پی آئی اے جہاز شکست‘ پائلٹ و ایئر ٹریفک کنٹرولر نا گوجالنگ نا سوب آن مس‘ غلام سرور خان
اسلام آباد (اے پی پی/ مانیٹرنگ ڈیسک) بنجائی وزیر ہوابازی غلام سرور خان پارینے کہ شکست نا گواچی مروک آ جہاز انا پائلٹ تکنیکی خرابی تے گوجالا و کنٹرولر نا ہیت ءِ ہم منتو۔ او پارے کہ پائلٹ و کو پائلٹ نا مزغ اٹ کورونا جاگہی ئس، کل ہیت و گپ آک کورونا غا مننگ ئسر۔ کنٹرولر نا کال ءِ ہم اشتاف اٹ بنگر، و پاننگا کہ مینیج کینہ تے، خود اعتمادی کچ آن زیات ئس، پائلٹ جہاز ءِ آٹو کنٹرول آن مینوئل آ گدریفے۔ سرجم حوال آتا رد اٹ پی آئی اے جہاز شکست نا رپورٹ ءِ قومی اسمبلی ٹی پیش کننگا۔ دا شکست اٹ زوال مروک آ 90 مسافر آتا خاہوت آتے دہ لکھ روپئی ہر اسٹ کن تننگانے، دا شکست اٹی 29 اُرا پورو بھس مسر، پورو رپورٹ ءِ ہم دا ایوان اٹ پیش کننگک، ڈپٹی اسپیکررپورٹ ءِ قائمہ کمیٹی آ گدریفے۔ چارشنبے نادے آ قومی اسمبلی ٹی بنجائی وزیر ہوابازی غلام سرور خان ایوان اٹی رپورٹءِ پیش کرسا پارے کہ جہاز شکست اٹی 97 بندغ شہید مسر، ہمونن آ اسہ ٹیم اس جوڑ کرین ہرا سینئر انگا بندغ آتیا تالان بورڈ ئس۔ ہندا نن دا بورڈ کراچی آ سرمس و او تینا جاست وپاست نا بناءِ کرے۔ بدبختی اٹ دا اولیکو واقعہ اف۔ 72 سال اٹی 12 واقعہ مسنے۔ مسکوہی غٹ شکست آتا وخت آ انکوائری مس نئے رپورٹ مون آ بس، نئے راستکیک الس اسکان سرمسر۔ اینو اسکان الس و زوال مروک آتا خاہوت آتے ٹی تشنگی برجاسلیس کہ داواقعہ غاتا زموار دیر ئس۔ اوپارے کہ وزیراعظم نا جند انا است خواہی و کورونا وائرس نا دین انا حالیت آتیان پد ہم انکوائری بورڈ احساس زمواری اتون تینا فرض ءِ ادا کرے۔ اوپارے کہ ہراکمپنی جہاز ءِ جوڑ کرے او حکومت فرانس نا نمائندہ و اسہ امریکی اس ہم داٹی ساڑی ئس۔ دہ درملکی بندغ آتیان چار ملکی بندغ ئسر وخت اس کہ پائلٹ ہم اسٹیک ہولڈرئس ہنداسوب آن دابورڈ ءِ ودفین۔ دا انکوائری بورڈ اٹی ایئر بلیو نا اِرا پائلٹ ہرا اےتھری جہاز بال تسرہ۔ اوفتے اوار کننگا، جہانی پائلٹ ایسوسی ایشن ءِ چٹھی اس نوشتہ کرین اسہ اے تھری پائلٹ و ٹیکنیکشن اس گدریفنگے تانکہ دانا شفاف جاست وپاست مننگ کے۔ اے تھری نا غٹ آن بھلا نیٹ ورک ترکش کمپنی تون ءِ اودے اوار کننگے تو زیات جوان مریک۔ بالکل شفاف و بے کنڈہلوک انکوائری مننگ ءِ و دانا رپورٹ ءِ اینو ایوان اٹ پیش کننگ اُن۔ پورو رپورٹ ءِ ہم دا ایوان نا مون آ پیش کننگک۔ غلام سرور خان پارے کہ غٹ تر سوب، محرک و معاوضہ غاتا سرجم آک داٹی اوار مریرہ۔ 29 اُراداٹی پورو بھس مسر۔ اوفتا ازالہ ءِ ہم کننگک۔ زہمی بندغ آتے گیگ بدل ہنکین ہم تننگانے۔ ہرابندغ آک زوال مریر اوفتے ٹی 90 بندغ ءِ ہر اسٹ کن 10 لکھ روپئی فراوان کننگانے۔ اسہ اُراسے نا چناس ہم شہید مس اودے ہم معاوضہ تننگانے۔ بنجائی وزیر پارے کہ بدبخت جہاز بال اکن سد درسد سہی ئس۔ جہاز اٹی ہچ ءُ خرابی اس الوکہ۔ ہفت مئی آ دا جہاز اولیکو وار بال کرے۔ پنچ جہاز لاہور، کراچی، کراچی لاہور کن ئسر۔ اسہ جہاز اس شارجہ کن ئس۔ اوپارے کہ پائلٹ نا کمکار ہڑتوم آک طبی وڑاٹ جان دراخ ئسر۔ پائلٹ تکنیکی خرابی ءِ پیدوا کتو۔ رن وے آ لینڈ کننگ نا وخت جہاز ءِ 2500 فٹ انا بڑزا مروئی ئس۔