بولان ادبی دیوان (رجسٹرڈ) مچھ بلوچستان نا گچین کاری

تدوک آ دے تیٹی بولان ادبی دیوان نا ٹپر آ آرگنائزنگ کمیٹی نا پارہ غان دیوان اس عبدالنبی انجم نا کماشی ٹی اڈ ہلک دیوان نا اڈ تننگ نا مسخت بولان ادبی دیوان نا پوسکن آ گچین کاری نا بابت ئس۔ دیوان اٹ ساڑی کل سنگت آتا رضامندی اٹ پوسکن آ کابینہ ٹہیفنگا۔ہرانا رد اٹ چیئرمین محسن فگار، وائس چیئرمین جہانزیب زیبی،جنرل سیکرٹری عبدالنبی انجم، جوائنٹ سیکرٹری منیرغمخوار، پریس سیکرٹری حفیظ ساحل،فنانس سیکرٹری زاہد نسیم و آفس سیکرٹری الطاف الطافی گچین مس۔ پوسکن گچین مروک آ چیئرمین محسن فگار تران کرسا پارے ای سنگت آتا اعتماد نا وام دار اُٹ کہ او کنے آ اعتماد کرسا کنے بولان ادبی دیوان نا چیئرمین گچین کریر، دا اسہ بھلو زمواری اسے ای تینا وس انا کچ کوشست کیوہ کہ سنگت آتا اعتماد آ پورو بریو، و تنظیم نا شونداری کن جوان وڑاٹ گام گیج کیو، او پارے بولان نا 20 سال نا کارکڑد بے مٹ ءِ۔ مخلص آ سنگت آتا دے ونن نا جہد خواری بولان ادبی دیوان ءِ دا زینہ غا ایس لگفے، ای ہم ہندا کوشست کیوہ کہ بولان نا ہمو مست انا چرجوئی برجا سلے۔ و گڈ سر اٹ کل سنگت آتا منت ءِ ہرفے۔

ہفتئی تلار
تاک: 26
16-10 جولائی 2021ء
پنہ: 05