الفتاح جل جلالہٗ:

دا اسم شریف نا سِفت اٹ عالم دین تا چندی قول آک اریر:

-1الفتاح جل جلالہٗ ہمو ذات ءِ کہ تینا بندغ آتیکن رزق، رحمت نا درگہ غاتے کشادہ، وسیع کرینے۔ و اوفتا وڑ وڑ انا مشکل آ کاریم تے آسان کرینے۔ و اوفتا گرج آتیکن سوب نا درگہ غاتے ملانے۔ اوفتا است آتے مَلک، یعنی خوش تخک، و اوفتا بصیرت نا خن تے مَلک، تاکہ بندغ آک حق ءِ چار۔

-2 گڑاس عالم آتا خیال دا کنڈ آ ہنانے کہ ”الفتاح جل جلالہٗ“ ہمو ذات پاک ءِ پارہ کہ ہرا بندغ آتا گناہ تیان پد ہم تینا نعمت آتا درگہ غاتے بند کپ۔ و نئے دوی نا ناشکری نا سوب آن تینا بندغ آتیان رحمت ءِ بند کیک۔ دن پا آیت نا خلاصہ دا مس ”الفتاح جل جلالہٗ“ ہمو حلیم، بردبار، مہربان آ ذات ءِ کہ بندغ آتا گناہ و نافرمانی تاسوب آن اوفتا رزق و روزی ءِ بند کپک۔ البتہ عالم دینک نوشتہ کرینو کہ گناہ تا سوب آن روزی بند مفک، ولے بے برکت المی مریک۔

-3مسٹمیکو قول دادے کہ ”الفتاح جل جلالہٗ“ ہمو ذات ءِ پارہ کہ ہرا مومن آتا است ءِ تینا معرفت کن ملے، و گناہگار آتیکن تینا مغفرت نا درگہ غاتے ملے۔ امام ابن قیمؒ تینا کتاب قصیدہ نونیہ ٹی نوشتہ کرینے کہ:

”الفتاح جل جلالہٗ“ خدا تعالیٰ نا پن تیان پن اسے، او ”فتح“ آن شینگ کننگانے، ”فتح“ نا اِرا مطلب مننگ کیرہ، اسٹ فتح حکمی، ارٹمیکو فتح اقداری۔ اولیکوڑان مراد شریعت ءِ، و ایلوڑان مراد تقدیر ءِ۔ یعنی ”الفتاح جل جلالہٗ“ ہمودے کہ دا ہڑدوسر آ گڑا تے نن کن انصاف اٹ مَلانے۔

از ابن الحسن ابابکی