کلمہ نا پن آ جوڑ پاکستان نا شونداری و شونہالی اللہ غاٹے، اسحاق ڈار

اسلام آباد: وزیر خزانہ اسحاق ڈار پارینے کہ ملک تدوک آ 5سال نا ڈیوالئی تا بدل ءِ تننگ اٹی ءِ۔ کوشست کینہ کہ حالیت آک گچین آن گچین مننگ کیر۔ پاکستان نا شونداری و شونہالی اللہ تعالیٰ غاٹے۔ گرین لائن ٹرین نا بنائی دود آن تران کرسا اسحاق ڈار پارے کہ ہندا ہمو ملک ئس ہرانا بارو اٹ 2013ء ٹی پاننگا کہ دا مالی وڑ اٹ سوگو اف، وہرا حکومت کہ بس او ڈیفالٹ نا پڑو کیک۔ او پارے کہ قوم انا بدبختی دادے کہ اینو پنچ سال آن پد نن ہراڑے سلوک اُن؟ ملکی زرگزران تون انت بیداد کننگا، اونا بایدے پرسجو کننگے۔ وزیر اعظم شہباز شریف ءِ بے کچ چیلنج آک ملار، ولے او بہادر ئس، و جنگ کننگ اٹی ءِ۔ ننا دور اٹی کبینی نا کچ کم ئسکہ۔ نن 2016ء اٹی دنیا نا 24می گچین آ زرگزران جوڑ مسوسن، ولے پاکستان نا زرگزران داسہ 47می نمبر آ بسنے، اسحاق ڈار پارے کہ اینو پاکستان ڈان و پانامہ ڈرامہ نا بدل تے تننگ اٹی ءِ، ولے ننا مچ آ ٹیم دے و نن کاریم کنن گاٹی ءِ، و نن بروک آ لس گچین کاری تیٹی ہننگ آن مست ملک ءِ گچینی نا کنڈ آ دینہ، او پارے کہ نن زرگزرانی مین آن پیش تمنہ، و پاکستان شون ہلیک۔ ریلوے نا شونداری تون ملکی شونداری گنڈوک مریک، وگچین ریلوے گچین کٹیا نا وڑ اس مریک۔ گرین لائن ءِ چٹفنگاسس۔ وزیر ریلوے دوارہ دادے بنا کرے، ریلوے نا محکمہ زُو تینا نت تیا سلک۔ او پارے کہ ملک ءِ بھس کروک آتیان پرسجو بھاز المی ءِ۔ اسحاق ڈار نا پاننگ ئس کہ اللہ تعالیٰ پاکستان ءِ دنیا ٹی رہینگ انگ کن جوڑ کرینے، دا اسٹ انگا ملک ءِ ہرا کلمہ طیبہ نا پن آ جوڑ مسوسس، اگہ اللہ پاکستان ءِ جوڑ کرینے، تو اونا رکھ، شونداری و شونہالی ہم اللہ تعالیٰ نا ذمہ غاٹے، بس قوم اسے نا وڑ ننے سخت خواری کروئی تمک۔

(آن لائن)