ڈکھیا تا خذمت و حقدار آتا وخت آ کمک ننا اولیت آتیٹی اوار ءِ، نور محمد دمڑ

کوئٹہ، صوبائی وزیر کموڈیٹی مینجمنٹ ڈیپارٹمنٹ و چیئرمین بلوچستان فوڈ اتھارٹی حاجی نور محمد دمڑ تون زیارت، ہرنائی و سنجاوی آن بروک جتا جتا ڈل آک سول سیکرٹریٹ اٹی اونا دفتر اٹی اوڑدہی کریر۔ اوڑدہی نا وخت آ ڈل آتا باسک آک تینا تینا علاقہ غاتے مون تروک السی ویل، بنداوی آسراتی تا کمتی، علاقائی گرج و ایلو اہم باندات آتیان صوبائی وزیر ءِ معلومدار کریر۔ ڈل آک جتا جتا ویل آتا ایسری کن صوبائی وزیر آن عملی گام گیج آتا خواست کریر، وخت اس کہ دا وخت آ علاقہ نا کل حالیت، السی خواری و شونداری و آسودہی باندات آ ہم گپ وتران کننگا۔ اوڑدہی ناوخت آ اسہ ناجوڑ اسے نا کنڈ آن آپریشن کن کمکی فنڈ انا درخواست ہم تننگا۔ ہراڑا صوبائی وزیر حاجی نور محمد دمڑ دمدستی نوٹس ہلسا تعلقدار ناجوڑ نا آپریشن نا کل خڑچ آتے ہرفنگ نا پارت جاری کرے۔ صوبائی وزیر پارے کہ ڈکھیا بندغ آتا خذمت و حقدار آتا وخت آ کمک ننا اولیت آتیٹی اوار ءِ و الس ءِ سخت انگا ٓ ساہت اٹی تنیا الیپنہ۔ صوبائی وزیر حاجی نور محمد دمڑ ڈل انا ویل و خواست آتے سکوت اٹ خف تورے و باوری کرفے کہ السی ویل آتا ایسری، بنداوی آسراتی تا فراوانی و مُر انگا علاقہ غاتا الس ءِ مون تروک خواری تے چٹفنگ کن ہر وڑ انا گام گیج کننگک۔ او پارے کہ حکومت الس نا خذمت و اوفتا ویل آتا وخت آ ایسری کن سنجیدہ و عملی گام گیج کننگ اٹی ءِ وخت اس کہ السی آسودہی و پدتموک علاقہ غاتا شونداری حکومت نا اولیکو اولیت آتیٹی اوار ءِ۔ حاجی نور محمد دمڑ تعلقدار کمامدار آتے السی ویل آتا ایسری کن المی آ گام گیج کننگ نا پارت کرسا پارے کہ السی نمائندہ نا حیثیت اٹ کنا کوشست ءِ کہ بندغ آتے مون تروک خواری تا ایسری اوفتا درگہ غا کننگے و دوئی وسیلہ غاتیٹی زیات آن زیات الس ءِ ریلیف فراوان کننگے۔ دا وخت آ زیارت، ہرنائی و سنجاوی آن بروک ڈل آک صوبائی وزیر حاجی نور محمد دمڑ نا ویل آتے سکوت اٹ خف توننگ‘ دمدستی پارت جاری کننگ و ناجوڑ نا آپریشن نا خڑچ اکن فنڈ فراوان کننگ آ منت واری ہرفیر و اونا الس دوست کوشست آتا ستاءِ کریر۔