سوراب گو ءِ دَرے

غمخوارحیات

0

Get real time updates directly on you device, subscribe now.

 

بلوچستان نا پین چندی شار تا وڑ سوراب ہم کنے کچ آن زیات دوست ءِ۔۔۔۔۔ دا دوست بننگ نا اسٹ آن زیات سوب ءُ۔۔۔۔

اسہ سوب دا کہ داڑے ننا چندی مہروان آک ءُ، ہرافک نن کن ہنداخس زیات مہر کیرہ کہ سوراب کنے تینا ارٹمی اُرا نا وڑ لگک، و دا مہروان تا مہر دے پہ دے ننے تینا مہر تا پین زیات وامدار کننگ ءِ، و مہروانک زیات مننگ ءُ۔

سوراب نا مہروان تیٹ ”اُستادِ محترم حاجی علی محمد ریکی لڑ اٹ اولیکو ءِ، ہرا کہ کنا آئیڈیل اُستاد آتیٹ اوار ءِ، ایہن تو ای اسکول یا کالج اوڑتون خوانتنُٹ، ولے ای اونا مجلس آن بھاز آ گڑاتے ہیل کرینُٹ۔ ایلو مہروان تیٹ سوراب نا امیرِ ادب ”حاجی خیر جان ریکی“ اوار ءِ۔ ہندن دا خاہوت نا کنا غمخوار انگا مہروان آ سنگت ”شفیق حسرت بلوچ، محی الدین بلوچ، ڈاکٹر یاسین، ڈاکٹر ظہور احمد ریکی، لالا محمد حنیف ریکی، سنگت ابراہیم، سنگت رحمان“ ہرا کہ ڈاکٹر اسے تون اوار اسہ گچین ءُ ردھم (طبلہ) نواز اس ہم ارے۔

ایلو فکری /نظریاتی و ادبی آ سنگت آک ”ڈاکٹر خدائے رحیم میروانی“ ہرا وخت بی ایم سی ٹی میڈیکل نا طالبعلم ئس، ہمو زمانہ غان کنا سنگت ءِ کہ اونا ہاسٹل نا کمرہ ٹی ہم اوڑتون مسٹہ۔ ”حاجی عاقب شکیل بلوچ“ انتہائی ماخول، پُر فکر، مہروان و شفیق و ملنسار ءُ انسان اس، کہ بے کچ خلوص آن پُر ءُ اُست اس تخک، ہرا وخت نن سوراب آ کان ہنداخہ در خذمت کیک کہ نن تین کن اسُل لجی مرینہ۔

دا جار کہ نن سوراب آ گدان ادبی دیوان نا سیمینار اٹی اوار مننگ کن حاجی شکیل زہری تون وتاخی ئسُن تو حیرانگی داڑان ہرفے کہ داخس شرفمندی و ننا خذمت نن چار بندغ ”ای، ڈاکٹر عالم عجیب، مولانا ضیاجان و سید حق نواز شاہ“ کن چار سنگت سلفیسس، ہرافک ہر وخت نن تون مسرہ کہ او مہروان تیان سنگت صلاح الدین، جاوید جان زہری، سیف اللہ جان وبابل اس تے ہچبر گیرام دننگ کپرہ کہ ننے تینا مہر آتا بے کچ وامدار کریر۔ خاص وڑ اٹ صلاح الدین ہراکہ سوراب نا پنی آ شاعر مرزا عبدالرحمان صابر مینگل نا مار ءِ، دا سنگت نا مہر و مریبت دُن چا ننے آ جادوگری اس کرے کہ ننا سوراب آ نن نا دہ بجہ غا سرمننگ آ، سوراب نا مین چوک آ نن کن سنگت لطیف بلوچ و ایلو مہروان آتتون بخیر کن سلوک ئس۔

گدان ادبی دیوان نا ایلو مہروان تتون حاجی فرید فراق، ہراکہ بزرگ آ عمرو وئی ٹی ننا خذمت آ جک سلوک مسنے، داخس شرفمندی، داخس عزت افزائی کہ حاجی فرید فراق نا منتواری کن کن تون لوز اف۔ صادق ندیم، چیئرمین نذیر بلوچ، سلام اُلفت، عنایت ساغر، غلام غمخوار، نعیم جان، ملک آفتاب مینگل، ہراکہ گچین ءُ گول کیپر اسے، و سوراب نا ڈی ایف اے ٹی گوازی کرینے، گچین آ سینئر فٹبالر اُستاد گُلاب، بابو ریاض، شعیب جان، امین، مُراد، زبیر جان تون اوار مرشد علی حسن آزاد سوراب نا شان و شرف ءِ۔ ہندن پین چندیک اوار ءُ ہرافک مدامی ننے تینا خن تا دیدہ غا جاگہ تسنو۔ دا وار کہ نن سوراب آ دا ادبی فیسٹیول اٹی ساڑی مننگ کن ہنان تو دا فیسٹیول نا اڈ تننگ آ گدان ادبی دیوان دُن چا پوسکن ءُ تاریخ اس رقم کرے کہ سوراب نا تاریخ اٹی داڈول انا علمی ادبی فکری فیسٹیول داکان مُست متنے۔

دا وخت آ بھاز گچین ءُ علمی شرہ مون آ بس ہرافتے ٹی پنی آ مورخ ڈاکٹر فاروق بلوچ نا سوراب نا راجی تاریخ اَٹ اہمیت نا سرحال آ ڈاکٹر خدائے رحیم میروانی تون پینل ڈسکیشن، ہندن ہفتئی و ہڑدے ئی تلار نا شونکار عبدالرازق ابابکی نا حاجی عاقب شکیل زہری تون براہوئی ادب اٹی تلار نا کڑد واہمیت نا سرحال آ دیوان، براہوئی شاعری نا خواست آتا سرحال آ پنی آ ادیب ڈاکٹر عالم عجیب نا سلام اُلفت تون گپ وتران بھاز گچین ءُ مجلس ئسُر۔

•دا گپ و تران آتیان ننے دا چاہنداری وسرپدی دوئی مس کہ ننے کل آن مُست تینا راجی دیہاڑ (تاریخ) آن بلد مننگ کن گواچنی تیا تالان، مورخ آتا حوالہ غاتے خوانوئی تمک، گڑا نن مفروضہ غاتیٹ جوڑوک بے دلیل و غیر منطقی آ حوالہ وتاریخ ءِ مسخ کروک آ خیال وگمان تیان خلاس کننگ کینہ۔

•ننے تینا لمئی بولی براہوئی نا رکھ و شینکاری کن تینا بولی تے زند انا ہر بشخ اٹی اولیت و اہمیت تروئی تمک۔ تینا چنا تے براہوئی زبان وادب آن واخبی تننگ کن اوفتے تینا ادب و کتاب ونوشت آتیان بلد کروئی تمک۔

•براہوئی شاعری اسہ گچین ءُ فنی فکری کسراسے آ راہی روان ءِ، کہ داسہ نا براہوئی زبان نا شاعر فنی و فکری ہر وڑ اَٹ سوبر و سوگو ءِ۔ براہوئی غزل ایلو سیال بولی تیان بیخی کانڈا ءِ۔

گدان ادبی دیوان نا دا اولیکو مچی اَلو، داکان مست ہم گدان ادبی دیوان دن ءُ مچی اڈ تسنے، ہرافتیٹ کنا جند مدام ساڑی مسنٹ کہ گدان ادبی دیوان سوراب نا کماش آ شاعر مرزا عبدالرحمان صابر مینگل، اسماعیل خنجری و عنایت ساغر نا کتاب آتا مون پاشی دود اڈ تس تو او مچی ٹی ہم ای ساڑی ئسٹ، ولدا میر گل خان نصیر نا یات اَٹ اسہ پروگرام اس سوراب اٹی کریر، ولدا کوئٹہ ٹی اسہ گچین ءُ سیمینار و مشاعرہ اس اڈ تسر اوفتیٹ ای اوار مسنٹ، او ہم سرسہب ءُ مچی ئسر۔

ولے دا مچی نا گچینی و زیبائی دا ئس کہ دا مچی:

•روایتی مچی تیان جتائس۔

•دامچی ٹی لس خلقت پیر کماش آک، ورناک، خوانندہ غاک، مزدور کار آک، گوازی گرک اسہ بھلو کچ اسے ٹی ساڑی ئسُر کہ سوراب بوائز ہائی سکول بازار نا بھلا ہال سرجم کرسی تیان پُر ئس، اولی سیشن تیٹ ہچ ءُ کرسی اس خورک خننگتوکہ، البتہ مشاعرہ نا وخت آ دیخ اس پد انا کرسیک خالی ئسر، او ہم بھازکم۔

•نرینہ غان بیدس دا مچی ٹی زالبول اسُل اَلو؟ مشاعرہ نا وخت آ اِرا چنکو گودی تیا کنا نظر تما۔

•مچی ٹی بھاز زیات سنجیدگی ئس، و مچی ٹی تولوک ہراسہ بندغ ہراسہ سیشن ءِ بھاز خوڑتی، علمی چاہنداری و ملاسی نا شوق وذوق اٹی بننگ ئس، سیشن نا وخت آ سوج ورندی کن چندی بنوک آک دوبُڑز کریرہ، دا گڑا تولوک آتا بننگ و پہہ مننگ نا است خواہی تے پیدوار کریکہ، ولے وخت انا کمتی نا سوب مُسہ سوج ارّفنگاکہ۔

•بلوچستان گیشتری ادبی حلقہ ”شال، مستونگ، قلات، منگچر، خضدار، زہری، نصیر آباد، نوشکے“ ءِ دا مچی ٹی گچین ءُ نمائندگی اس تننگاسس۔

•واہم ننے آن بھاز آ سنگت آک گلہ کریر کہ دا گچین آ علمی دیوان آ ننے انتئے تین تون دتویرے۔

•دا گچین آ آزموندہ مون آ بس کہ سیمینار وڑ اٹی پروگرام کرسا ترانکار آتا پورو اسہ لائن اس خلنگ آن چَپ دا ڈول پینل ڈسکیشن بھاز جوان مریک۔

•مشاعرہ ٹی حسبِ روایت شاعر تا کچ اسُل زیات ئس، و بھاز آتے شاعر نا حیثیت اَٹ کلام ءِ بنفنگ کن اسٹیج آ خواہفنگاکہ ولے اوفک داسکان شاعر الوس و ہندا فک کنے چَٹ بھاز بور کریر۔

•داکان پد کن دُن مرے کہ سلیکٹڈ شاعر تے مشاعرہ خواننگ کن دعوت تننگے اگہ پین کس برے تو او اسیکا بننگ کن برے۔ چَٹ بھاز مریر ہم شاعرک بیست آن زیات مفس۔

•دا مشاعرہ بھاز وخت درے کہ شست نا کچ شاعر کلام بنفیر، ولے دا اولی مشاعرہ ئس کہ شاعر تینا کلام بنفنگ آن پد اوخہ در شاٹ متو دُن کہ براہوئی زبان نا مشاعرہ غاتے ٹی شاعر تا رواج ءِ کہ تینا شاعری ءِ بنف ولدا مشاعرہ ءِ مشاخ کر ہن۔

•حسبِ روایت دا مچی ہم تینا وخت آن اِرا گھنٹہ اُرے آ بنا کرے، بایدے دُن مف۔

•شونکار شفیق حسرت بلوچ گچین ءُ شونکاری اس کرے، ولے شونکار نا جند اکن داخس بھاز ہیت کننگ و شعر بنفنگ جوان اف کہ داڑان بنوک آتا طب ناساز مریک، اوفک دڑدی مریرہ، شونکار ایلو تران کار آتے ہیت کرفنگ کن بریک۔

•دُن کہ پینل ڈسکشن تا شونکار آک تینا مجلس آتے وخت آ بنا کریرہ، ووخت آ چُٹفیرہ، دا کنے دوست بس۔

•محفل موسیقی ٹی ننے نازنہ زیمل گروپ نا فنکار آک ”عبید سحر، شاسمال، بَرمش بلوچ ونوید جان“ بیخی بھاز دوست بسُر، دا ورناک داسہ بھاز شون ہلکنو، اسٹ داکہ ساہت اسے ٹی چاگڑد ءِ جوڑرہ۔ لَے ٹی پارہ، ولدا اسیجا پارہ و محفل نا بنوک آتا خواست انا رد اٹ پارہ۔ ہنداڑان ننے ننا گروپ نا ایلو سنگت آتے دافتا پاننگ بے کچ وڑا۔

•اوفتا مقابل عبدالخالق فرہاد دن تو اسہ سینئر ءُ فنکاراسے، خالق فرہاد ننا یار ءِ، ولے دا محفل اٹی او خوامخواہ دیچا انتئے لَے ءِ اسُل بھاز بُڑز، بھاز تُرند بھاز تیز تخاسس۔ ہر شئیر ءِ خار اٹی پاریکہ، داڑسکان کہ میر گل خان نصیر نا ”بیا او مُرید“ ءِ ہم ہندن ءُ لَے اسے ٹی پارے کہ نن بے طب مرسا محفل آن بش مسُن۔۔۔۔۔ دا بارو اٹ عبدالخالق فرہاد ءِ نن حوال کرون۔۔۔

•گدان ادبی دیوان سوراب نا سنگت آک تینا میڈیا ٹیم ءِ پین سوگو کیر، جوان ٹریننگ ایتر، حالانکہ ای دا مچی نا آرگنائزر شفیق بلوچ ءِ پاریسٹ ہم کہ تینا سنگت آتا زمواری خلیس کہ فوٹو کَشر، ویڈیو جوڑر، پروگرام ءِ لائیو فیس بُک آ چلیفر، ولے ای داسکان خاص ءُ فوٹو اس خنتوٹ۔

•شُکر داکہ قلات آن آغاقادر شاہ و پروفیسر ملک ہاشم ”فطرت ٹی وی“ نا ٹیم اتون اوار سوراب اٹی دا مچی ءِ کوریج کن ساڑی ئسُر، اوفک بھاز گچین ءُ ویڈیو شون تسنو۔ ہرافک فیس بُک آاوفتا پیج آ ساڑی ءُ، مخلوق دا ویڈیوتے بھلو کچ اسے ٹی ہُننگ ءِ۔

•ہیت دا کہ سوراب گوءِ درے کہ داوڑ گچین و سرسہب ءُ مچی اس اڈ تس۔۔۔۔۔۔۔ پین حوال خیر ءِ۔

Get real time updates directly on you device, subscribe now.

Leave A Reply

Your email address will not be published.