زالکار نا حق

نیاڑی تینا زند اٹ آسودئی انتئے خنپک، انسان اینو پدے اسکان تینے اشرف المخلوقات پاہک، کل ساہدار تیان تینے عقلندہ تکک، گڑا او انتئے زالکار ءِ ہمو عزت ءِ تفک ہرانا او حقدار مریک۔

اگہ نن تاریخ ءِ پٹن ہُرن تو ننے آنباز انگا جاگہ غاتیا نیاڑی اسہ مظلوم ءُ تپہ اس خننگک، راج اٹ اوڑا یکا ظلم مرسا ہنانے ہچ ءُ راج اس نیاڑی ءِ تین کن نیک شگون خیال کتنے، حالانکہ خدا تینٹ پاہک ہرا بندغ ءِ مار اس مریک ای خدا اودے پاوہ ہن نی تینا لمہ باوہ کن کٹیا نا سوب جوڑ مر، ولے اگہ کس ءِ مسڑ اس مریک تو اودے ای پاوہ ہن دنیا ٹی تینا لمہ باوہ کن رحمت نا وڑ جوڑ مر، نا لمہ باوہ نا ولفنگ کنا زمواری ءِ۔

ننا خواجہ نبی پاک صلی اللہ علیہ واٰلہ وسلم پارینے کہ ہمو بندغ بخت والا ءِ ہرانا اولیکو اولیاد نیاڑی اس ودی مرے، اللہ و اللہ نا رسول کہ نیاڑی ءِ داخہ شرف اس بشخانو گڑا نن دیر اُن کہ نیاڑی ءِ تینا نیام اٹ ہچ روادار کپنہ۔

ظہور اسلام آن مہالو اگہ نن عرب نا تاریخ آ نظر شاغن تو اوڑے ہم نن خننہ کہ نیاڑی تا زند ہرا وڑ ئس، بھاز جاگہ غاتیا کتاب آتے ٹی خنانن کہ عرب آک اسلام قبول کننگ آن مہالو تینا نیاڑی ودی مروک آ چنا تے زندہ کھڈ کریرہ، اوفتا زی آ شڑت خلکرہ۔ اگہ پیسہ مفروسس اتون تا تو تینا نیاڑی تے پیسہ نا مون اٹ تسرہ، اگہ وخت اس اِرا قبیلہ نا نیام اٹ جنگ مروسس تو خون بہا ٹی نیاڑی تننگا کہ او داسکان دا رواج گڑاس جاگہ غاتیا زندہ ءِ۔

نوزدمیکو کرن اٹ برین تو دا دور روشن خیالی نا دور پاننگا او وخت اٹ ہم نیاڑی تے نرینہ غاتیان کم تکنگاکہ، او وخت اٹ اگہ نیاڑی اس جاگہ اس نوکری کن ہنوسس تو نیاڑی ءِ پاننگاکہ کہ نی نرینہ نا کچ کاریم کننگ کپیسہ نا کاریم اُرا سنبھالنگ ءِ، نے انت تمانے نوکری نا؟ اینو پدے اسکان دا سوچ زندہ ءِ، داٹی ہچ ءُ بدلی اس بتنے، داسکان ننے بھاز آ اخبار تیٹی خواننگ کن ملک، بھاز ٹی وی یا سوشل سائٹ آتیا ننا مون آن گدرینگک کہ فلانی جاگہ غا نیاڑی اس جہیز اٹ گڑا کم تننگ نا سوب آن خاخر نا گواچی کننگا۔

جاگہ اس نرینہ تینا زئیفہ ءِ غیرت نا پن آ کسفے و جاگہ اس نیاڑی تا مون آ تیزاب شاغنگا جاگہ اس انت تو جاگہ اس انت نیاڑی تا زی آ ظلم مننگ ءِ، ولے ننا راج داسکان دانا زی آ ہچ ٹک خلنگ اف۔

ننا راج داسکان نیاڑی ءِ اسہ ساہدار اس خیال کیک، اودے بس تینا کاریم ءِ ہلنگ کن ارغ تننگے، سامبنگے، اونا زی آ انت ظلم اس خواہے کننگ کے۔

دا شون ہلوک آ وخت اٹ داسکان گڑاس جاگہ غاتیا نیاڑی تے حویلی آن پیشن مننگ نا موکل اف، پین تو پین اودے خواننگ نا ہم ہچ ءُ حق اس اف، حالانکہ اسلام تینٹ پاہک علم دوئی کننگ نیاڑی و نرینہ نا زی آ فرض ءِ۔

اگہ جائیداد اٹ حق تننگ نا ہندا ہیت مرے تو ننا راج اٹ اودے وراثتی بشخ آن ہم ہچ اس دو بفک، اگہ اونا برام مس، اودے باوہ نا اُرا غان جائیداد آن بشخ اٹی ہچ ءُ گڑاس ہم ملپک، انت اس کہ ملکیت مریر کل نرینہ اولیاد آتے ٹی تقسیم مریک نیاڑیک کل خالی دو سلرہ۔

تاریخ شاہد ءِ ہرا راج نیاڑی تے عزت و شرف تسنے و نیاڑی تے تینا کوپہ خیال کرینے ہمو راج بھاز زو شون ہلکنے ہرا راج اٹ نیاڑی تے اوفتا بنداوی آ حق آک ملانو او بے مٹ ءُ راج جوڑ مسنو۔

تو بایدے ننا کل آ فرض مریک کہ نن نیاڑی تے ہمو شرف ءِ، ہمو عزت ءِ ایتن ہرافتا او حقدار و خواہندار ءُ۔

ہفتئی تلار
تاک:01
07-01 جنوری 2022ء
پنہ: 02