اقتدار اٹ بسن تو ایم ایف پروگرام نا پلو ءِ ہلینہ، عمران خان

لاہور: تحریک انصاف نا چیئرمین عمران خان پارینے کہ ای دا سال گچین کاری تیٹی گیشتری دوئی کننگ نا اومیت گنڈانٹ۔ حکومت نا دوٹی بننگ آن پد زرگزران نا سیبو تننگ و ڈیفالٹ نا گڑتی تے توننگ کن آئی ایم ایف پروگرام آ کاوہ۔ ننے سری لنکا کون ءُ حالیت اسے نا گمان پلویڑ کرینے، شوکت ترین ءِ دوارہ وزیر خزانہ پن کیوہ، زرگزران ءِ سیبو تننگ کن آئی ایم ایف آ سیبو کننگ آن بیدس پین ہچ ءُ کسر اس سلتنے، ٹرمپ تون تعلقداریک گچین ئسرہ، جوبائیڈن نا گچین مننگ آن پد تعلقداریک خراب مسر، امریکہ اوغانستان آن پیش تمنگ ءِ پین اسے نا لخ اٹ خلنگ کن ننے آن خَر کرے، امریکی شینکار ادارہ بلوم برگ تون ہیت وگپ کرسا عمران خان نا پاننگ ئس کہ اگہ پی ٹی آئی اقتدار اٹی پدی بس تو اوڑتون آئی ایم ایف آ سیبو کننگ آن بیدس پین ہچ ءُ کسر اس سلتنے۔ حکومت اٹی بننگ آن پد نن تون بھلو وخت اس مفک، و دمدستی فیصلہ کروئی تمک۔ عمران خان پارے کہ ننا حکومت ءِ اقتدار اٹ بننگ آن پد بھاز بھلو بے کچ ءُ پالیسی جوڑ کروئی تمک۔ ننے سری لنکا کون ءُ حالیت اس مون تروک ءِ، اقتدار اٹی پدی بسٹ تو شوکت ترین ءِ دوارہ وزیر خزانہ پن کیوہ۔ او پارے کہ کنا حکومت نا مسکوہی امریکی صدر ڈونلڈ ٹرمپ تون تعلقداریک گچین ئسرہ، ولے جوبائیڈن نا گچین مننگ آن پد دا تعلقداریک خراب مسر۔ ہراتم جوبائیڈن اقتدار اٹی بس تو کنے اسہ سوب اسے آن اونا ہَز انا درک لگا، اونا پاننگ ئس کہ پاک امریکہ تعلقداریک دا سوب آن خراب مسر، کہ امریکہ ءِ اوغانستان آن پیش تمنگ نا دوبہ ءِ کس اسے آ خلوئی ئسکہ۔ مسکوہی وزیر اعظم دا ہیت ءِ ہم پارے کہ اونا حکومت اسہ آجو خارجہ پالیسی اسے آ عمل کیک، ہرا پین ہچ ءُ ملک اسے آن سیبو ہلپ۔ عمران خان پارے کہ مچ آ سیاسی اشرافیہ کنے آن بد بیسہ ءِ، دا وخت آ ای خُلنگ اُٹ کہ کنا دشمن آک زوراک ءُ۔ او گڑتی درشان کرے کہ اودے اقتدار آن مُر تخنگ کن بروک آ گچین کاری تیٹی دھاندلی مننگ کیک۔ او پارے کہ ننے سما ءِ کہ رجیم چینج نا زموار دیر ئس؟ ہرا تدوک آ سال پی ٹی آئی ءِ اقتدار آن کشفنگ نا سوب مس۔

(آن لائن)