کورونانا دَین انا سوب آن سویلی ایشیاء ٹی لکھ آ چناتا نیزگار ی نا گمان ارے‘ یونیسیف

اسلام آباد (اے پی پی) اقوام متحدہ نا ذیلی ادارہ یونیسیف پارینے کہ کوروناوائرس نا دین انا سوب آن سویلی ایشیاء ٹی لکھ آ چناک نیزگاری نا لکیر آن شیف ہِننگ کیرہ۔ دین انا سوب آن 100 ملین آن زیات چناتا نیزگار مننگ نا گڑتی ءِ۔ کوویڈ۔ 19 نا زہم آک بھلو وخت اسسکان سلرہ۔ رپورٹ نارداٹ سویلی ایشیانا ملک آتے ٹی دنیا نا اسہ چارک آبادی مقیم ءِ ہرافتے ٹی بھارت، پاکستان، اوغانستان، نیپال، بنگلہ دیش، سری لنکا، مالدیپ و بھوٹان اوار ءُُ۔ دا ملک آتے ٹی چناتا کچ 600 ملین ءِ ہرافتیان 240 ملین چنامہالو آن نیزگاری ٹی زند ءِ تیر کننگ ءُُ و اوفتے جان جوڑی، غذائی کاختی تون اوار ایلو ویل آتا مہالوآن مون تروک ءِ۔ یونیسیف سویلی ایشیانا ریجنل ڈائریکٹر جین گوف پارینے کہ کوویڈ۔ 19 نا سوب بروک آ شش تُو اٹی 120 ملین چناتے نیزگاری و غذائی بے رکھ انا بھاز ویل آتا مون تروک مننگ کیک۔ اوپارے کہ وائرس آن بروک آ مچ آ چین نا آخبت و اومیت آک بھس مننگ کیرہ۔ رپورٹ اٹی مستی پاننگانے کہ کوویڈ۔ 19 نا دین آن مست ڈیہہ نا کم و ود 32 ملین چنااسکول آتیان پیشن ئسر ہرافتا کچ اٹی پین ودکی مننگ کیک۔ داکان بیدس لاک ڈاؤن و راجی فاصلہ غاتا پالیسی نارداٹ زیات وخت اُراتیٹی تیر کننگ اٹ چناتے گھریلو تشدد، ڈپریشن تون اوار دماغی صحت نا ایلو ویل آتا مون تروئی ہم تمنگ کیک داکان بیدس تینا تعلیم نا عمل ءِ برجاتخنگ نا کوشست کروک آ دیہی علاقہ غاتا چناتے انٹرنیٹ و بجلی اسکان رسینگ نا ویل آتیان ہم مشکل آتا مون تروک ءِ۔