شہزاد غنی (برج اسد)

(یاتی: براہوئی زبان نا شاعر و ادیب آتا برج آتے چاہنگ کن اسہ سلسلہ اس برجا ءِ۔ اوفتا برج، ودی دے ئی عدد و مرکب عدد نا چاہنگ آن پد اوفتا شخصیت، تَب انا ترندی و سستی ءِ معلوم کرسا خوانوک آتے معلوم کرفنگے۔ ہر اسٹ آن دا اومیت کننگ ہم المی اف کہ دا ردو ریسہ اودے دوست برے۔ واہم کس اس اگہ تینا برج ءِ معلوم کننگ یا تینا خوانوک آتے معلومدار کرفنگ تون است خواہی تخک تو تینا پن و ودی دے ئی تاریخ، و اسہ فوٹو اس ہم دا نمبر 0315-4211666 آ ایس ایم ایس یا وٹس ایپ کے۔ منت وار)

شہزاد غنی نا ودی دے (2 اگست1975ء) برج ”اسد“، (Leo)، حاکم استار ”شمس“ (Sun)، منطقۃ البروج ”5“، نشانی ”شیر“، کلید وجود ”چُنا“ تَب ”خاخری“ (آتشی)، پیشن نا ہزوہ ”کوپہ“، تہہ انا ہزوہ ”اُست“ ہجی حرف ”م“، برج انا ودشت ”23 جولائی آن 23 اگست“، تعلقدار برج آک ”حمل، قوص“، تَب آن چَپ برج آک ”ثور، عقرب، دلو“، اسہ تَب برج آک ”جوزا، سرطان، سنبلہ، میزان“، بے تعلق برج آک ”جدی، دلو“، ودی دے ئی عدد ”4“، لائف پاتھ عدد ”5“، مرکب عدد ”45“، فطری گچین کاری ”ذہنی“ ءِ۔

برج ”اسد“ والاڑکن فلکیات نا چاہندار آتا پاننگ دادے کہ دا بندغ اٹی قوت ارادی زیات مریک۔ سنگتی نا معاملہ ٹی اُست کشادہ، سفا سچا، کڑدار و عمل نا معاملہ ٹی ہم سوگو، حق انا زی آ سخت سلوک، عقیدہ نا معاملہ ٹی بیرہ سوگو آخا بلکہ تینا عقیدہ کن جان تروک۔ ہر وڑ انا بندغ آتتون تعلقداری ءِ جوان ءُ وڑ اسے ٹی سرجم کروک۔ ہندا وڑ اٹ سیاسی کاریم تے ٹی ہم زیات آن زیات است خواہی تخک۔ بلکہ دا کاریم ءِ تو چُنکی آن دوست تورک۔ مہمان نواز، بندغی ءِ اہمیت تروک مریک۔

فلکیات نا چاہندار آتا دا پاننگ ارے کہ برج ”اسد“ والا کس انا اثر اٹی (ماتحت) کاریم کننگ ءِ دوست تورپک۔ نوکری ٹی بوریت محسوس کیک۔ تینا قائدانہ لائخی تے کاریم اٹ اتنگ کن بے قرار مریک۔

فلکیات نا چاہندار آتا رد اٹ برج ”اسد“ والا نا نزوریک دادو کہ او بھاز وخت مادہ پرستی نا گواچی مریک۔ دولت مچ کننگ نا شوق تخک۔ واہم بھلا جوانی دا کہ اوتینا وقار آ ہچ ءُ کمپرومائز اس کپک۔ تینا کڑدار نا رد اٹ تلار آنبار سخت مریک۔

برج ”اسد“ کن ”جوزا، سنبلہ، میزان“ جوان ءُ سنگت مننگ کیرہ۔ سخت اِنگا ساہت اٹی اودے کاریم بننگ کیرہ۔ اسٹ ایلو نا فائدہ غاتا رکھ انا کوشست کیرہ۔ داڑکن ”جدی، حوت“ برج آک جوان ءُ یا باور کڑزوک ءُُ سنگت مننگ کپسہ۔ بلکہ اونا تکلیف اٹی خوشی محسوس کیرہ۔ وخت اس کہ ”ثور، عقرب، دلو“ برج آک اگہ فائدہ تفسہ تو نسخان ہم تفسہ۔ دوستی کپس تو دشمنی ہم کپسہ۔ اونا غم و خوشی تون ہچ ءُ است خواہی اس تخپسہ۔ برج ”اسد“ نا خواجہ کن یخ اِنگا گڑا مطلب کہ دیر و شربت آن مچٹ بھاز پاریز جوان مریک۔

براہوئی زبان نا ایلو عالم، ادیب و شاعر آتے ٹی پروفیسر گل بنگلزئی (2اگست 1935ء)، غلام نبی راہی (15 اگست 1939ء)، ڈاکٹر عنبرین مینگل (13 اگست 1973ء)، ڈاکٹر غلام سرور پرکانی (10 اگست 1957ء)، زاہد براہوئی (8 اگست 1976ء)، نیلم مومل (14 اگست 1981ء) و عبدالرازق ابابکی (4 اگست 1983ء) اس تا برج ”اسد“ ءِ۔ جہانی شخصیت آتے ٹی فیڈل کاسترو، مسولینی، جارج برنارڈشا، آرمسٹرانگ، طارق بن زیاد و صلاح الدین ایوبی اس تا برج ہم ”اسد“ ئس۔

شہزاد غنی نا مرکب عدد ”45“ ءِ۔

(Shehzad Ghani 3+5+5+7+1+4=30– 3+3+1+5+1=15 +30=45)

دا مرکب عدد اسہ زوراور ءُ عدد اسے۔ پین چندی خاصیت آتتون اوار ادبی معاملہ غاتتون ہم تعلق تخک و سرسہبی نا مستائی ہلیک۔

شہزاد غنی نا ودی دے ئی عدد (2 اگست1975ء) ”4“ ءِ۔ دا ساز و زیمل نا عدد اسے۔ دا عدد اٹی بغاوت ہم ساڑی ءِ۔ علم الاعداد نا چاہندار آتا رد اٹ عدد ”4“ والا بندغ آک عجیب و غریب مریرہ۔ دا عدد والا ءِ پُہہ مننگ بھاز مشکل ءِ۔ واہم دا عدد والا جوان ءُ سنگت اس مننگ کیک، وفادار مریک۔ داڑان ایڑتر تُو انا 4، 13، 22 یا 31 تاریخ آ ودی مروک آ بندغ آک اول تو کم سنگت جوڑ کیرہ۔ ولے ہرکس ءِ سنگت جوڑ کریر اوڑکن تینا ساہ ءِ ہم سدخہ کیرہ۔

شہزاد غنی نا لائف پاتھ عدد”5“ ءِ۔

(2+8+1+9+7+5=32– 3+2=5)

دا عدد ”رائٹر“ نا ءِ۔ دا اسہ ہرفن مولا عدد اسے۔ آجوئی دوست مریک تے تینا ہمہ گیریت ءِ کاریم اٹ اتنگ نا خواہندار مریک۔ لائف پاتھ عدد ”5“ نرینہ و نیاڑی ہڑتوم آ جنس آتے کن اسہ وڑ انا عدد اسے۔ سیل و سواد تون زیات است خواہی تخک۔ ایلوفتے چاہنگ اٹی غلطی کپک۔ زندگانی ٹی مدام سرسہبی ءِ خواہک بے سہبی دوست اف تے۔

شہزاد غنی نا فطری اثر ”ذہنی“ ءِ۔ اونا پن اٹی ذہنی اثر نا حرف آک ”H,H,A,G,A,N“، جذباتی اثر نا حرف آک ”S,Z,I“، جسمانی اثر نا حرف آک ”E,D“ ءُ۔ وجدانی حرف اف۔ کل آن زیات حرف اونا ذہنی اثر نا کیرغ آن ءُ۔ ذہنی اثر والا بندغ آک ہر کاریم اٹی تینا سوچ و سُج ءِ کاریم اٹ اتیرہ، ہچ ءُ وڑ اسے ٹی جذباتی فیصلہ کپسہ۔

ہفتئی تلار
تاک:01
07-01 جنوری 2022ء
پنہ: 06