فیڈل کاسترو (19)۔

دا وڑ جنگ کیرہ بندغ آک، داوڑ تینا آجوئی ءِ دوئی کننگ خوارہ، او بالی جہاز آتیا خل خسرہ۔ و ٹینک آتے چَپّی کیرہ، ہندن سنتیا گوڈی کیوبا ننا دوٹی بس تو نن دم دستی وڑ اٹ اوریانٹے نا بندغ آتے جنگ اکن تیار کرینہ۔ باقاعدہ کاؤٹو دریاب نا رہی آ ننا ایڈوانس آ سنگت آتا پوزیشن ءِ چاہنگ کن بایامو آ جلہو کننگا۔ دادے وخت اس ہم گیرام دپیرے کہ دا صوبہ ٹی اینو 15 لکھ انسان رہینگرہ دا کیوبا کل آن باغی و محب وطن انگا صوبہ ءِ۔ دا ہمو صوبہ ءِ ہرا کہ 30 سال اسکان آجوئی کن جنگ کننگ کن خاخر دسسا کرے، و دانا بھلو بدل اس تینا دتر، قربانی و ہیروازم اٹ ترسا ہِنا۔ اوریانٹُو ٹی نم داسکان ہمو شاندار انگا جنگ نامہ نا تہو اٹی ساہ ہلنگ کیرے۔ سہب سبائے مڑدان، ہرا وخت آ بانگو بانگ ایتک سپاہیک فوج ءِ بش کننگ نا بگل خلیرہ، و ہرا وخت آ کھڈ بینٹ و آ مش تیا روشنا ءُ دے اس پیش تمک تو لگک کہ اسہ وار ولدا نن زند مرون۔

ای بیان کرینُٹ کہ سرسہبی کن گمان نا ارٹمیکو ہرا سلاہ ءِ نن بنداو جوڑ کریسُن او راجی یکوئی نا ئس۔ نن مخلوق نا مخ تفی نا بابت انتئے پک کریسن؟ ہرا وخت آ نن مخلوق نا ہیت ءِ کینہ تو نن اوفتا ہیت ءِ کپنہ ہرا کہ آرام آسودئی تے ٹی رہینگرہ۔ قوم انا رجعت پسند آک ہرا کہ ہر وڑ انا بیداد کروک رجیم نا ستا ءِ کیرہ۔ ہر وڑ انا ڈکٹیٹر شپ نا، ہر وڑ انا بیداد نا۔ وخت انا خواجہ غاتا مون آ کاٹم ءِ شیف کیرہ۔ تانکہ اوفتا پیشانی تے ڈغار اٹی نسپس۔ ہرا وخت آ نن جہد و کوشست نا ہیت ءِ کینہ و مخلوق نا ہیت ءِ کینہ، تو نن اوڑان زیات تالان پین ہِچ اس خنپنہ، مخلوق نا ہیت ءِ کرسا کینہ، ہراڑتون ہر بندغ بیرہ قول کیک، و ہراڑتون کل درو کییرہ، ننا مطلب ءِ ہمو مخلوق ہرا کہ اسہ جوان ءُ زیات شرفمند و زیات انصاف پسند قوم اسے نا است خواہی ءِ کیرہ۔ ہرافتے انصاف کن بنداوی ارمانک زہمی کیرہ۔ دا سوب آن کہ او چین تیان بے انصافی و بے شرفی نا عذاب آتے سگسا بسنو۔ ہموفک ہرا کہ تینا زند انا کل بشخ آتیٹی عظیم و عقلندہ ءُ بدلی سے کن ارمان اس تخرہ۔ ہرا کہ ہمو بدلی تا دوئی کننگ کن تینا گڈیکو سا اسکان تیار ءُ۔ ہرا وخت آ کہ اوفک اسہ گڑا یا اسہ بندغ اسے آ پت کیرہ، خاص وڑ اٹ ہرا وخت آ کہ او تینے آ باور کیرہ۔ ہر کوشست اٹی سِخت و نیک نیتی نا اولیکو شڑت ءِ جوان وڑ اٹ پورو کروئی تمک۔ ہرادے کہ پین کس اس ہچ گہس ہم کننگ کپک۔ یعنی ہر خلیس آن ایڑتر پک وضاحت تون اوار ہیت کننگ، بازاری آ کماش آک و کسبی سیاستدانک ہرا کہ ہرگڑا نا بارو اٹ درست مننگ نا معجزہ ءِ کننگ و کس ءِ خوش کننگ نا اداکاری ءِ کننگ کیرہ۔ او پک ءِ ہر گڑا نا بارو اٹ ہر اسٹ تون درو کرسا کارہ۔ انقلابی تے المی وڑ اٹ تینا خیال آتے جیرتی وڑ اٹ بیان کروئی تمک۔ تاکہ کس اتون ہم دغا مف، نئے دشمن تون، نئے دوست آتتون۔

جہدو کوشست نا بشخ اٹی، ہرا وخت آ مخلوق نا ہیت ءِ کینہ تو نن ہمو 600 ہزار کیوبائی تا ہیت ءِ کننگ نا گیگ کینہ کہ ہرافتے روزگار اف۔ ہرا کہ ہڑدے نا تینا دے نا گزران نا پٹ و پول اٹی تینا وطن آن بے امپ و لڈ آن ایمانداری اٹ باخو اس کٹنگ خوارہ۔ پنچ سد ہزار کشاری مزور ہرا کہ بھاز ڈکھ و سختی اٹ گدان تیٹی رہینگرہ، ہرا کہ سال انا چار تُو کاریم کیرہ، و ایلو دے تے لنگڑی بینگنی اٹ گدریفرہ۔ تینا بدبختی ءِ تینا چنا تتون اوار شریدار کیرہ، ہرافتتون دسنگ کن اسہ انچ ڈغار اس ہم اف۔ و ہرافتا وجود ہر بندغ نا است ءِ سرفک۔ ہمونا ہرانا کہ خل انا اُست اس مف۔ چار سد ہزار صنعتی مزور ہرافتا ریٹائرمنٹ فنڈ آک کننگار۔ ہرافتا بینیفٹ ءِ پدی کننگ انگ اٹی ءِ۔ ہرافتا اُراک لنگڑی مفلسی نا ہنکین جوڑ مسنو۔ اوفتا تنخواک مالک آتا دُو آن وام تروک آتا دوتیٹی ہننگ اٹی ءُ۔ ہرافتا آخبت کمبوتی و اف آن حساب آٹے۔ ہرافتا زند انا ایسر اسکان کٹپروک ءُ کاریم اسے۔ او ہرافتا آخبت بیرہ قبر اٹی مرو۔ سد ہزار چنکو کشار گر، ہرا ہمو ڈغار آ زند تدیفرہ و ہموڑے کہیرہ ہرا کہ اوفتا جند انا اف۔ او ہمو ڈغار ءِ بھاز ارمان اٹ ہررہ۔ ہراڑان حضرت موسیٰ بنی اسرائیل نا ”ارضی موعود“ ءِ ہُراکہ۔ او پک ءِ کہ اونا ملکیت ءِ بے دوئی کننگ آن کہور۔ ہرافتے فیوڈل سرفون آنبار ڈغار نا ہمو ٹِکری نا کاریم اٹ اتنگ کن زرتس ہندن ءُ وڑ اسے ٹی کروئی تمک کہ اونا پیداوار نا اسہ بشخ آن دزکش مرے۔ ہراکہ اوفتتون مہر کننگ کپسہ، اوٹی جوانی اتنگ مفک۔ دادے زیبدار جوڑ کننگ مفک۔ نئے اوڑا اسہ اپڑس یا مالٹا نا درخت اس خلنگ کیرہ۔ دا سوب آن کہ اوفتے سما تمپک کہ ہرا وخت آ خلقی گارڈ یا باہوٹ تون اوار اسہ تھانیدار اس اوفتے اوڑان کشنگ کننگ کن برے۔

ہفتئی تلار
تاک: 04
23-29 جنوری 2021
پنہ: 02