فیڈل کاسترو (25)

ہفتمیکو بشخ :۔

داسہ پروجیکٹ و گچینی اتنگ نا کمک اٹ بے روزگاری نا ویل تینٹ ایسر مرو۔ و پبلک ہیلتھ اٹی جوانی و ناجوڑی نا برخلاف جنگ بھاز کم مشکل مرور۔

گڈ سر اٹی اسہ انقلابی حکومت اس تعلیمی نظام نا سوگو گچینی ءِ بنا کرو، و اودے ہمو پاننگوک آ پروجیکٹ نا وڑ اٹ جوڑ کرو، مسخت دا کہ ہمو نسل آتے تعلیم تروئی ءِ۔ ہرافتے کہ اسہ شرحال ءُ ڈغار اسے آ رہینگنگ نصیب مرو۔

پامدار نا دا لوز آتے گیرام دپبو: ”لاطینی امریکہ ٹی اسہ غلطی اس کننگ انگ اٹی ءِ۔“ ہمو ملک آتیٹی ہرافتا گزران کم و وَد سرجم وڑ اٹ ڈغار نا پیداوار آٹے‘ مخلوق ءِ سرجم وڑ اٹ شاری زند انا تعلیم تننگ انگ اٹی ءِ و اوفتے کشت و کشاری نا زندگانی نا ہیل کاری تننگ انگ اف۔ شرحال انگا ملک آک ہمودو ہرا کہ تینا مار تا خیالداری ءِ کیر، اوفتا راہشونی ءِ کیر، و اوفتے احساس نا کنڈ آ دیر۔

تعلیم نا ہروہ ہر وڑ اٹ استاد ءِ، کیوبا ٹی ٹیچنگ نا کسب کن بھاز کم پنداوڑی تننگک۔ ایہن ہرس تو کیوبا نا استاد آن زیات پین ہچ ءُ کسبکار اس دن چاہوک و کمٹڈ اف۔ مگہ ننے آن ہراسٹ چنکا سرکاری اسکول  اٹی تینا الف بے ءِخوانتنے؟ دا ہمو وخت ئِ ہراتم کہ ہمو ورنا انگا نرینہ و نیاڑی تے اسُل کم اٹنگا گزران کننگ والا زر آتے ہم تننگ ئِ بند کننگانے۔ ہرا کہ ننا ورناتے تعلیم تننگ نا پاک انگا زمواری تا سر تننگ اٹ اختہ ئُ۔ استاد اس 200 پیسو آن کم بایدے کٹپ۔ سیکنڈری ٹیچر ءِ”350“ پیسو آن کم بایدے رسینگپ۔ بایدے اوفتے گرج انا وخت آ بےدس ڈکھیائی تیان تینا زند ئِ آسراتی ٹی گدریفنگ نا وسیلہ دوئی مرے۔ و ہر پنچ سال آن گڈ ہچ مف اسہ وار کل استاد آتے تنخواہ تون اوار 6 تو انا چھٹی ہم دوئی مرے۔ تاکہ او تینا بشخ اٹی پوسکن آ شونداری تتون تینے ہم گام کننگ کن اُراٹی یا پیشن خاص وڑ انا ریفریشر کورس کننگ کیر۔ دا وڑ انصاف و ٹیچنگ سسٹم آسانی اٹ جوان مننگ کیک۔ دا کل اکن ہراکان پیسہ برو؟ ہراتم کہ حکومت نا فنڈ آتیٹی وڈی خوری ایسر مروتو گڑا؟ ہرا وخت کہ سرکاری کارندہ غاک ہمو بھلا کمپنی تتون ہڷ تس ئِ بند کیر تو۔ ہرافتا زی آ ریاست نا خراج آک اریر، ہرا وخت کہ ملک انا بے بہا غا وسیلہ غاتے جوان وڑ اٹ کاریم اٹ اتنگے، ہرا وخت کہ دا ملک اکن پین ٹینک بمبار و توپ ہلپن (ہرانا رکھ کننگ نا ہچ ئُ سیم اس اف، و ہراڑے کہ جنگ انا دا ازباب آتے، ہرا کہ داسہ ہلنگ انگ اٹی ئُ مخلوق نا برخلاف کاریم اٹ اتنگ انگ اٹی ئُ) مخلوق ئِ کسفنگ آن زیات اوفتے تعلیم تننگ اٹی چس ہلنگے تو گرج آن زیات پیسہ ساڑی مرو۔

کیوبا اینو تینا آبادی آن مسہ ہموخس زیات آبادی ئِ آسانی اٹ سنبھالنگ کیک۔ دا سوب آن کہ ساڑی باتی تا اسہ بندغ اسے نا شیفکو غریبی کن ہچ ئُ بہانہ اس ساڑی اف۔ مارکیٹ آتا گڑاتیان پُر مننگ باید ئِ۔ خزانہ نا پُر مننگ المی ئِ۔ کل دو تا کاریم اٹی اختہ مننگ المی ئِ۔ دا اسہ گمان آن پیشن ئُ سلاہ اس اف کہ اسُل مننگ کپ، ہرا ہیت گمان آن پیشن ئِ، او دادے کہ اسہ بندغ اس ہم ہمو وخت اسکان لنگڑ خاچپ تانکہ اسہ انچ اس ہم غیر پیداواری ڈغار مرے یا چناک جانجوڑی خیالداری تا کمبوتی نا سوب آن کہیر۔ ہرا ہیت گمان آن پیشن ئِ او دادے کہ ننا 30 درسد کشارگر ئِ تینا پن ئِ لکھنگ بفک۔ اوفتا 99 درسد ئِ کیوبا نا تاریخ نا بارو اٹ ہچ اسے نا سما اف۔ ہرا ہیت گمان آن پیشن ئِ او دادے کہ ننا خلقی آبادی نا بھلا کچ انا حالیت داڑان ہم زیات پراگندہ و خراب ئِ ہرا وخت انڈین آک کولمبس نا گچین آ گلزمین ئِ دریافت کریسُر۔ ہرا ہموتم اسکان بندغ و بندغی نا گمان آن پیشن ئس۔ مخلوق کنے تُغ خنوک پاہک، ای اوفتے مارٹی نا ہیت آتے پاننگ خواوہ، ”سچا غا بندغ ہمو کسر ئِ پٹپک ہراڑے فائدہ اس خننگے۔ بلکن او ہمو کسر ئِ دوئی کیک ہراڑے زمواری ساڑی مرے، و بیرہ ہمو عملی ئُ بندغ اسے ہرانا اینو نا تغ پگہ نا کانود جوڑ مرے۔ دا سوب آن کہ او تینا تاریخ نا المی ردوم ئِ خنانے و بھلو گیری اس وخت انا دیگ اٹی بسسونے، و دتر وہفسا بندغ آتا جم و جوش ئِ ہُرانے، او چاہک کہ بیدس استثنیٰ غان آخبت نا زمواری تے سر تروئی ءِ۔“

ہفتئی تلار
تاک: 10
۔06-12 فروری 2021ء
پنہ: 04