بلوچستان حکومت نا ہسپتال آتیٹی سمارٹ او پی ڈی نا بناءِ کننگ نا فیصلہ

0

Get real time updates directly on you device, subscribe now.

کوئٹہ :  وزیراعلیٰ بلوچستان جام کمال خان نا کماشی ٹی کورونا وائرس و ملخ آتا توننگ نا بابت بڑزکو کہولی جاچ دیوان اس وزیراعلیٰ سیکرٹریٹ اٹی اڈ ہلک، ہراٹی اہم ءُ فیصلہ کننگار۔ جانجوڑی محکمہ، کشت و کشار محکمہ، و بلوچستان کمانڈ اینڈ آپریشن سینٹر نا کنڈ آن دیوان ءِ تعلقدار باندات آتیا بریفنگ تننگا۔ صوبائی وزیرک، زمرک خان اچکزئی، میر ضیاءلانگو، میر محمد خان لہڑی، چیف سیکرٹری فضیل اصغر، ایڈیشنل چیف سیکرٹری داخلہ حافظ عبدالباسط، تعلقدار محکمہ غاتا سیکرٹریک، ایڈیشنل آئی جی پولیس و ایلو تعلقدار کمامدار آک دیوان اٹ بشخ ہلکر۔ دیوان اٹی کورونا وائرس نا بابت زمواری سر تننگ نا وخت آ کزیت کروک آ ڈاکٹر طبی کارندہ و سرکاری ملازم آتے شہید نا کیٹیگری ٹی اوار کننگ و اوفتا تینائی تے شہید پیکیج تننگ نا فیصلہ کننگا، دیوان اٹی شیخ زید و فاطمہ جناح ہسپتال نا ڈاکٹر و پیرا میڈکس لیبارٹری ٹیکنیشن و بلاواسطہ کورونا وائرس نا بابت ڈیوٹی تروک آ ایلو اسٹاف و سیکورٹی کارندہ غاتے کن مالی آسودہی نا پڑو ہم کننگا۔ و فیصلہ کننگا کہ ڈیوٹی نا وَڑ انا رد اٹ ڈاکٹر، پیرا میڈکس و ایلو اسٹاف و سیکورٹی کارندہ غاتے کن تُو انا اسہ، اِرا، یا مسہ بنداوی تنخواہ تننگک۔ و ودکی بنداوی تنخوا تا تننگ یکم مارچ 2020 آن لاگو مریک۔ جانجوڑی محکمہ ڈاکٹر و ایلو اسٹاف نا ڈیوٹی نا وڑتا بابت سرجم آتے خزانہ محکمہ ءِ فراوان کیک۔ دیوان اٹی سمارٹ لاک ڈاﺅن، الس نا کمک کپننگ و رکھی گام گیج آتیا عمل مفننگ نا سوب آن وائرس نا تالانی ٹی ودکی آ گڑتی نا درشانی کننگا۔ دیوان ءِ پاننگا کہ نجی ہسپتال و رجسٹرڈ کلینک آتیٹی او پی ڈی و درمان آ رکھ اف، ولے رکھی گام گیج آتا ایس او پی تیا عملدرآمد المی ءِ۔ دیوان اٹی سرکاری ہسپتال آتیٹی سمارٹ او پی ڈی نا بنا کننگ نا فیصلہ کرسا جانجوڑی محکمہ ءِ دا رد اٹ گام گیج نا پارت کننگا۔ دیوان اٹی کورنا وائرس نا سوب آن بند کننگوک محکمہ غاتے کچ اٹو اسٹاف اسے تون ملنگ نا فیصلہ کرسا محکمہ غاتا سیکرٹری تے تینا محکمہ غاتا بجٹ و شونداری بشخ انا اسٹاف تون اوار کاریم بنا کننگ نا پارت کننگا، وخت اس کہ فیصلہ کننگا کہ سول سیکرٹریٹ اٹی وزیٹر و بے تعلق آ بندغ آتا پترینگ آ رکھ خلنگک۔ دیوان آن تران کرسا وزیراعلیٰ پارے کہ کورونا وائرس ہڑدے ئی زند انا بشخ اس جوڑ مرسا ہننگ اٹی ءِ،و رکھی گام گیج آتیا عملدرآمد وائرس آن بچنگ نا اسٹ انگا وڑ ءِ۔ او جانجوڑی محکمہ و حوالکاری محکمہ ءِ الس اٹ رکھی گام گیج آتتون اوار اوار وائرس آن زہمی مننگ آن پد درمان و کن خور نا بابت معلومداری فراوان کننگ کن میڈیا نا کمک اٹ خصوصی مہم اس بنا کننگ نا پارت ہم کرے۔ او کوئٹہ تون اوار مچ آ صوبہ ٹی ملیریا کنٹرول پروگرام آ گچین عملدرآمد ءِ پک کننگ و کمشنر و ڈپٹی کمشنر آتے ملیریا کنٹرول اسپرے نا بناءِ کننگ نا پارت ہم کرے۔ کشت و کشاری محکمہ نا کنڈ آن دیوان ءِ صوبہ ٹی ملخ آتا ساڑی گری اونا نسخان و توننگ کن برجا گام گیج آتیا بریفنگ ترسا پاننگا کہ صوبہ نا 27 ضلع ملخ آن زہمی مسنو۔ خاص وڑ اٹ مکران و رخشان ڈویژن نا ضلع غاتیٹی بھاز بھلو کچ اس ساڑی ارے۔ ہراڑان باغ و فصل آتے بھلو نسخان اس رسینگ نا گڑتی کاٹم ہرفینے۔ دیوان ءِ پاننگا کہ پی ڈی ایم اے نا کنڈ آن 100 ملین روپئی نا خڑچ اٹ اسپرے و مشنری تننگانے، وخت اس کہ این ڈی ایم اے نا کنڈ آن فضائی اسپرے و مشنری نا کمکاری دوئی ارے۔ زہمی ضلع غاتیٹی کشت و کشاری محکمہ ضلعی انتظامیہ نا کمک اٹ ملخ آتا چٹفنگ کن پبی گام گیج کننگ اٹی ءِ۔

(خ ن)

Get real time updates directly on you device, subscribe now.

Leave A Reply

Your email address will not be published.