ننا بولیک ننا پجار….انڈس کلچر فورم                   1

انڈس کلچرل فورم تدوک آ پنچ سال آن لمئی بولی تا جہانی دے انا رد اٹ ’داپار ایپار‘ نا تاریخ آتیان شنبے یک شنبے ءِ گچین کرسا مسہ دے ئی میلہ اڈ ایتک۔ ہراٹی لمئی بولی تیٹی شینک مروک کتاب آتا مون پاشی کننگک، و دا رِد اٹ اسہ جتا ءُ وڑ اس دوئی کننگک، ہرا پین مف کن کن عجب ارے۔ کہ ہرکس ءِ تینا کتاب نا تینٹ درستی راستی ءِ کرفوئی تمک۔ دانا سوب ءِ نیاز ندیم آن سوج کریٹ تو پارے کہ مون پاشی مروک آ کتاب آک ہرا بولی ٹی مریرہ،اوفتا درستی راستی کن ساڑی بندغ آتیان بھلو کچ اس ہمو بولی نا بابت ہچ اس ہم تپک۔ و دا دیوان تیٹی اسہ مسخت اس دا ہم مریک کہ کتاب خواجہ نا جند انا درستی راستی کرفنگ ہم ارے۔ گڑا دا وڑ کننگ آن کتاب و کتاب خواجہ ہڑتوم آتا درستی راستی ہم مریک۔ دا ہیت اٹ ’وزن‘ ارے اف، دانا سما اف، ولے بیوسی ئس۔ ہندن کروئی تما، ہرا وڑ کہ اوفتا است خواہسکہ، انتئے کہ اوفک داخس بھلو خواری اس کرسا، بیست آن زیات زبان تے، اوفتا کتاب آتے، و اوفتا کتاب خواجہ غاتے اسہ ہند آ مچ کیرہ، تو اوفتا است خواہی تیان ہم نمن مننگ کپک۔ مون نا وار 2017ءٹی ہراتم دا دیوان اٹ ہننگ نا وار رسینگا، تو او وخت آ ہم کنا کتاب اسے ’لمئی بولی تیٹی ترجمہ‘ نا بشخ اکن گچین کننگاسس۔ و ای ”پند رند“ نا درستی راستی ءِ کرفیٹ، و ہندن تینا و تینا بولی نا ہم اخس کہ دہ منٹ اٹ کنے آن مننگ کریکہ، بابت حوال تسٹ۔ دا وار 2019ءٹی شینک مروک کتاب آتا رد اٹ ہم کنا کتاب ”ارمان تا بھرم“ ءِ ہندا بشخ اکن گچین کننگا۔ تو فروری 2020ءانا میلہ ٹی براہوئی زبان نا نمائندگی کن ای، پروفیسر ڈاکٹر لیاقت ”چکار:شاعری“، پروفیسر حسن ناصر ”چیہانٹ: افسانہ“، کریم فریادی ”منج: شاعری“، اکرم ساجد ”تُوبے نا سفر: ناول“ اوار ئسر۔

دا پنچمیکو میلہ ٹی کتاب آتا درستی راستی آن بیدس، مذاکرہ، مشاعرہ، و موسیقی تون اوار ایلو ازمکاری بشخ آتا دود آک ہم اڈ تننگار۔ لمئی بولی تا پنچمیکو ادبی میلہ ٹی ملک و درملک آن یک و نیم سَد نا کچ ادیب، شاعر، پولکار، صحافی، و نقاد ساڑی ئسر۔ مون نا وار میلہ ٹی دے انا مسہ دیوان، مسہ ہند آ اسہ وخت آ اڈ تننگارہ، وخت اس کہ دا سال اِرا دیوان اسہ وخت آ اڈ تننگ نا وڑ و ڈَول اس سجفنگاسس۔ دافتیان اسہ دیوان پی این سی اے نا ”کانفرنس روم“ و ایلو ”لیکچرہال“ اٹی مسکہ۔ و دے اٹ اِرٹ اِرٹ کرسا ہشت دیوان مسرہ۔ دُن تو میلہ نا بنا 21 فروری آ مس، و بنائی دود آک اڈ تننگار۔ ہراٹی انڈس کلچر فورم نا است خواہی و کوشست آتا تالان ءُ جاچ اس پیش کننگا، و ایلو روایتی دود آتتون اوار کتاب آتا مون پاشی ہم کننگا، و ہندن موسیقی و چاپ انا دود آک ہم مسر۔ ولے میلہ نا اصل کارروائی تا بنا ارٹمیکو دے 22 فروری آ بنا کرے، ہراٹی اِرا مذاکرہ تخنگاسر، کانفرنس روم اٹی ”لمئی بولی تیٹی شینک مروک پوسکن آ ناول“ آتا مون پاشی کننگا، و دافتا درستی راستی کننگ تون اوار اوفتیا شرہ ہم کننگا۔ و بنوک آتا کنڈ آن سوج آک ہم کننگار، ہرافتا ورندی ءِ ناول خواجہ و گودیک تسر۔ دا بشخ انا شونکار ارشد وحید ئسکہ۔ دا بشخ اٹی براہوئی زبان نا کنڈ آن ”اکرم ساجد: تُوبے نا سفر“، پشتو پشتو نا ”پرویز شیخ: تلاش“ اُردو نا ”خالد فتح محمد: زینہ“، سندھی نا ”ابرہیم کھرل: رشتن جی خانہ بدوشی “، پنجابی نا ”شاہد شیدائی: پہلی نیندر مگروں“، اُردو نا ”ڈاکٹر حمیرہ اشفاق : می سوزم“ پینل اٹ ساڑی ئسر۔ یات سلے کہ ڈاکٹر حمیرہ اشفاق نا ناول نا سرحال بلوچستان نا گودی شاعر ”رابعہ خضداری“ نا کِسہ غان ہلوک ئس۔غٹ مہمانک لمئی بولی تیٹی زیات آن زیات ادب تخلیق کننگ، و خاص وڑ اٹ ناول نوشتہ کننگ آ زور شاغار۔ دا وخت آ اسہ پین گڑا سے نا ہم سما تما کہ پاکستان اٹی کل آن زیات ناول سندھی ٹی نوشتہ کننگانے، و کل آن کم ناول پنجابی ٹی نوشتہ مسنے۔

ایلو کنڈ آ پی این سی اے نا زیبا غا لیکچر ہال اٹی ”پرائمری کہول آ لمئی بولی تیٹی تعلیم، چیلنج و وارخواہی“ نا سرحال آ مذاکرہ نا شونکار امجد نذیر ئس۔ دا مذاکرہ نا پینل اٹ ڈاکٹر طارق رحمان، گودی نرگس سلطانہ، خیبر پختونخواہ ٹیکسٹ بک بورڈ انا نمائندہ گودی ڈاکٹر نگہت یاسمین، بلوچستان ٹیکسٹ بک بورڈ انا نمائندہ شوکت ترین، دی سٹیزن فاﺅنڈیشن نا نمائندہ اجے پنجالی، پاکستان کولیشن فار ایجوکیشن نا نمائندہ زہرہ ارشد و پاکستان ریڈنگ پروجیکٹ نا عامر لطیف صدیقی ساڑی ئسر۔ دا مذاکرہ ٹی بشخ ہلوک آک دا ہیت آ امنا کریر کہ چنا تے پرائمری اسکان اوفتا لمئی بولی تیٹی تعلیم تننگے۔ ولے سوج دا ئس کہ دا گچین آ کاریم ءِ سر امر تننگے۔ انتئے کہ دا حکومت آتا کروک ءُ کاریم اسے۔ نن تو بیرہ توار چست کننگ کینہ، و توار چست کرسا کانہ۔ لمئی بولی تا میلہ خلسا کانہ۔ مذاکرہ ٹی ساڑی غٹ بشخندار آک ہیت و گپ آتیٹی تینا تینا علاقہ غاتیٹی لمئی بولی تیٹی تعلیم نا کسر نا اڑنگ آتا ہیت ءِ سرجمی اٹ کریر، و سلاہ ہم تسر۔

(برجا ءِ)