پی ٹی آئی بانی ءِ ہسپتال دراخ جوڑ گوندانے، عطاء اللہ تارڑ

بنجائی وزیر حوالکاری و شینکاری عطاء اللہ تارڑ پارینے کہ سپریم کورٹ نا فیصلہ نا رداٹ پی ٹی آئی نا بانی نا ہسپتال اٹ طبی جاچ ءِ ِ کرفنگا، طبی جاچ انا رداٹ پی ٹی آئی نا بانی دراخ جوڑ ئس‘ مچ آ عمل پورو مننگ آن پد اودے پدی اڈیالہ جیل آ گدریفنگا۔ جمعہ نادے آ راجی رابطہ نا پلیٹ فارم “ایکس” آ تینا پوسٹ اٹ بنجائی وزیر حوالکاری پارے کہ سپریم کورٹ نا فیصلہ نا رداٹ بندی ءِ 20 و 21 اگست 2026ء نا نیامی نن جوان رکھی گام گیج آتا رداٹ ہسپتال آ دننگا، خن تا ناجوڑی نا چاہندار‘ است انا ڈاکٹر و فزیشن آتتون اوار مستند ڈاکٹر آتا ٹیم اودے جوانی اٹ ہُرا و اودے طبی وڑاٹ جان جوڑ گوندار۔ اونا ایڑھ عظمیٰ خان طبی جاچ و درمان نا مچ آ ریسہ ٹی ساڑی ئس۔ دا مچ آ عمل پورو مننگ آن پد اودے 21 اگست 2026ء نا سُہب انا کم و ود 5 بجہ غا اڈیالہ جیل آ پدی گدریفنگا۔ بنجائی وزیر حوالکاری مستی معلومداری ترسا پارے کہ طبی جاچ پمز ہسپتال اٹ کرفنگا ہراٹی شفا انٹرنیشنل ہسپتال نا ڈاکٹرآک ہم ساڑی ئسر۔ پی ٹی آئی نا کارندہ غاتا کنڈ آن سیکورٹی نا ہرا حالیت آتے شفا انٹرنیشنل ہسپتال نا کسر اٹ و پیشن ودی کننگا، اونا رداٹ اودے پمز ہسپتال آ دننگا و طبی جاچ انا رداٹ او دراخ جوڑ گوندنگا۔ اودے مہالو ہم طبی آسراتی فراوان کرسا کننگانے و داسہ ہم ہراتم اودے گرج مس طبی آسراتی فراوان کننگک۔