قرآن پاک نا بے حرمتی نا واقعہ غاک اسلام فوبیا نا بشخ ءُ، دفترخارجہ

اسلام آباد :  پاکستان سویڈن و ہالینڈ اٹی قرآن پاک نا بے حرمتی نا ساڑی آ کارروائی تا ترندی اٹ مذمت ءِ کرسا پارینے کہ دا قابل مذمت و است ہسون واقعہ غاتیان مچ آ دنیا نا یک و نیم ارب آن زیات مسلمان تا مذہبی جوزہ غاک مجروح مسنو۔ دفترخارجہ نا ترجمان ممتاز زہرا بلوچ پنچ شنبے نادے آ ہفتہ وار پریس حوال اٹی پارے کہ نن قرآن پاک نا بے حرمتی نا دا واقعہ غاتے کونسل پرستی، زینو فوبک و اسلامو فوبیا نا وڑاٹ ہرنہ۔ ترجمان پارے کہ دا قابل مذمت و است ہسون واقعہ غاتیان مچ آ دنیا نا یک و نیم ارب مسلمان تا مذہبی جوزہ غاک مجروح مسنو۔ اوپارے کہ داواقعہ غاتا اسٹ انگا مسخت مسلم اقلیت آتا برخلاف بیدادی ءِتہو تننگ ءِ پاکستان سویڈن و ہالینڈ ءِ تینا گڑتی تیان معلومدار کرینے و ہڑتوم آ ملک آتا حکومت آ زور شاغانے کہ او اسلاموفوبیا نا کارروائی تا برخلاف پبی گام گیج کیر۔ ایلو کنڈ آ سینیٹ نا دیوان اٹی جمعہ نادے آ یورپی ملک آتیٹی قرآن پاک نا بے حرمتی نا ساڑی آ واقعہ غاتا برخلاف قرارداد اس منظور کننگک وخت اس کہ باسک آک دا بابت گپ وتران کیرہ۔ پنچ شنبے نادے آ سینیٹ نا دیوان اٹی سینیٹر بہرہ مند تنگی گپ وتران کرسا سلاہ تس کہ جمعہ نادے آ معمول نا ایجنڈا ءِ معطل کرسا یورپی ملک آتیٹی قرآن پاک نا بے حرمتی نا ساڑی آ واقعہ غاتا برخلاف قرارداد اس منظور کننگے و باسک آک دا بابت گپ وتران کیر۔ چیئرمین سینیٹ ایوان نا سلاہ ءِ ہلنگ آن پد ریمارکس تس کہ جمعہ نادے آ ایوان اٹ قرآن پاک نا بے حرمتی نا ساڑی آ واقعہ غاتیا باسک آک گپ وتران کیرہ و دا بابت اسہ قرارداد اس ہم منظور کننگک۔

(اے پی پی)