رخشان ادبی کاروان پنجگورنا ہفتئی مسٹمیکو مشاعرہ

 

رخشان ادبی کاروان نا ہفتئی مسٹمیکو مشاعرہ نا بنا تلاوت قرآن پاک آن مس۔ ہرانا بختاوری ءِ خواجہ مولوی محمد اکبر آسی دوئی کرے۔ تلاوت آن پد مشاعرہ بنا کرے۔مشاعرہ نا خاص انگا مہمان استاد صابر ندیم ئس۔ ہندن دیوان نا کماش رخشان ادبی کاروان نا صدر ولی ساسولی ئسکہ۔

استاد صابر ندیم دیوان آن گپ و تران کرسا پارے کہ فنِ شاعری نا بھاز گچین ءُ دنیا اسے۔ دانا اولیکو فائدہ دادے کہ تینا و بیگانہ نن کل داڑے اسٹ اُن۔ ایلو ہیت دادے کہ ادب نا دنیا ہندن ءُ گڑاسے پارہ کہ دابندغ ءِ وخت اس ہم غم گڑتی نا نسخان کن الیپک۔ وخت اس ہم غم تا گواچی کپک۔ علم ادب نا ای اسہ فرق اس دا پہہ مریوہ کہ علم بھاز جاگہ غا دلیل خواہک ولے ادب ہمو گڑا ءِ کہ ہچ ءُ دلیل اسے نا آہری اف۔ ولے شڑت دادے کہ داٹی اخلاص مخلصی ایمانداری مرے۔ دینی حوالہ غا مذہبی حوالہ غا ہم، انتئے کہ علم ءِ ہُرس تو ابلیس تون بے کچ ءُ علم اس ئسکہ، ولے ادب کتو۔ ہمو بے ادبی اودے نیست نابودکرے۔ فنِ شاعری کن علم عروض لازمی ءِ، انتئے کہ وخت انا ضرورت ءِ، ولے دُن مف کہ علم عروض آن چار لوز ہیل کرین، تینا استاد یا تینا بھلا تیا ہور ءِ شِک کین، یا اول اوفتا ریش اٹی ہلین کہ نا داڑے فاعلن فعولن اٹی کمی بسنے۔ توعرض دادے کہ نن ہیل کین بروک آ نسل اکن اسہ جوان ءُ کسر اس ملن بروک آ نسل اکن آسانی ودی کین بروک آ نسل ءِ دانا بھرم ءِ ایتن۔ او گڈ سر اٹ رخشان نا کل سنگت آتے نیک دعاکرے کل سنگت آتا منت ءِ ہرفے۔

کچاری نا کماش ولی ساسولی ہیت کرسا پارے کہ کل سنگت آک جوان شعر لکھرہ، ولے کل سنگت آتیان خواست دادے کہ اوفک یکہ شاعری آ زور خلپس بلکہ نثر، کِسہ، سفرنامہ و ایلو گڑاتیٹی ہم قلم ددیفر۔ او پارے کہ شاعر تینا قوم انا سفیر مریک، شاعر تینا راج انا نمائندگی ءِ کیک، شاعر تینا راج ءِ مستی دیک، گڈ سر اٹ او کل سنگت آتا منت ءِ ہرفے، خاص وڑ اٹ صابرندیم نا کہ او تینا نہادی آ وخت آن وخت کشا ننے سرپدی تس، اونا لکھ منت لکھ تورو۔

داکان مست مشاعرہ ٹی شئیر پاروک آتا پنک و کلام نا وڑک آک دا وڑ اٹی ءُ:

کریم اسیرپنجگوریؔ

خدانا قرآن ءِ زیارت کرینٹ

خدا تون مدام محبت کرینٹ

سعیدفیض پنجگوریؔ

استو نن درست توسُٹ بتو با

وعدہ اس کریٹ پین وفا متو با

وہاب صدیقیؔ

نئے کہ روزگار ہُنر نئے کہ تعلیم کرین

رند اٹی بس نما سہب ءِ پیشیم کرین

نوری دہوارپنجگوریؔ

گنوک اسے اُٹ ای ساراسے اُٹ

ہنین شاد آن ای زار اسے اُٹ

بابل باقرؔ

پین انت ہیت کیسہ کر یخ انا ہیت ءِ کپیس

کناہیت ءِ پہہ مر یخ انا ہیت ءِ کپیس

صدام رضاء پنجگوریؔ

اگہ اودے زرس تینا ردی تا گر سما افک

گُڑا اوڑتون کنا ہیت اس کنا رشتہ اس رضاء افک

صدف بلوچستانیؔ

اے عشق انا پن آ ہُر ورناک پیر مسُر

بھاز آتا خُشک ءُ پیہن عمر آک اخیرمسُر

انورزیب پنجگوریؔ

کشتیک ڈُب ہلوسُر دریاک کُچتورہ

توبے ءِ کل ہُرارہ اِستارک کُچتورہ

محسن بسملؔ

خزان آن پد چمن ٹی بہار زندہ ءِ

وطن نا رکھ ءِ تخوک آ توار زندہ ءِ

ساجدزیب پنجگوریؔ

جائی وخت آک کارہ سنگت

شاہی تخت آک کارہ سنگت

میرتاجلؔ

راج اتو دا ننے مخلصی ہوغفے

است اسے است انا تُلسی ہوغفے

قمرانجم ؔ

براسل نن بے قرار اُن اے صنم

عمر اسے نا انتظار اُن اے صنم

ہفتئی تلار
تاک:40
29-23 اکتوبر 2021ء
پنہ: 08