زندان نا ڈائری، سال 1973ء…………(22)۔

ڈاکٹر سلیم کرد

0

Get real time updates directly on you device, subscribe now.

ڈسٹرکٹ جیل نا اسیر آک

خواجہ چیئرمین! نواب محمد اکبر خان بگٹی ہراتم گورنر بلوچستان نا Charge ءِ ہلک، تو او دا دعویٰ اٹ ہناسس، کہ او Within three Months بلوچسان اٹی نیپ انا ہچ ءُ پن ہلوک اس الیپنہ۔ و دا کہ دا سلہہ غاتے دوئی کینہ و گوریلا تے ہلینہ۔ ای سوج کیوہ خواجہ کہ اکبر خان تو دہ تُو آن پد ہنا۔ اینو دا اِرا سال نا وخت اٹی کنے پاہے کہ اسہ گوریلا اس ہم ہلنگانے۔ ہرادے پرائیویٹ گوریلا فورس پاننگاکہ؟ ای سوج کیوہ کہ درملکی سلہہ نا اسہ توفک اس ہم بلوچستان آن ہلنگانے؟ اخر ہرادے بنداو جوڑ کرسا دا گورنمنٹ ءِ نم پرغارے، دا Base ءِ نم پک تو کبو۔ بایدے دن مروسس کہ ہرازدے اکبر خان بے سہب مسوسس، ہموزدے دا ملک انا وزیر اعظم پاروسس کہ کنا گورنر غلط ءُ ہیت کریسس۔ گڑا ہمو ہیت آک راست افس، Come on نیشنل عوامی پارٹی برے و تینا حکومت ءِ جوڑ کے، دا سوب آن کہ اونا برخلاف ہرا سلہہ نا Charges آک لگاسر، او غلط مسنو۔ ولے خواجہ ءِ کنا پاس، دا کِسہ ءِ مونی چلیفنگا، و ولدا فوج ءِ دننگ نا ہیت۔ خواجہ چیئرمین! ای سوج کیوہ کہ پانزدہ فروری آ گورنمنٹ Dissolve مس، و 22 مئی آ فوج اوڑے کارروائی نا بناءِ کرے، ای سوج کیوہ کہ نا توسط اٹ دا ہاؤس اٹی پانزدہ فروری و بیست و دو مئی نا نیام اٹ بلوچستان اٹی Law and Order نا ویل ودی مسوسس؟ ہرادے چٹفنگ کن فوج ءِ راہی کننگاسس۔ خواجہ! 22 مئی اسکان ہچ ءُ واقعہ اس متویسس۔ داڑے White Paper اٹی پاننگانے کہ فوج اوڑے بیلہ غان بیرہ سلہہ ہلنگ کن ساڑی ئس۔ خواجہ چیئرمین! ای اسُل دعویٰ اٹ پاوہ کہ دن کہ اونا است خواہی دا ئس، اوفک محسوس کریرہ، اوفتا دا خیال ئس کہ ہراتم نیپ انا گورنمنٹ اینک کننگک، تو اوڑے تاڑواڑ مریک، و نن پانہ کہ دا شرپسند بندغ ءُ۔ ولے نیپ دا فیصلہ کریسس کہ نن دا گورنمنٹ ءِ ہچ گہس دن ءُ وارخواہی اس تفنہ، کہ او ننا برخلاف دا وڑ انا پیدواری اس کننگ کے۔ گڑا اوفک اسُل آسرات توسر، ولے داسہ پاش ءِ کہ اوفتے تو اسہ ویل اس ودی کروئی ئس، گڑا اوفک فوج ءِ بلوچستان نا علاقہ غاتیٹی راہی کریر۔ مخلوق ءِ Provoke کریر، فوج Penetrate کرے، کہ مخلوق پدی کاہے، و اسہ ساہت اس ہندن ءُ برے کہ کلیش مرے۔ ای دعویٰ اٹ پاوہ کہ بلوچستان نا ہچ ءُ ویل اس اَلوکہ۔ پیپلز پارٹی دادے Create کرے، کہ دا فورس ہرا کہ اونا آمریت نا کسر اٹ اڑاند ءِ، دادے چٹفنگ کن ہیلہ اس جوڑ کننگ مرے۔ اوڑے ہچ ءُ گوریلا تنظیم اس اَلوکہ، ونئے بیداد نا کارروائی اس مسوسس۔ اوڑے فوج ءِ Penetrate کرسا ویل اس Create کننگا، کہ اوڑے کارروائی نا گیگ اس ودی کننگ مرے۔ و ولدا خواجہ چیئرمین! نی خناس کہ تدوک آ دونیم سال آن فوج اوڑے ساڑی ءِ، کنے سما ءِ کہ نی پاسہ کہ حاجی صاحب ہیت کرے، پین سنگت اس ہم ہیت کرے، انت شاہدی اس ارے نے تون؟ خواجہ ءِ کنا پاس! ایڑے کہ ہراتم فوج کارروائی کننگ ءِ، نی تو او کسر تے بند کرینس، کس پترینگ کننگ کپک۔ نی خبر شینک کپیسہ۔ حوال آتے مون آ بننگ کن الیپیسہ، و ہراتم حوال آک راستکی نا مفسہ تو ہوکا تالان مریک۔ ہوکا اس مس تو راست ہم مننگ کیک و دروغ ہم۔

ہفتئی تلار
تاک: 04
23-29 جنوری 2021
پنہ: 03

Get real time updates directly on you device, subscribe now.

Leave A Reply

Your email address will not be published.