فیڈل کاسترو 4 (Fidel Castro)
ڈاکٹر شاہ محمد مری براہوئی بدل: جیلانی الفت
Get real time updates directly on you device, subscribe now.
فیڈل نا لُمہ کیوبا ٹی ئس۔ پیرہ تے خراس گاڈو اس چلیفیکہ۔ فیڈل نا لُمہ ہِچ خوانندہ الو۔ او خواری کرسا خواننگ و لکھنگ ہیل کرے۔ اونا لُمہ 7چنا ودی کرے۔ فیڈل نا لُمہ تو اصل اٹ انقلاب نا لُمہ ئس۔ او انقلاب نا سرسہبی آن مُسٹ و نیم سال پَد اسکان زندہ سلیس۔ 6 اگست 1963ء اٹی او کزیت کرے۔
بے شک ہر انسان طبعی وڑ اٹ تینا لُمہ باوہ نا اولیاد مریک۔ ولے اونا شخصیت ءِ جوڑ کننگ اٹی حالت و واقعہ، شیفی بڑزی، نا گمان انگا چَٹی و جہدوکوشست آک ہم لُمہ باوہ غانبار و کِڑد اڈ ایترہ۔ کاسترو تون ہندن مس۔ اونا یارِغار چی گویرا تون ہم ہندن مس۔
ہزگار آ بندغ اینجل کاسترو نا دا مار 13 اگست 1926ء اٹی ودی مس۔ و پنی آ عالم، سیاستدان و انقلابی حقی آ ایلم راؤل اوڑان چار و نیم سال چنک ئس۔
اونا پن مُسہ بشخ اٹی ءِ فیڈل، کاسترو، رز۔ اوٹی بیرہ فیڈل اونا پن ئس۔ اینجل کاسترو اونا باوہ نا پن ئس، تو کاسترو ءِ او تینا باوہ نا پن آن ہلک۔ و ”لینارُز گونز الیز رُز“ جوڑ مس۔ فیڈل نا پن خاہوت اٹی کسّ انا الو۔ اوڑا اصل اٹ فیڈل نا پن ءِ باوہ نا تے اسہ لکھ پتی ءُ سنگت اس تخا ہرانا پن فیڈل سانٹوس ئس۔
فیڈل نا پاننگ نا رد اٹ:۔ ”کنا چنکا خلق بیرین اٹی نئے تو ٹپالجا ئس، نئے چِٹھی سر کننگ نا جاگہ، نئے چنکو پبلک اسکول اسکان لُمہ باوہ نا وس ئس۔
فیڈل ءِ چار سال اسکان نا وئی اٹی ہَندی آ سکول آ راہی کننگا، و اِرا سال گُڈ اودے شار انا ”سنتیاگو“ آ راہی کننگا۔ او اوڑے اُراغان بھاز مُر اسہ درستی اسے نا اُراٹی رہینگاکہ۔ ہراکہ اسکول اسے ٹی ماسٹر ئس۔ او درستی ءِ اونا پیسہ غاک ملارہ۔ ولے او تینا غریبی و فیڈل روایت آتا وڑ اٹ دا چناغا ناتڑسی تا مَش تے پِرغا۔
دا اُرا بھاز غریب ئس، اُراٹی مفلسی تالان ئس۔ لنگڑی نا بادشاہی ئس۔ فیڈل کم خوراکی ٹی مسہ سال اسکان اوڑے رہینگا۔ واہیات و اخلاقیات نا پن آ اوڑا چنا تا گوازی نا درگہ غاتے بند کننگاسُس۔ و خاہوت نا غریبی نا سوب آن یکا کم خوراکی اونا قسمت جوڑ ئس۔ او ہِنا بارس۔ لُمہ باوہ ءِ ہِچ سما تمتو کہ اودے کم عمری ٹی سخت ءُ وخت اس سگوئی تمنگ اٹی ءِ۔ دا درستی فیڈل نا لُمہ باوہ نا کنڈ آن ملوک آ پیسہ غاتے روزگار جوڑ کریسُس و چنا غا ہچ ہم خڑچ کتوکہ۔ دا بھاز خراب وڑ انا استحصال اس ئسکہ، اسہ ہزگار ءُ لُمہ باوہ سے نا مار پیسہ راہی کننگ آن پدہم دا نعمت آتیا مُر ئس۔
و ہرا وخت آ لُمہ باوہ ءِ راستکی تا سما تما تو اوفک کرسٹینا گو ءِ ہزگار انگا بندغ آتا سکول اٹی اسہ بورڈنگ اسٹوڈنٹ اسے نا وڑ اٹ داخل کرفیر۔ دا وڑ اونا بِنائی خواننگ ہزگار آتا کیتھولک اسکول اٹی مس۔ کل ٹیچر آک اسپین آن بسوسر۔ او بھاز رجعت پرست ئسرہ۔
اسکول اٹی چنکا ایلم راؤل ہم ئس۔ اسہ وڑ اسے ٹی فیڈل اونا انچارج ئس۔ و اونا خواننگ و ایلو چُنکا مُنکا گرج آتے پورو کریکہ۔
اسکول اٹی فیڈل اسہ جوان ءُ خوانوک ءُ چُنا اس ئسکہ، بھاز زیات پوزیشن ہلوک اوس تو الو۔ ولے جوان وڑ اٹ گزران کروک اوس ئس۔ دا چنکی نا زمانہ ٹی ہم اودے بے انصافی وڑتوکہ۔ اودے اتھارٹی جوان لگتوکہ، او ظلم و ناتڑسی تیان خار دروک اس ئس۔ اسکول انتظامیہ تون وخت وخت اس جھیڑہ اس مسکہ۔ فیڈل باغی اس تو مننگ الو۔ ولے او انصاف پسند اس ضرور جوڑ مننگ اٹی ئس، علم آخا بلکن آزموندہ غاک اودے اسہ جوان ءُ بندغ اس جوڑ کننگ اٹی ئسرہ۔
اسہ وار تعلیمی سرسہبیک اودے ”ہوانا“ غا دریر۔ او ہائی اسکول نا تعلیم کن 1942ء اٹی ہوانا ٹی ”یسوعیوں“ نا ادارہ ”کالیچوڈی۔بلن“ اٹی داخل مس دا ملک انا کل آن جوان انگا اسکول ئس۔
ہفتئی تلار
تاک: 35
12-18 September 2020
پنہ، 2