منظور احمد شیرازی تون اوار ایلوفک ساڑی ئسر۔ ڈپٹی کمشنر عائشہ زہری سی ایم آئی ٹی نا چیئرمین ءِ پارے کہ حکومت بلوچستان نا کنڈآن فراوان کروک آ نُت آتے جوان وڑاٹ بہا کننگ انگ ءِ۔ و ہر بندغ ءِ 20کلو نت انا لوت اس سرکاری نرخ 1509 روپئی ٹی تننگ انگ ءِ۔ اسسٹنٹ کمشنر ڈیرہ مرادجمالی و تحصیلدار نا کماشی ٹی ہلوک آتا پنک و شناختی کارڈ نمبر آک کمپیوٹر اٹ انٹر کننگرہ۔ تانکہ ہچ ءُ بندغ اس ارا وار ہلنگ کپ۔

(خ ن)