بھارت نا ہندوتوا سوچ انا سوب آن مچ آ ڈیہہ انا امن خطرہ ٹی ءِ‘ شاہ محمود قریشی

اسلام آباد (اے پی پی) وزیر خارجہ مخدوم شاہ محمود قریشی پارینے کہ بھارت نا ہندو تواسوچ و جارحانہ پالیسی تا سوب آن مچ آ ڈیہہ نا امن و سوگوی ءِ بھاز خطرہ مون تروک ءِ۔ داہیت ءِ او جمعہ نادے آ وزارت خارجہ ٹی علاقائی سلامتی نا بابت بڑزکو کہولی دیوان نا کماشی ءِ کرسا پارے۔ دیوان اٹی وزیر اعظم نا خصوصی کمکار قومی سلامتی معید یوسف، سیکرٹری خارجہ سہیل محمود، بڑزکو عسکری کمامدار و وزارت خارجہ نا سینئر آفیسر آک بشخ ہلکر۔ دیوان اٹی مقبوضہ جموں و کشمیر اٹی برجا بھارتی جارحیت و ڈیہہ ٹی امن و ایمنی نا جم حالیت آتا بابت سرجم گپ وتران کننگا۔ وزیر خارجہ پارے کہ بھارت، نا ہندوتوا سوچ و جارحانہ پالیسی تا سوب آن مچ آ ڈیہہ نا امن و سوگوی ءِ بھاز خطرہ مون تروک ءِ۔ اوپارے کہ بھارت اوغانستان اٹی امن نا کوشست آتے لتاڑنگ خواہک۔ بھارت مقبوضہ جموں و کشمیر اٹی برجا انسانی حق انا سنگین خلاف ورزی و تینا داخلی نزوری تیا پڑدہ شاغنگ کن لین آف کنٹرول نا خلاف ورزی تا کمک اٹ لس شاری تے شست کننگ ءِ۔ شاہ محمود قریشی پارے کہ چین، اتون سیمی جھیڑہ ٹی ہزیمت ہرفنگ آن پد ہم بھارت تینا ضد آسلوک ءِ۔ پاکستان مقبوضہ کشمیر اٹی بھارتی فوج کشی و انسانی حق انا پدریسہ خلاف ورزی تے اقوام متحدہ تون اوار ہر جہانی و علاقائی فورم آ چست کننگ ءِ۔ جہانی برادری بھارت نا دا جارحانہ رویہ نا دمدستی نوٹس ءِ ہلے۔ دیوان اٹی اوغان امن عمل تون اوار علاقائی سلامتی نا چندی باندات آتیا سلابت کننگا۔