اپوزیشن فوج ءِ وگیفسا حکومت ءِ بٹنگ خواہک، عمران خان

اسلام آباد: وزیر اعظم عمران خان پارینے کہ اپوزیشن خواہک کہ وڑ اسے ٹی فوج ننا حکومت ءِ بٹے۔ ہنوک آ حکمران آک بیست ارب ڈالر نا نسخان اِلانو ہنانو، اقتدار اٹی بسن تو ملک خواتہ مننگ نا خڑک آ ئسکہ، تحریک انصاف زرگزران ءِ شون ترسا کسر آ شاغا، اینونسخان 1.8 ڈالر نا کہول آ سر مسنے، دنیا ٹی ایون اسکان بے سہب مننگ آن بیدس ہچ ءُ بھلو کاریم اس متنے، تانکہ خوار مفنہ بھلو سرسہبی دوئی مفک، بدلی نا کسر پت آن پُر ءِ، سرسہبی کن ہچ ءُ شارٹ کٹ اس اف، داڑے ہیت آتے وزیر اعظم پاکستان تحریک انصاف نا حکومت نامسہ سال نا پورو مننگ آ پارٹی نا کارکڑد نا بابت اسلام آباد نا جناح کنونشن سینٹر اٹی اڈ ہلوک خصوصی دود آن تران کرسا کرے۔ وزیراعظم عمران خان اسمبلی باسک، پارٹی نا باسک و یوتھ ونگ و آزاد جموں و کشمیر نا پوسکن آ وزیراعظم تون اوار کل انا منت ءِ ہرفے۔ او پارے کہ کنا اقتدار اٹ بننگ آن مست بیست و دو سال نا جہد بھاز سخت ئسکہ، ہندن ءُ وخت ہم بس، ہراتم بیرہ پنچ یا شش بندغ کن تون سلیسوسر، و ایلوفک اُرا تیٹی تولوک ئسرہ۔ ہمو وخت اٹی کیہی بندغ آک ملنڈ ہم کریرہ۔ کنا بندغ آک کنے پاریرہ کہ ننے آ ملنغ کیرہ، کہ نم تحریک انصاف اٹی اُرے، کن کن دا سخت انگا دے تیٹی بھلا تحریک نبی اکرمؐ ئسکہ۔ او ہم بھاز خوار ءُ دے خنا۔ اللہ ءِ کل آن زیات دوست ئسکہ، ولے 13سال او بھاز سخت ءُ وخت اس گدریفے۔ اودے دا سخت انگا وخت آن گدریفنگ نا ہچ ءُ ضرورت اس اَلوکہ، ولے ہراتم او حق انا ہیت کرے تو مخلوق اوڑا ملنڈ کریکہ، و ای مدام اونا زند آن ہیل کرینٹ۔ او پارے کہ نن نماز اٹی اسہ گڑاس خوانہ، کہ اللہ ننے ہموفتا کسر آ شاغ ہرافتے نعمت بشخسہ، ورنا تپہ ننا آخبت ءِ۔ اللہ تعالیٰ نبیؐ نا زند آن ہیل کننگ نا پرمان کیک۔ ورناک نبی کریمؐ نا زند آن ہیل کیر۔ شیفی بڑزی زند انا بشخ اسے، ہرکس کہ حق انا کسر ءِ ہرفے، اودے خوار مروئی تمک، دانا مطلب دادے کہ ننے سخت انگا وخت آ ہم سوگو سلوئی ءِ، خلوئی اف۔ اگہ نن سخت انگا وخت ءِ جوان پہہ مرین تو دا سرسہبی نا کسر جوڑ مریک، مشکل وخت اٹی ننے خلوئی اف۔ کہ ہندا ننا عروج نا سوب مریک۔ دنیا ٹی اینو اسکان کس بھلو کاریم اس ہموتم اسکان کننگ کتنے، تانکہ فیل متنے، دا مننگ کپک کہ سدھا پرچی ءِ ہرف و لیڈر جوڑ مر۔ دن مننگ کپک۔ تانکہ سخت جہد آن گدرینگپیس، بھلو کاریم کننگ کپیسہ۔ ہچ ءُ شارٹ کٹ اس لیڈر جوڑ کننگ کپک، نئے لیڈر آک شارٹ کٹ اٹ جوڑ مسنو۔ ننا مسہ سال بھاز خواری اٹ گدرینگار، انتئے کہ نن ہراتم حکومت اٹ بسن تو دا ملک خواتہ مسوسس، اوغانستان آ ہیت و گپ کرسا عمران خان پارے کہ اوغان قوم دلیر و جنگ کروک ءُ قوم اسے۔ سویت یونین اوغانستان آ کوزہ کننگ نا کوشست کرے، ولے او بے سہب مس۔ داسہ ننے دا طالبان تا ہیت آ باور کروئی ءِ، اگہ طالبانک تیان ہیت آ سلتوس تو ولدا ہرنہ کانہ۔ دا وخت آ مچ آ دنیا بایدے کوشست کے کہ اوغانستان اٹ امن مرے۔

(آن لائن)