پی ٹی آئی نا مسکوہی باسک آتے اُرا و لاجز آتیان کشنگ نا فیصلہ
اسلام آباد: بنجائی حکومت پی ٹی آئی نا مسکوہی قومی اسمبلی نا باسک آتیان اُرا و لاجز آتے زور اغ خالی کننگ نا فیصلہ کرینے، دا رد اٹ قومی اسمبلی سیکرٹریٹ سی ڈی اے ءِ استیفہ تروک پی ٹی آئی باسک آتیان لاجز آتے خالی کننگ کن چٹھی اس راہی کرینے۔ حوال آتا رداٹ پی ٹی آئی باسک آتا استیفہ غان پد اوفتے قومی اسمبلی سیکرٹریٹ آن کشنگ کن سرجز آک بنا کرینو۔ قومی اسمبلی سیکرٹریٹ سی ڈی اے آ چٹھی اس راہی کرینے، ہراٹی پی ٹی آئی نا استیفہ تروک باسک آتے لاجز آن کشنگ نا پارت کننگانے۔ پی ٹی آئی باسک آتے اُرا تے خالی کننگ کن اسہ ہفتہ اسے نا وارخواہی تننگانے، و پارلیمنٹ لاجز اٹی استیفہ تروک باسک آتے زرتس آتا زُو تننگ کن ہم نوٹس جاری کننگ نا فیصلہ کننگانے۔
(آن لائن)