الغفور جل جلالہٗ

ملا علی قاریؒ مرقات نا باب شرح الاسماء اللہ الحسنیٰ ٹی نوشتہ کرینے ”الغفارجل جلالہٗ“ ہمو ہستی ءِ پاننگک ہراتینا بندہ نا نزوری وگناہ تیا دنیا ٹی پڑدہ شاغے و آخرت اٹ سزا تف معاف کے۔ ملاعلی قاریؒ نا ہندا تعریف آن دا ہیت پاش مس کہ اللہ تعالیٰ بندغ آتا عیب آتیا پڑدہ شاغک و ڈکک تو بایدے کہ اگہ بندغ اس وڑوڑ انا گناہ کیک و گیشتری وخت ءِ تینا خدانا نافرمانی ٹی تیر کیک تو نن بندغ آک ہم اونا دا عیب ونزوری آپڑدہ شاغن تو قیا مت نا دے آ اللہ ننا پڑدہ پوشی ءِ فرمائفک۔

مرقات نامصنف ملا علی قاریؒ تینا ہندا کتاب نا باب شرح اسما ء اللہ ٹی نوشتہ کیک کہ دا ہڑدوسر آ پنک اسہ لوز اسے آن شینگ کرینو ”الغفار جل جلالہٗ“ نا بارو اٹ امام خطابیؒ فرمائفک ہرا ذات تینا بندہ نا گناہ تے ڈکسا اوڑا تینا مہربانی وشفقت نا پڑدہ ءِ شاغے اودے ”الغفارجل جلالہٗ“ پارہ۔ انسان اس سہب آن شام اسکان اگہ گناہ کیک ہم تو اللہ پاک اونا پڑدہ پوشی ءِ کیک، دا اونا ”الغفار جل جلالہٗ“ والا شان ءِ۔ نن بندغ آک ہم بایدے تینا ایلم تا عیب آتے پاش کپن۔ اگہ نن دنیا ٹی تینا ایلم اسے نا عیب آتیا پڑدہ شاغنہ، و اوفتے ڈکنہ تو اللہ تعالیٰ دانا بدل ءِ قیامت نا دے ایتک۔ 

امام حلیمیؒ فرمائفک ہرا ذات کہ تینا مخلوق نا گناہ وبدی تیا پڑدہ پوشی کے واونا بخشش اونا سزا تننگ آن زوراک مرے تو دن انگا ذات ”الغفور جل جلالہٗ“ نا ءِ۔ اللہ تعالیٰ نا دا پن قرآن کریم اٹ 91وار بسنے و الغفار جل جلالہٗ مچ آ قرآن اٹ 5وار بسنے۔

از ابن الحسن ابابکی

ہفتئی تلار

تاک: 35

12-18 September 2020

پنہ، 1