قدوس بزنجو بے مقابلہ غان وزیر اعلیٰ بلوچستان گچین

کوئٹہ (آن لائن)بلوچستان نا پوسکن آ وزیر اعلیٰ نا گچین کاری کن میرعبدالقدوس بزنجو نا پندار کاغد آک جمع مسنو، ولے پین ہچ ءُ سیاسی جماعت اس اونا برخلاف پندار کاغد جمع کرفتنے، داڑان پک مس کہ میر عبدالقدوس بزنجو بے گو آن وزیر اعلیٰ بلوچستان پن مسنے، و اینو بیگہ تون او تینا عہدہ نا سوغند ہرفک۔ بلوچستان عوامی پارٹی نا پندار اومیتدار میر عبدالقدوس بزنجو پارینے کہ سیاست نا ہچ سما تمپک، گھنٹہ غاتیٹی ہم گڑاک بدل مریرہ، ولے دا خوش بختی اسے کہ مخالفت اٹی ہچ ءُ اومیتدار اس اَلوکہ۔ مسکوہی وزیر اعلیٰ تتون اوار کل اتون ہم گام مونی کانہ۔ سینئر باسک آتا آزموندہ غاتیان فائدہ ہرفسا سلاہ سوج اٹ گڑا تے مونی دننگک۔ ہیت انا جاگہ غا کاریم کینہ نشان ایتنہ۔ پندار کاغد جمع کرفنگ نا وخت آ او میڈیا تون ہیت وگپ کرسا پارے کہ کنا خوش بختی ءِ کہ مخالف اٹی ہچ ءُ اومیتدار اس اف، کل اسمبلی باسک آتیا ہناٹ، کل آن بشخنداری خواہسٹ، کہ نن سیوت ءِ خراب کننگ کن آخا بلکن جوانی کن گام اس ہرفیسن، او مسکوہی وزیراعلیٰ جام کمال نا منت ءِ ہرفسا پارے کہ او پارٹی ءِ بچفنگ کن اہم ءُ کڑد اس ادا کرے و استیفہ تس۔ اوکان منت وار اُن، کوشست کیوہ کہ جام کمال تون رابطہ غاک برجا سلر، کل ءِ تین تون ہم گام مونی دینہ۔ نواب ثناء اللہ زہری، نواب محمد اسلم رئیسانی و جام کمال وزیر اعلیٰ گدرینگانو، اوفتا آزموندہ غاتیان فائدہ ہرفنہ، اوفتا سلاہ سوج اٹ مونی گام کینہ۔ اومیت ءِ کہ گڑاک گچینی نا کنڈ آ کارہ۔ ہیت آتسکان سلپنہ، گراؤنڈ آ گڑا تے اتنگ آن پد میڈیا ءِ معلومدار کننگک۔ او پارے کہ سیاست اٹی ہچ سما تمپک، گھنٹہ غاتیٹی ہم گڑاک بدل مریرہ، واکداری ملا تو گڑا پاوہ کہ قوم اکن انت کننگ کیوہ۔