رازق ابابکی(برج اسد)

عبدالرازق ابابکی نا ودی دے (4 اگست 1983ء)، برج ”اسد“، (Leo)، حاکم استار ”شمس“ (Sun)، منطقہ البروج ”5“، نشانی ”شیر“، کلید وجود ”چُنا“ تب ”خاخری“ (آتشی)، پیشن نا ہزوہ ”کوپہ“، تہہ انا ہزوہ ”اُست“ ہجی حرف ”م“، برج انا ودشت ”23 جولائی آن 23 اگست“، تعلقدار برج آک ”حمل، قوص“، تب آن چَپ برج آک ”ثور، عقرب، دلو“، ہم تب برج آک ”جوزا، سرطان، سنبلہ، میزان“، بے تعلق برج آک ”جدی، دلو“، ودی دے ئی عدد ”1“، لائف پاتھ عدد ”6“، مرکب عدد ”19“، فطری گچین کاری ”جذباتی“ ءِ۔

برج ”اسد“ نا خواجہ کن فلکیات نا چاہندار آتا پاننگ دادے کہ دا بندغ اٹی قوت ارادی زیات مریک۔ دوستی نا معاملہ ٹی اُست کشادہ، دوستی ٹی سفا سچا، کڑدار و عمل نا معاملہ ٹی ہم سوگو، حق انا زی آ سخت سلوک، عقیدہ نا معاملہ ٹی بیرہ سوگو آخا بلکہ تینا عقیدہ کن جان تروک۔ ہر وڑ انا بندغ آتتون تعلقداری ءِ جوان ءُ وڑ اسے ٹی سرجم کروک۔ ہندا وڑ اٹ سیاسی کاریم تے ٹی ہم زیات آن زیات چہوا تخک۔ بلکہ دا کاریم ءِ تو چُنکی آن دوست تخک۔ مہمان نواز، بندغی ءِ اہمیت تروک مریک۔

فلکیات نا چاہندار آتا دا پاننگ ارے کہ برج ”اسد“ والا بندغ کس انا اثر اٹی (ماتحت) کاریم کننگ ءِ دوست توپک۔ نوکری ٹی بوریت محسوس کیک۔ تینا قائدانہ لائخی تے کاریم اٹ اتنگ کن بے قرار مریک۔

فلکیات نا چاہندار آتا رد اٹ برج ”اسد“ والا بندغ نا نزوریک دادو کہ او بھاز وخت مادہ پرستی نا شکار مریک۔ دولت جمع کننگ نا شوق تخک۔ واہم بھلا جوانی دا کہ اوتینا شرفمندی آ ہچ ءُ کمپرومائز اس کپک۔ تینا کڑدار نا رد اٹ تلار آن سخت مریک۔

برج ”اسد“ کن ”جوزا، سنبلہ، میزان“ جوان ءُ دوست مننگ کیرہ۔ سخت اِنگا ساہت اٹی اودے کاریم بننگ کیرہ۔ اسٹ ایلو نا فائدہ غاتا رکھ انا کوشست کیرہ۔ داڑکن ”جدی، حوت“ برج آک جوان یا باور کننگ نا وڑ اٹ مننگ کپسہ۔ بلکہ اونا تکلیف اٹی خوشی محسوس کیرہ۔ وخت اس کہ ”ثور، عقرب، دلو“ برج آک اگہ فائدہ تفسہ تو نسخان ہم تفسہ۔ دوستی کپس تو دشمنی ہم کپسہ۔ اونا غم و خوشی تون ہچ ءُ چہوا اس تخپسہ۔ برج ”اسد“ والا بندغ کن یخ اِنگا گڑا مطلب کہ دیر و شربت آن مچٹ بھاز پاریز جوان مریک۔

براہوئی زبان نا ایلو عالم، ادیب و شاعر آتے ٹی پروفیسر گل بنگلزئی (2اگست 1935ء)، غلام نبی راہی (15 اگست 1939ء)، ڈاکٹر عنبرین مینگل (13 اگست 1973ء)، ڈاکٹر غلام سرور پرکانی (10 اگست 1957ء)، زاہد براہوئی (8 اگست 1976ء)، نیلم مومل (14 اگست 1981ء) و شہزاد غنی (2 اگست1975ء) اس تا برج ”اسد“ ءِ۔ جہانی شخصیت آتے ٹی فیڈل کاسترو، مسولینی، جارج برنارڈشا، آرمسٹرانگ، طارق بن زیاد و صلاح الدین ایوبی اس تا برج ہم ”اسد“ ئس۔

عبدالرازق ابابکی (4 اگست 1983ء) نا ودی دے ئی عدد ”4“ ءِ۔ دا ساز و زیمل نا عدد اسے۔ دا عدد اٹی بغاوت ہم ساڑی ءِ۔ علم الاعداد نا چاہندار آتا رد اٹ عدد ”4“ والا بندغ آک عجیب و غریب مریرہ۔ دا عدد والا ءِ پُہہ مننگ بھاز مشکل ءِ۔ واہم دا عدد نا خواجہ جوان ءُ سنگت اس مننگ کیک، وفادار مریک ہرا کہ تُو انا 4، 13، 22 یا 31 تاریخ آ ودی مروک آ بندغ آک اول تو کم سنگت جوڑ کیرہ، ولے ہرکس ءِ دوست جوڑ کریر اوڑکن تینا ساہ ءِ ہم سدخہ کیرہ۔

عبدالرازق ابابکی نا مرکب عدد ”19“ ءِ

(Raziq Ababaki 2+1+7+1+1=12– 1+2+1+2+1=7– 12+7=19)

دا عدد سرسہبی و خوشحالی نا عدد اسے۔ تصنیف و تالیف کن کمکار عدد اسے۔

عبدالرازق ابابکی لائف پاتھ عدد ”6“ ءِ۔

(4+8+1+9+8+3=33–3+3=6)

دا عدد جوان وڑ اٹ زندگانی تیر کننگ نا عدد اسے۔ انصاف ءِ دوست تورک، بے انصافی آن خار دیک۔ تخلیقی لائخی تا خواجہ ءِ۔ تینا زمواری تیا کمار کیک۔ دوست جوڑ کیک۔ کل آن زیات دا کہ دا عدد اُرائی عدد اسے اُرا ٹی مہر و مریبت نا شونداری ٹی جوان ءُ کار وکڑد اس ادا کننگ کیک۔ پاکستان نا پنی آ سائنس دان عبدالقدیر نا لائف پاتھ عدد ہم ”6“ ءِ۔

عبدالرازق ابابکی نا فطری گچین کاری نا اثر ”جذباتی“ ءِ۔ دُن کہ اونا پن نا لوز آتے ہُرنہ تو جذباتی حرف آک R,Z,I,B,B,I، ذہنی حرف آک A,A,A,A، وجدانی حرف آک Q,K و جسمانی حرف آتا جاگہ خالی ءِ۔ کل آن زیات حرف جذباتی فطری گچین کاری نا کیرغ آن بریرہ۔ فطری گچین کاری ٹی ”جذباتی“ اثر نا خواجہ تینا فیصلہ غاتے تینا خواہنداری تے مون آ تخسا کننگ ءِ دوست تورک۔

ہفتئی تلار
تاک: 36
25ستمبر- یکم اکتوبر 2021ء
پنہ: 06