اسمگلنگ نا توننگ کن کسٹم کارندہ غاتا کڑد ستا کڑزک، رضا دشتی

گوادر: کلکٹر پاکستان کسٹم گوادر رضا دشتی پارینے کہ پاکستان کسٹم نا کارندہ و افسرک ملکی زرگزران ءِ سوگو کننگ کن گریزی نا ناسور ءِ چٹفنگ کن ہر وڑ نا کڑد ادا کریر ہرا ستا کڑزک۔ دا خیال آتا درشانی ءِ او کسٹم ڈے نا وخت آ اڈ ہلوک دود آن تران کرسا کرے۔ او وخت آ کسٹم گوادر نا کنڈآن ارب آ روپئی تا خرچہ نا منشیات آتے ہم تلف کننگانے۔ دود اٹ ایڈیشنل کلکٹر شوکت حیات ڈپٹی کلکٹر وہاج صغیر ڈپٹی کلکٹر محمد بخت بریار اسسٹنٹ کمشنر گوادر بوہیر دشتی جوڈیشل مجسٹریٹ گوادر محمد مراد تون اوار ایلو جتاجتا محکمہ غاتا افسر و کماش آک بشخ ہلکر۔ دود آن کلکٹر کسٹم گدرینگوک آ سال اٹ دوئی کروک آ سرسہبی تا ہیت ہم کرسا پارینے کہ پاکستان کسٹم 10ٹن نا کچ اٹ منشیات ہرافتے ٹی 7 ہزار 7 سد کلو گرام چرس، 2 سد 95 کلو گرام افیون، 4 ہزار 4 سو بوتل شراب، 9 ہزار بوتل بیئر و ایلو خراب انگا گڑاتے تلف کرینے۔ او پارینے کہ اینخو نن بھلو کچ اسکان گڑاتے ضبط کرینن و ہندن نن بھلو ریونیو اس ہم زرگزران اٹ مچ کرینن۔ ننا 5.5ارب نا ٹارگٹ اس گچین کرینے۔ داسہ 7 تو ہم گدرینگتو کہ نن 7ارب نا ریونیو کسٹم ڈیوٹی نا مد اٹ مچ کرینن۔ کل ٹیکس آتون 17.5 ارب روپئی دا وخت اسکان گوادر کلکٹریٹ مچ کرینے۔ دا کل ننا کسٹم کیکولیگ و افسر و کل سپاہی تے دانا کریڈٹ کاہک۔ و دا ننا ڈیپارٹمنٹ نا بھلو سرسہبی اسے۔ پاکستان کسٹمز اُلس نا استحکام، شونہالی و ماحولیاتی شونداری ٹی جوان کڑد اس ادا کرینے او اُست خواہی نا درشانی ءِ کرسا کسٹم نا جہانی دے انا وخت آ اڈ ہلوک دود انا بشخندار آتا منتواری ءِ ہرفے و گڈ سراٹ او تینا دور اٹ بننگ آ کل مہمان تا منتواری ءِ ہرفے۔ گڈ سر اٹ کل غیرکانودی آ گڑاتے خاخر تسر و ہزار آ  بوتل شراب و بئیر تے کین بلڈوزر کریر۔

(خ ن)