صحافت راج انا ہروہ و خن تکنگک‘خورشید احمد جمالدینی

نوشکے (تلار حوالکار) صحافت راج انا روح و خَن تکنگک او کل تعصب تے اینک کرسا علاقہ ٹی جوان انگا کاریم تے مون آ اتسا تینا قلم نا کمک اٹ جوان کڑد ادا کے، نوشکے پریس کلب نا صحافیک نوشکے تون اوار مچ آ بلوچستان ءِ رواداری نا جوان ءُُ کلہو اس تسنے، صحافی برادری نوشکے نا ویل آتے میڈیا ٹی مون آ اتیر، صحافت اسہ جوان ءُُ پیشہ اسے ہرانا قدر ءِ ہر حالیت اٹ کننگک، دا خیال آتا درشانی ءِ نوشکے پریس کلب نا بلڈنگ (مرحوم) حاجی عبدالمجید بادینی کانفرنس ہال اٹ بلوچستان نیشنل پارٹی نا سینٹرل کمیٹی نا باسک میر خورشید احمد جمالدینی نا کنڈآن نوشکے پریس کلب رجسٹرڈ نا پوسکن گچین مروک آ کابینہ نا باسک آتا اعزاز اٹ تروک آ دود آن نوشکے پریس کلب نا پوسکن پن مروک آ صدر حاجی طیب یلانزئی، بی این پی نا سی سی باسک میر خورشید احمد جمالدینی، نذیر بلوچ، میر ثناء اللہ جمالدینی، جمعیت علماء اسلام نا حافظ عبداللہ گورگیج، شاعر و ادیب واجہ لطیف الملک بادینی، صحافی یعقوب بلوچ، بی ایس او پجار نا حق نواز بلوچ بی این پی نا زاہد بلوچ و چیف عطاء اللہ بلوچ تینا تران اٹ کریر۔ او پارینے کہ صحافت و صحافی راج ءِ مونی دننگ اٹ اہم ءُُ رول اس تسنو، جوان انگا صحافی ہمود ءِ ہرا علاقہ نا ویل آتے میڈیا ٹی مون آ اتے، ویل آتا ایسری کن اُلس نا ہیت آتے بنر، راست پاروک آتے ہر وخت توفک نا کمک اٹ چُپ کننگانے، سیاسی ورکر و صحافی ہر وخت راست پاننگ نا مشن ءِ مونی درینو، نوشکے تون اوار مچ آ بلوچستان ءِ نوشکے پریس کلب نا صحافیک رواداری نا کلہو تسنو، علاقہ ٹی ویل آتا ایسری کن میڈیا جوان ءُُ رول و کڑد اس ادا کننگ کیک۔