قائد اعظم ٹرافی ٹی پی ایس ایل نا وڑ ٹیم تے ڈرافٹنگ اٹی جوڑ کننگ نا گمان

لاہور (مانیٹرنگ ڈیسک) پی سی بی ڈومیسٹک کرکٹ سیزن سال 21-2020ء فرسٹ کلاس و سیکنڈ الیون ٹیم تا گچین کاری نا وڑ و ڈول ءِ جوڑ کننگ کن جتا جتا آپشن تیا سجفنگ بنا مس۔ ٹیم تا جوڑ کننگ کن ڈرافٹنگ یا تدوک آ سیزن اٹ کارکڑد نا بنداو آ اسکواڈ جوڑ کننگ نا سلاہ غا سجفنگ انگ ءِ۔ حوال نا رداٹ پی سی بی کورونا نا سوب آن اُرے آ بنا مروک آ ڈومیسٹک کرکٹ سیزن اٹ گوازی کروک آ شش صوبائی ٹیم تا اسکواڈ ءِ جوڑ کننگ آ سجفنگ انگ ءِ۔ دا بابت اٹ ہائی پرفارمنس سنٹر نا ڈائریکٹرندیم خان شش صوبائی ٹیم تا کوچ آتیان سلاہ بنا کرینے۔ حوال نا رداٹ کہ خدو نا وڑ سلیکشن کمیٹی سلاہ آن شش ٹیم تے جوڑ کیک۔ ہرا فرسٹ کلاس و سیکنڈ الیوں نا ایونٹ آتیٹی بشخ ہلیک۔ خدو قومی سلیکشن کمیٹی شش صوبائی ٹیم تے جوڑ کریسُر وخت اس کہ پنجاب نا بھاز آ گوازی گرک ایلو صوبہ غاتا ٹیم تیٹی اوار کننگاسُس۔ حوال نا رداٹ اینخو ارٹمیکو ڈرافٹ نا وڑ انا رداٹ ٹیم جوڑ کننگانے ہرافتے ٹی ہر ٹیم تینا شش شش گوازی گر مالو نا اسکواڈ آن رٹین کیک وخت اس کہ ایلو گوازی گرتا ڈرافٹ نا رداٹ مریک۔ حوال نا رداٹ تدوک آ سیزن اٹ انڈر 19 و انڈر 16 نا کہول آ کارکڑد نشان تروک آ گوازی گرتے ہم پول اٹ اوار کننگک۔ حوال نا رداٹ کہ گوازی گر تے آن بیدس ٹیم تا کوچ آتیٹی ہم بدلی کننگک۔