بلوچستان نا وسیلہ غاک مذاکرات اٹ ایسر مننگ کیرہ، وزیراعظم

وزیراعظم محمد شہباز شریف بلوچستان نا ویل آتا ایسری کن گرینڈ ڈائیلاگ نا سلہ خلسا پارینے کہ اگہ اینو ہم نن اوار مرسا تولن تو بھاز آ آسراتیک ودی مننگ کیرہ، صوبہ نا روا انگا ویل و غاو تے اسہ وار آخا بلکن وار وار بننگ واوفتے ایسر کننگ کن تیار اُن۔ اوپارے کہ چار صوبہ اوارمرسا کاریم کیر تو پاکستان شون ہلیک۔ بلوچستان نیشنل ورکشاپ آن تران کرسا وزیراعظم شریدار آتے بخیر کرے و پارے کہ بلوچستان بلوچ و پشتون قوم آ تالان پاکستان نا اہم ءُ بشخ اسے، بلوچ قوم انا تاریخ دلیری، مہمان نوازی، رواداری و شانی آ روایت زیبدار ءِ۔ پاکستان جوڑ مننگ ناوخت آ بلوچستان نا جتا جتا بشخ آک پاکستان تون اوار مننگ نا پڑو کریر و بلوچ متبر و الس نااست آ توار آ پاکستان نا بشخ جوڑ مننگ نا فیصلہ کریر۔ او اسہ وار ولدا سیاسی و قومی امنائی آ زور شاغسا پارے کہ اینو ہم کل تپہ غاک اوار مرسا تولن تو ویل آتا ایسری و ملک اٹی شونہالی نا کسر ملنگ کیک۔ پاکستان نا شونداری و سوگوی کن ہر چار آ صوبہ غاتا اوار مرسا مونی ہننگ المی ءِ۔