دے ٹِک ادبی دیوان مستونگ نا کنڈ آن ملک فیاض علی بلوچ نا شرفمندی ٹی مشاعرہ

گدرینگوک آ دے، دے ٹِک ادبی دیوان مستونگ نا کنڈ آن پنی آ شاعر ادیب آماچ ادبی کاروان مستونگ نا صدر ملک فیاض علی بلوچ نا شرفمندی ٹی پرچس ءُ مشاعرہ اس اڈ تننگا۔

مشاعرہ ٹی دے ٹِک ادبی دیوان نا سنگت آتیان بیدس ایلو جہی آ شاعر ادیب و ادب دوست آتا ہم اسہ جوان ءُ گونشت اس ساڑی ئس۔ مشاعرہ نا بنا رب تعالیٰ نا پن آن کننگا، تلاوت نا بختاوری ءِ دے ٹِک ادبی دیوان نا عہدیدار حافظ عادل محمود دوئی کرے۔ دا کچاری نا کماشی ءِ دے ٹِک ادبی دیوان نا صدر ہدایت فدا کرے۔ شونکاری نا دود آتے بہاول نسیم بنگلزئی سر تس۔

دے ٹِک ادبی دیوان نا صدر ہدایت فدا تینا تران اٹی خاص انگا مہمان ملک فیاض علی بلوچ و مشاعرہ ٹی ساڑی مچ آ شاعر ادیب و ایلو ادبی ادارہ غاتا عہدیدار و باسک و ادب دوست آتا منت ءِ ہرفے۔ او پارے کہ دے ٹِک ادبی دیوان ہمو ادبی آ ادارہ ءِ کہ او تینا کہنہ مشق آ شاعر ادیب و ادب کن خذمت سر تروک آ خواجہ غاتے ہچ ءُ وخت اس است آن دتنے، او پارے کہ اینو نا دا پرچس آ گچین آ مشاعرہ ملک فیاض علی بلوچ نا شرفمندی ٹی اڈ تننگ آن کنے بھاز خوشی مس، و داڑتون اوار ننا بختاوری اس ہم ارے کہ دا مجلس اٹی مستونگ نا کل شاعر ادیب آک نن تون اوار ءُ۔ او پارے کہ زبان و ادب نا شونداری کن ملک فیاض علی بلوچ نا کروک آ ادبی خذمت آک مستونگ و مستونگ آن پیشن مچ آ بلوچستان اٹی کس آن ڈکوک افس، انتئے کہ ملک صاحب سدائی اخلاص و سچائی اٹ زبان و ادب کن گچین ءُ کڑد ادا کرینے۔ او کچاری ٹی ساڑی مچ آ شاعر ادیب خواجہ غاتا منت ءِ ہم ہرفے۔

داکان گڈ مشاعرہ نا خاص انگا مہمان ملک فیاض علی بلوچ تینا تران اٹی پارے کہ ای دے ٹِک ادبی دیوان مستونگ نا کل عہدیدار و باسک آتا منت ءِ ہرفوہ کہ اوفک کنے شرف تسر، و کنا شرفمندی ٹی دا مشاعرہ نا بست و بند ءِ کریر۔ او پارے کہ دے ٹِک ادبی دیوان اسہ چنکو وخت اسے ٹی اخلاص و است خواہی اٹ ادب نا پڑ آ ہرا ادبی کڑد ءِ ادا کرینے، او ستا کڑزک۔

او پارے کہ زبان و ادب کن ہرا بندغ آک یا ہرا ادبی ادارہ غاک اخلاص و سچائی اٹ اگہ ادبی کڑد ادا کیرہ تو اوفتا ہمو کروک آ ادبی خذمت آک راج اٹی سدائی شرف و شان اٹی یات کننگرہ۔ او پارے کہ دا جاگہ نا ادبی ادارہ غاک تینا وس اٹ ادبی شونداری کن جوان ءُ ادبی خذمت کرسا کننگ ءُ۔ ای اومیت کیوہ کہ ننا ورنا شاعر آک و ایلو کہنہ مشق شاعر ادیب خواجہ غاک ادب نا پڑ آ سدائی ادبی خذمت کرسا کرور۔ ای تینا کنڈ آن ادب کن کروک آ ہر اسہ ادبی ادارہ تون کمک کن تیار اُٹ۔

داکان پد براہوئی اکیڈمی مستونگ لڑ انا جنرل سیکرٹری عبدالحیات منصور تینا تران اٹی پارے کہ دن انگا ادبی مجلس آتا اڈ تننگ آن زبان و ادب نا پڑ آ زیات شونداری دوئی مریک۔ او پارے کہ مستونگ نا ادبی ادارہ غاک دا جاگہ نا شاعر ادیب آک زبان و ادب کن گچین کڑد ادا کننگ ءُ۔ او پارے کہ دے ٹِک ادبی دیوان آن بیدس ایلو ادبی ادارہ غاک ہم سدائی تینا زبان و ادب ءِ زندہ تخنگ کن زیات آن زیات نت دو خلسا کیر۔

راہشون ادبی دیوان نا عہدیدار شاعر ادیب، پولکار حمید عزیز آبادی تینا تران اٹی پارے کہ تینا لمئی آ زبان نا شونداری و راج انا راہشونی ہر شاعر و قلم کار نا اولیکو زمواری ہم ارے، او پارے کہ دے ٹِک ادبی دیوان مستونگ نا دا اینو نا کچاری ءِ اڈ تننگ آن کنے بھاز خوشی مس، ہندن مستونگ نا ایلو کل ادبی ادارہ غاک ہم تینا زبان و ادب نا شونداری و تین پہ تین اسٹی نا جوزہ غاتے مون آ تخسا ادب نا پڑ آ گام کرسا کیر۔

براہوئی اکیڈمی مستونگ نا عہدیدار ذاکر عظیم تینا تران اٹی دے ٹِک ادبی دیوان نا ادبی کڑد انا ستا ءِ کرسا پارے کہ ہمو راج آک اسُل پد سلپسہ، ہرافک کہ تینا زبان و ادب ءِ زندہ تخرہ۔ او پارے کہ مستونگ نا زیبدار آ ڈغار ہمے وخت اسے آن زبان و ادب نا بنداوی ءُ ہند اس مسنے۔ اینو ہم ننا شاعر ادیب و ادبی ادارہ غاک تینا زبان و ادب نا شونداری کن گچین ءُ کڑد ادا کننگ ءُ۔ او پارے کہ زبان و ادب نا شونداری کن کروک آ ملک فیاض علی بلوچ نا خذمت آک کل انا مون آ پاش ءُ، انتئے کہ ملک صاحب سدائی زبان و ادب نا کاریم تیٹی مخ تفوک سلوک مسنے۔

پنی آ شاعر ادیب دانشور سید غریب شاہ انجم تینا تران اٹی دے ٹِک ادبی دیوان نا ادبی کاریم تا ستا ءِ کرسا پارے کہ اینو نا دا کچاری کہ ملک فیاض علی بلوچ نا شرفمندی ٹی اڈ تننگانے، دا اسہ گچین ءُ کچاری اسے۔ ملک فیاض علی بلوچ ہمو پنی آ شاعر ادیب ءِ ہرا کہ اسہ بھلو وخت اسے آن زبان و ادب کن سخت اٹ خذمت کرسا بسنے۔ ملک فیاض علی بلوچ ادب نا پڑ آ اسہ بھلو پن اسے نا خواجہ ہم ارے۔ او پارے کہ ننا ادبی زمواری ءِ کہ نن تینا بروک آ نسل آتے تینا پنی آ شاعر ادیب آتا بارو اٹ معلومداری ایتن۔

براہوئی اکیڈمی مستونگ لڑ انا عہدیدار مکتبہ مولانا عبدالخالق ابابکی نا سرکڑدہ مولانا مفتی محمود تینا تران اٹی پارے کہ کنے اینو نا دا کچاری ءِ اڈ تننگ و ملک فیاج علی بلوچ نا ادبی کڑد آ روشنائی شاغنگ آ بھاز خوشی مسنے، کہ ملک فیاج علی بلوچ اسہ پنی ءُ شاعر ادیب دانشور اسے نا حیثیت اٹ زبان و ادب نا پڑ آ گچین ءُ ادبی کڑد ادا کرینے۔ ملک صاحب تینا ادبی تنظیم نا پلیٹ فارم آن چندی شاعر ادیب آتا شاعری و نثری کتاب ہم شینک کرینے۔ او پارے کہ دے ٹِک ادبی دیوان نا سنگت آک ملک فیاض علی بلوچ نا شرفمندی ٹی دن ءُ مجلس اس اڈ تننگ آ مبارکبادی کڑزرہ۔

پنی آ شاعر ادیب فتح محمد شاد تینا تران اٹی دے ٹِک ادبی دیوان نا ادبی کاریم تا ستا ءِ کرسا پارے کہ اینو نا دا پرچس آ کچاری تینا مٹ تینٹ ءِ۔ او پارے کہ ملک فیاض علی بلوچ نا شخصیت ہچ ءُ سفت اسے نا آہری اف۔ ملک صاحب بھلو وخت اس زبان و ادب کن جوان خذمت کرینے۔

پنی آ شاعر ادیب ملک ریاض علی بلوچ تینا تران اٹی پارے کہ ملک فیاض علی بلوچ نا شرفمندی ٹی دے ٹِک ادبی دیوان نا کنڈ آن دن ءُ گچین ءُ مجلس اس اڈ تننگ ادب نا پڑ آ اسہ بھاز جوان ءُ گام اسے۔ ننے کل ءِ سما ءِ کہ ملک صاحب بھلو زمانہ اسے آن ادب نا پڑ آ گچین کاریم سر تسنے۔ او پارے کہ ادبی کچاری اڈ تننگ آن ادب نا پڑ آ شونداری ودی مریک۔ ہندن نن تینا کہنہ مشق ادیب خواجہ غاتا لائخی تیان زیات فائدہ دوئی کننگ کینہ۔ او پارے کہ کل ادبی ادارہ غاتا دا زمواری مرے کہ اوفک تینا کہنہ مشق آ شاعر ادیب آتا ادبی کڑد ءِ مون آ اتنگ کن سدائی دن ءُ مجلس اڈ ترسا کیر۔ ہندن ننا ورنا شاعر ادیب آتا است بڈی تون اوار اوفتا است اٹی ادبی جوزہ غاک پین زیات مرسا کیر۔

داکان بیدس ہفت زبان شاعر لعل محمد لعلن، واحد مزار، حافظ عادل محمود، و ایلو شاعر ادیب آک ہم دے ٹِک ادبی دیوان نا ادب کن کروک آ گچین آ کاریم و کڑد انا ستا ءِ کریر۔

دا مشاعرہ ٹی ہرا شاعر خواجہ غاک تینا کلام ءِ بنفیر اوفتیٹی ملک فیاض علی بلوچ، حمید عزیز آبادی، فتح محمد شاد، مفتی محمود، سید غریب شاہ انجم، اے جی بلوچ، ملک ریاض علی بلوچ، حافظ عادل محمود، بہاول نسیم بنگلزئی، ملک لعل محمد لعلن، ہدایت فدا، واحد مزار، و ایلو خواجہ غاک ساڑی ئسر۔

ہفتئی تلار
تاک: 26
16-10 جولائی 2021ء
پنہ: 07