میاں محمد بخش (صوفی رنگ)۔

صوفی و صوفی شاعر آتا بارو اٹ چاہوک آ عالم آتا رد اٹ پنجابی صوفیانہ شاعری نا بنداو ءِ تخوک آ اولیکو صوفی شاعر تو بابا فرید مسعود گنج شکر ءِ، ولے اوکان گڈ دا ماڑی ءِ تفوک آتیٹی شاہ حسین، بابا بلھے شاہ، و سلطان باہو نا پن آن بیدس خواجہ غلام فرید و میاں محمد بخش نا پن ہم بھاز پنی ءِ۔ میاں محمد بخش پنجابی بولی نا ہمو پنی آ و شرفدار آ صوفی شاعر و ہستی ءِ کہ او پنجابی ٹی ”سفر العشق المعرفت، سیف الملوک، سوہنی مہینوال، شیریں فرہاد، و مرزا صاحب“ تون اوار پین بھاز نوشتہ کرینے۔ دا کل اٹی سیف الملوک نا کِسہ کل آن زیات پنی ءِ۔ صوفیانہ شاعری آن بیدس او تینا فیض آن مڑدہ غا است آتے ابدی ءُ زندبشخسا ہنا و تینا کرامات آتیان ہم بھاز آ کسر آن رد ہلوک آتے سدھا غا کسر آن بلد کرسا مزل نا ڈس ءِ تِس۔

میاں محمد بخش نا خاہوت نا بھاز آ بزرگ آک ہم تصوف و روحانیت آن تعلقداری تخارہ۔ ہند اسوب آن میاں صاحب نا دتر اٹی تصوف دتر آنبار پیری کریکہ۔

میاں محمد بخش صوفی شاعر و بزرگ مننگ تون اوار اوار عالم و فاضل و فنا فی اللہ و فنا فی الرسولؐ نا اسہ عملی ءُ وڑک اس ئسکہ۔

دن کہ ذکر و فکر صوفی نا زند انا کل آن بھلا سرمایہ و ہستی مریرہ کہ ہندافتیان صوفی ٹی سکندری و شان و شرفداری ودی مریک۔ اسہ روحانی ءُ قوت و طاقت اس ودی مریک، و او لس مخلوق آن بھاز زیات شرفدار جوڑ مریک۔ میاں محمد بخش نا زند انا بھلا سرمایہ ہم ہندا ذکر و فکر ئس۔ ہندا سوب آن اونا زند انا ساہت اس ہم بے ذکر و فکر آن تدینگتو۔

دا پنی آصوفی و کرامات نا خواجہ و بزرگ 1830ء اٹی میاں شمس الدین قادری نا اُرا چک ٹھاکرہ کھڑی میر پور آزاد کشمیر اٹی ودی مس، و 1907ء اٹی دا بے وفا غا کوڑی آن موکل کرے۔

ہفتئی تلار
تاک: 04
23-29 جنوری 2021
پنہ: 05