رخشان ادبی کاروان نا وٹس ایپ گروپ اٹی دَہمیکو مشاعرہ

 

رخشان ادبی کاروان نا وٹس ایپ گروپ اٹی دَہمیکو مشاعرہ اڈ تننگا۔ مشاعرہ نا خاص انگا مہمان محمد اکبر آسی و کماش ولی ساسولی و شونکار کریم اسیر پنجگوری اسک ئسر۔

مشاعرہ نا بنا تلاوت کلام پاک آن مس، ہرانا بختاوری ءِ کریم اسیر پنجگوری دوئی کرے۔

خاص انگا مہمان حافظ محمد اکبر آسی تران کرسا پارے کہ رخشان ادبی کاروان نا کل باسک آتا لکھ منت لکھ تورو کہ کنے شرف بشخسا مشاعرہ نا خاص انگا مہمان کریر۔ مشاعرہ غاتیٹی بشخ ہلنگ نا فائدہ ہندادے کہ نن ادیب دانشور آتا رہی آ توڷ بش کینہ تو نن ہم اوفتا گچین انگا رنگ و گند آن رنگ ہرفنہ دن کہ شیخ سعدیؒ تینا اسہ شعر اسیٹی پاہک کہ حمام اٹی منہ سنگت کنے مش انا اسہ چنک اس تسر تو اوفتیان زباد نا گند ئس، ای مش تیان ارّفیٹ کہ نم مُشک و زعفران اُرے یا مش اُرے؟ نما گند کنے گنوک کرینے۔ کنا است اٹی پنانے۔ مِشک ورندی تسر کہ نن بے قدر ءُ مش ئسن، ولے گلاب آتتون رہینگانن، ہمو خڑکی نا سوب آن اوفتا زباد ننے ٹی اثر کرینے۔ داڑان مراد دادے کہ نن ہم ادیب قلمکار آتتون توڷ بش و اوفتا کتاب آتیان فائدہ ہرفسا اینو داڑے مہمان مننگ نا شرف دوئی کرینن۔

او پارے کہ نن تینے مسلمان پانہ ننے اللہ پاک اسہ رہبر اس نبی کریمﷺ نا دروشم اٹی تسنے۔ نبی کریمﷺ تینا زندگی نا، تینا بننگ نا سوب ءِ بیان کیک کہ کنا بننگ نا اِرا سوب ئسر، اولی دادے کہ ای بندغ آتے علم ہیل ایتو، و اوفتے خنی کیو۔ اِرٹمیکو دادے کہ ای بندغ آتے اخلاق ہیل ایتو، کہ اوفتا ادب و تربیت گچین مرے۔

تو نن اسہ ادبی کاروان اسے تون گنڈوک اُن، ننا زی آ دا فرض مریک کہ نن تینا شعر و شاعری تیٹی اسلام ءِ مون آ تخن، ننا شعر و شاعریک اسلام نا دنگ اٹی مریر، کہ ننا قوم ننا راج ننا وطن ءِ فائدہ رسینگے و بروک آ وخت اٹی ننا نسل و راج انا زند روشنا مرے۔ تو ادب تون ننے اسلام تینا راج انا ربیدہ کل ءِ مون آ تخوئی مریک، کہ نن تینا قوم و راج ءِ اسہ گچین ءُ آخبت اس ایتن۔ نبی کریمﷺ نا جند شاعری کتّنے، ولے وخت وخت شاعر آتا شعر تے خف تورینے۔ خواجہؐ نا فرمان ءِ کہ بھاز شعر اریر، اوفتیٹی حکمت ارے۔ گڑا کوشست کین کہ شعر و شاعری ٹی علم و حکمت نا ہیت ودی کین ایلو کل آن زیات کوشست کیں شعر و شاعری نا وخت آ شرعی دنگ آتے لتاڑ کرسا تینا آخرت ءِ خراب کپن۔

گڈسر اٹی مشاعرہ نا کماش رخشان ادبی کاروان نا سروک ولی ساسولی تران کرسا پارے کہ خاص انگا مہمان محمد اکبر آسی صاحب، شونکار کریم اسیر پنجگوری و ایلو کل خواجہ غاتا لکھ منت وار کہ اوفک تینے مشاعرہ ٹی ساڑی کریر دا اوفتا ادب دوستی ءِ مشاعرہ ءِ تینا گچین آ شعر کلام آتیٹ زیبدار کریر و ننے شرف بشخار۔

شاعر آتا کلام آتا وڑک آک دا وڑ ءُ:

محمد اکبر آسیؔ

نی قرآن ءِ کر تلاوت او ایمان ءِ ودّفک

دا کتاب اس شان والو دانا شان ءِ ودّفک

ولی ساسولیؔ

نوری مرے یا ناری اعلیٰ اریس بشر

اوّل قرآن پدا نا ہیت آتے ٹی اثر

کریم اسیر پنجگوریؔ

ہِنوک آ سال ننے دتر ہوغفے

ہُرن کہ دا سال انت حال کیک

ابرار برکتؔ

کنے آ بریسہ ہبکّہ ہبکّہ

دن انتئے مریسہ ہبکّہ ہبکّہ

اسحاق حسرتؔ

بفک نا کلہو بس خدا نے اتو

ننا دا دُعا ءِ دُعا نے اتو

تاجل میرؔ

بندغ آک زندہ اریرک بندغی دم تسنے

اے وطن نا ہر گڑا کہ ویل اٹی دم تسنے

غفار عاطفؔ

وفا ءِ الّا جفا ءِ ہرفے

خدا نا تین کن گناہ ءِ ہرفے

ماجد ہنینا نالویؔ

دا ہُشنگا بس جوانی مس ختم

بھاز مُرغن ئس کہانی مس ختم

انور زیب پنجگوریؔ

کنا میراث بہا مس خن تا مون آ

تینا میّت ءِ تینٹ ہرفوئی تما

صدام رضاء پنجگوریؔ

گام گام آ ہرا کہ ہنانو زرس

آسراتی ہمو تو خنانو زرس

عتیق رحمانیؔ

دا است آ نشان ءِ گلی دلربا نا

مروف مٹ ثانی ودی دلربا نا

جاوید سحرؔ

ننا دو آن تباہی عام مسک

ہراتم بے حیائی عام مسک

قمرانجمؔ

تپرہ کن تون دا امر مسک

انت اکن دیچہ او بدر مسک

سعید راقمؔ

کنے سر قلم کر کنا خن تے کشّہ

کنا ہر چنا ءِ نی تعلیم ایتے

ناصر ارشادؔ

کنف کہ داخس شراب ساقی

مغز کنا مف خراب ساقی

ہفتئی تلار
تاک:01
07-01 جنوری 2022ء
پنہ: 02