سویڈن، عجب ءُ ملک اس(2)

سویڈن و فن لینڈ نا سیم سری آ اسہ ہندن ءُ گلف گراؤنڈ اسے ہرانا نیمہ سویڈن و نیمہ تے فن لینڈ اٹی ءِ۔ یعنی دا گوزی ءِ کننگ کن گوازی گر ءِ ہڑتوم آ ملک آتیٹی ہنسا گوازی کروئی تمک۔ سویڈن نا 20 لکھ آن زیات بندغ گوازی تا چندی کلب آتتون رجسٹر ءُ۔ داڑے کل آن زیات فٹبال گوازی مریک۔ داڑان بیدس داملک انا باتیک ربہہ، آئی اسکنگ، باسکٹ بال، ربہہ یونین و گالف کون آ گوازی تے پسند کیرہ۔

دا ملک انا 79% آبادی انگریزی زبان جوان کاریم اٹ اتنگ کیک۔ مننگ کیک دا ہیت بھاز آتے سما مف کہ سویڈن نا جوڑ مننگ وخت آ فن لینڈ سویڈن نا بشخ اس ئسکہ۔ فن لینڈ 1809ء اٹی سویڈن آن جتا مسوسس۔ 2009ء اٹی ہراتم پین چندی کانود آک سویڈن نا شاری تیا لاگوکننگا، تو سویڈش ءِ سویڈن نا سرکاری زبان نا درجہ ہم تننگا۔ ہراڑان پد دا زبان سرکاری کہول آ ہم کاریم اٹ اتنگا۔ یو کے سویڈن و فن لینڈ دنیا نا ہمو ملک آک ءُ ہرافتا پاسپورٹ ہولڈر آتے دنیا ٹی کل آن زیات ملک آتیٹی مفت ویزہ تننگک۔ پاسپورٹ رینکنگ اٹی سویڈن مسٹمیکو نمبر آٹے۔ ولے اول و ارٹمیکو نمبر آ بروک آک ویزہ فری نا رد اٹ سویڈن آ ن پد ءُ۔ انتئے کہ او ملک آتیٹی Visa on Arrival نا لڑاٹی بھلو فرق اس ارے۔ سویڈن اٹی چنا تا ودی کچ 0.13% ءِ ہراکہ ایلو چندی ملک آتا مون اٹی بھاز کم ءِ۔ داڑے ہراتم چناس ودی مریک یا اوفک پین کس انا چناءِ تین کن ہرفرہ تو ہمو لمہ باوہ 480 دے نا چھٹی ہلنگ نا حقدار جوڑ مریک۔ سویڈن حکومت نا پارہ غان لمہ باوہ ءِ دا سوب آن چھٹی تننگک کہ اوفک تینا چنا تون وخت گدریفنگ کیر۔ و چنا نا جوان وڑ اٹ ولشت ءِ کننگ کیر۔

مننگ کیک بھاز آتے دا ہیت انا ہم سما مفرو ءِ ٹوئیٹر آ ساڑی سویڈن نا آفیشل اکاؤنٹ ءِ ہرہفتہ اسہ نہ اسہ شاری اسے تننگک، کہ دادے او تینا وڑاٹ سنبھال ءِ کے۔ برازیل نا 43% ورنا تتون ہائی اسکول نا ڈگری ارے وخت اس کہ سویڈن اٹی داکچ 87% ءِ۔ سویڈن اینو اسکان کل 31 نوبل پرائز تینا پن آ کرینے۔ دانا آبادی ٹی اسہ کروڑ نا آبادی آن 20 لکھ ہندن ءُ ہم اریر ہرافتا عمر داسکان 18 سال نا وئی ءِ سر متنو۔ سویڈن نا ہر پنچ آن ہر اسہ بندغ اسے نا اسہ نہ اسہ پین ملک اسے آن تعلق مریک۔ یعنی سویڈن نا دا شاریک ایلو ملک آتیٹی رہینگرہ ہراکہ سویڈن نا آبادی نا 15% جوڑ مریک۔ 1974ء اٹی قطبی کوریا نا Came Hill Sung پنی آ بادشاہ ہزار گاڈی سویڈن آن ہلکوسس۔ قطبی کوریا داسکان دا گاڈی تا پیسہ غاتے تتنے۔ اقوام متحدہ نا 2017ء نا رپورٹ نا رد اٹ سویڈن، سوئزرلینڈ و نیدر لینڈ دنیا نا کل آن جدید انگا ملک آک ئسر۔ سویڈن نا کم و وَد 6 ہزار آن زیات شاری ہندن ءُ، ہرافتا اولیکو پن Love آن بنا کیک۔ 2006ء اٹی سویڈن اٹی 76 لکھ 27 ہزار پیشن ملک انا باتی سفر کرینو۔ ہرانا سوب آن سویڈن ءِ 21میکو کرن انا کل آن بھلا زیات سیل سواتی ملک اڈ تننگا۔ 2016ء ٹی داکچ 1 کروڑ 35 لکھ ئس۔

او مستی ننے پارے کہ بی ایس کننگ آن پد لمہ باوہ تینا چناتے بڑزکو کہولی تعلیم کن سویڈن، فن لینڈ، ڈنمارک، ناروے، و بنکاک آ رادہ کیرہ، اوڑے داخلہ مفت ءِ۔ انتئے کہ داڑے کتاب آتا جاگہ غا گیشتری Soft اٹی تعلیم تننگک۔ طالبعلم آک اسہ سمسٹر ءِ پورو کننگ آن پد تینا تعلیم نا خڑچ آتے پورو کننگ کن فوڈ ڈلیوری (خوراک سرکننگ) نا کاریم کننگ کیرہ۔ سویڈن مخلوق نا وژن آب اٹنگا تعلیم نا شون تننگ ءِ۔

اگہ نن تینا ملک انا تعلیمی نظام ءِ سویڈن نا تعلیم تون Compare کین، دافتا نیام اٹ نن بھلو فرق اس خننہ۔ اسہ کنڈ آ کتاب آتا باریم و سلیبس پورو مفننگ۔ ایلو کنڈ آ چندی تعلیمی ادارہ غاتیٹی بنداوی آسراتی تا ساڑی مفننگ کون آ ویل آک ءُ۔ داڑے ڈگری تخوک آک ہزار آتا حساب اٹ ملرہ، ولے اوفک بیروزگار ءُ۔ کاریم ملپننگ نا سوب آن دیہاڑی کننگ آ بیوس ءُ۔ اینو نا دا پوسکن آ دور اٹی ڈگری ہولڈر آتا جاگہ غا ملک اٹی کسبی تعلیم و پین ٹیکنیکل ادارہ جوڑ کننگ نا گرج ءِ۔ حکومت بروک آ وخت انا طالبعلم آتے کن توئی وظیفہ/ اسکالر شپ نا بست و بند کے۔ بایدے حکومت ٹیکنیکل ادارہ غاتا کچ ءِ زیات کے تانکہ میٹرک آن پد کسب و ہنر نا کمک اٹ ملک و قوم انا ورناک تینا روزگار ءِ کننگ کیر۔ و بیرہ ڈگری ہلوک ءُ مفس۔ کسبی تعلیم اینو نا خاص ءُ گرج اسے۔ داڑان قوم آک زندگی نا ہر پڑ اٹی ایلو ملک آتتون گو تفنگ نا وڑ اٹ مننگ کیرہ۔ قومی نصاب نا رداٹ بیرہ پنچ کتاب (مضمون) خوانفنگے۔

ہفتئی تلار

تاک:04

28-22 جنوری 2022ء

پنہ: 05