است انا چنکا دنیا۔۔۔۔۔۔انشائیہ

استو اے سی خضدار اسہ ’حکم نامہ‘ اس جاری کرے کہ کل ہوٹل والاک پگہ غان ماسک بینر۔ چار بندغ آن زیات اوار تولنگ کن الیپس۔ کرونا وائرس نا خلیس آن دنیا جہان اٹی اسہ بھیم اس تالان ءِ۔ ماشاءاللہ ننا حکومت ہم تینے نشان تننگ ءِ۔ سہب اتون ای بازار آ بسٹ، دا ہیت آتیان اسٹ اس ہم اَلو۔ عظیم خان خازگ آن امپوک تینا ہوٹل آ چا بسنگ اٹی ئس۔ باروالا تا تینا بدن نا ہر جاگہ ءِ خواریفسا چا انا کوپ ءِ ہرکس آ سر کریکہ۔ بندغ آک زی پہ زی آ تولوک چا کنگرہ۔ اخبار نا خبر دا ئس کہ کوئٹہ ٹی کرنٹائن سینٹر آن استو کرونا وائرس نا ناجوڑ اس نرّانے۔ ناجوڑ آتا پاننگ ءِ کہ داڑے نن بتّر ناجوڑ مرینہ۔ اسہ ڈاکٹر اس ہم اف۔ بندغ آک زی پہ زی آ، نئے دیر، نئے بجلی۔ بد حالی ءِ بدحالی۔

اسہ ”1“ نمبر نا فراڈ اس فون کرسا کنے اسلام نا زی آ لیکچر نا بناءِ کرے۔ پارے ”کرونا کافر تے لگک، نن مسلمان آتیان ہرکس اٹ زرہ اس ہم ایمان ارے، اوڑان بچک۔“ ای پاریٹ ”دا ہیت ءِ سعودی عرب نا حکمران آتے پا۔ بیت اللہ ٹی طواف ءِ بند کرینو۔“

است انا دنیا حسن، عشق، عقیدہ و ایمان آن جوڑ ءِ۔ عقل انا دنیا، شعور، تعلیم و تربیت آن جوڑ ءِ۔ عقل انا دنیا خرین آ حقیقت تون مون ترفک، است انا دنیا دروغ نا کسر اٹ خوش کیک۔ کنا است پاہک کہ شاعرانہ غا زند کن تون مرے۔ بہار، گلاب و ہتم تون مچ آ ڈغار خیسن و خرن مرے۔ ہر پارہ غا جنت نا ندارہ مرے، کن تون نما اواری کچاری مرے۔ نا خیسن آ جوڑ تیان تموک آ ہیت آک کن کن گواڑخ نا پھل ءُ۔ نما اواری نا ’احساس‘ اسہ ہنین ءُ زباد آنبار است و مزغ اسے روشنا کیک۔ نا خنک تغی تغی آ کنا ہوش ءِ دیرہ۔ ہنداکان ایپار ہمو دنیا ءِ، ہراڑے کنا تغ تا دنیا ءِ۔ ہراڑے پین کس اف۔ ہراڑے بیرہ نا اواری نا زباد ءِ محسوس کیوہ۔ ہراڑے دنیا نا دڑد و غم ڈکھ آک ہنور۔ ہراڑے کرونا وائرس، اے سی نا حکم نامہ، حکومت نا نالائخی اف، و ہراڑے لٹ و پل، دروغ و فراڈ، قسم و قرآن، رشوت، بے ایمانی، خازگ و گند، ناس و سگریٹ، نالی تا گند، روڈآتا زی آ مخلوق نا گڑا بہا کننگ، ناجوڑ آ ککڑ آتے بہا کننگ، ناجوڑ آ ہیٹ و مِر تا سُو تے ایلوفتے کنفنگ، ہچ اف۔ بیرہ کنا است انا دنیا ءِ۔ بس ہندادے کہ دا دنیا اسے بھاز چنکو۔