ساڑی نظام اٹ اصلاحات ءِ حکومت اولیت ایتک، وزیر اعظم

اسلام آباد (اے پی پی) وزیراعظم عمران خان پارینے کہ سرکاری خزانہ غان تروک آ سبسڈی تا مسخت راج انا نزور تپہ غاتا کمک و راجی و زرگزرانی شونداری نا مون آ دننگ ءِ، سٹی آ بندغ آتا سبسڈی نا نظام آن فائدہ ہرفنگ نئے بیرہ سرکاری وسیلہ غاتا زیان ءِ بلکن حقدار آتا حق ءِ خلنگ نا سوب مریک ہنداخاطرآن دا نظام اٹ اصلاحات ءِ حکومت اولیت ایتک۔ او دوشنبے نادے آ داڑے حکومت نا کنڈآن چندی بشخ آتیٹی تروک آ سبسڈی نا نظام ءِ شفاف و منظم کننگ و داکمکاری ءِ حقدار اسکان سرکننگ ءِ پک کننگ نا بابت دیوان نا کماشی ءِ کریکہ۔ دیوان اٹی وزیر صنعت محمد حماد اظہر، سلاہکار خزانہ ڈاکٹر عبدالحفیظ شیخ، سلاہکار واپار عبدالرزاق داؤد، خصوصی کمکار ڈاکٹر ثانیہ نشتر، ڈاکٹر شہباز گل، مسکوہی سیکرٹری خزانہ ڈاکٹر وقار مسعود و ایلو سینئر آفیسر آک ساڑی ئسر۔ مسکوہی وزیر خزانہ شوکت ترین، سلطان علی الانہ، عارف حبیب، ڈاکٹر اعجاز نبی ویڈیو لنک انا کمک اٹ دیوان اٹی بشخ ہلکر۔ وزیراعظم میڈیا آفس نا رداٹ حکومت نا کنڈآن چندی بشخ آتیٹی بالواسطہ و بلاواسطہ فراوان کروک آ سبسڈی تا مقدار و دانظام اٹ اصلاحات نا بابت چندی سلاہ تیا سجفنگا۔